Ethiopia Ram Kahdohnak Ah Tualchung Mi 200 Leng An Thi

June 18 ah Oromia hriamtlai (OLA) ruangah Ethipia ram Oromia hmunram ah tualchung mi 200 nak tlawm lo an thi, tiah nuhrin covo phu le Oromia hmunram ṭuanvo ngeitu hna nih an chim.

A thimi tam deuh cu, Amhara miphun an si, tiah palik bawi pakhat nih a chim.

Kahdohnak cu cozah ralkap le OLA hriamtlai phu hna he aa pehtlai mi a si, tiah Ethiopia nuhrin covo phu, EHRC nih cathanh an chuah. Kahdohnak ruangah minung tam tuk hliamhma an pu i, khua tampi a rawk, tiah EHRC nih June 20 ah an langhter.

Ethiopia cozah nih OLA hriamtlai phu cu misual phu an si tiah a ti hna i, a bik in Amhara miphun an doh hna, tiah theih a si.

“Misual hriamtlai phu hna nih, tualchung mi an thahmi hna le pawcawmnak thilri an hrawhmi hna hi kan cohlang lo,” tiah Ethipia ram Prime Minister Abiy nih June 20 ah a Twitter ah a langhter.

“OLA hriamtlai phu nih Prime Minister Abiy chimmi cu an al ve. Ethiopia Prime Minister hruaimi uk hruainak phu nih an sualnak le an tuahto mi cu OLA hriamtlai phu nih an tuahmi a si,” tiah an kan puh tiah OLA chimphuannak nawl ngeitu nih June 19 ah a chim.

Minung nuai 110 hrawng umnak Ethiopia ram cu biaknak phung aa khat lomi miphun ṭeng nge tam tuk an umnak ram pakhat a si. Miphun ngan bik mi cu Oromia le Amhara an si. Ethipia rammi dihlak ah zatuak 60 leng an si, tiah theih a si. Cred : The Chin Post

Be the first to comment

Leave a Reply

Your email address will not be published.


*