Min Aung Hlaing Nih Rampi A Daih Lawngah Kawlram Pumpi Thimnak A Tuah Lai
=======================
A luancia 2017 lioah khan NLD Central Committee upa U Win Htein nih “Anih (MAH) chunmang cu 2020 ah President ṭuan a si” tiah vawleicung minthang thawngthanhca New York Times ah a rak chim bal. U Win Htein nih cun Min Aung Hlaing president a si khawhnak ding lam pahnih a um tiah a chim fawn. U Win Htein hi NLD cozah a kai hnuin Naypyidaw ah a um i Suh Kyi he zarhkhat voikhat aa tong pengmi le ralbawi tampi he aa theihngalmi a si caah a chimmi bia hi zumh a ummi a si.
MAH hi ralbawizik (Commander in Chief) a si tiangah President si ding chunmang a manh bal lo. USDP chung i President Thein Sein le Thura Shwe Mann an i rem lo hnu khan President si duhnak lungthin a ngei tiah Thein Sein chan i ramkomh vuanci pakhat nih a chim. MAH le Thura Shwe Mann hi naihniam ngai in a ummi an si. MAH ralbawizik a si tiangah Pyituh Hlutdaw Chairman Thura Shwe Mann cu zarhkhat voikhat in a va ton peng ti a si.
Cuti i MAH le Shwe Mann an i naihniam cu Thein Sein i a vuanci pawl nih an duh ve lo. President Offcie vuanci U Soe Thein nih “Thura Shwe Mann hi presdent a ṭuan ding a si kho lo” tiah voi tampi a chim ti a si. A bik in Suh Kyi hlutdaw chung a luh i Shwe Mann he an i naihniam hnu lebang ah cun U Soe Thein te phu cu an thin a phang chinchin.
Cucaah MAH cu President Thein Sein lei ah ṭang dingin a phunphun in an lemsoi. Cuticun Dagon City Project nganpi ṭuan ding an pek. A fapa Aung Pyih Sone tender nganpipi an pek tiah Thein Sein chan lio ramkomh vuanci pakhat nih cun a chim fawn. Cu lawng si loin President Thein Sein le a vuanci pawl nih MAH le a kuttang ralbawi cheukhat cu an ton hna i Thura Shwe Mann hi president a si ahcun Suh Kyi he an i bawm lai i kan ngeihmi vialte an kan chuh ṭhan lai tiah an chimh. Kum 2015 thimnak ah USDP nih teinak kan hmuh ahcun President hi kumhnih le cheu lawng ka ṭuan lai i a dang kumhnih le cheu cu nangmah nih na ṭuan lai tiah MAH cu an lemsoi fawn. MAH nih kum 63 a si tiang ralbawizik a ṭuan khawh nakding ah cozah rianṭuannak phunglam zong kan remh lai tiah an ti.
Cucaah Vuanci Soe Thein nih ramkomh rian petu bu (ပြည်ထောင်စု ရာထူးဝန်အဖွဲ့ ) Chairman U Kyaw Thu cu cozan rianṭuannak phunglam remh dingin nawl a pek colh. Phunglam ningah cun kum 60 tiang lawng cozah rianṭuan khawh a si. Hi phunglam remhnak kong cu July 9, 2015 i tuahmi ramkomh hlutdaw ah an ceih i tam deuh nih an lungtlin lo caah an fehter kho lo. Cuticun President Thein Sein le a vuanci hna forhfialnak bangin MAH cu 2015 hnuin ramkhel ah a lut deuhdeuh i president ṭuan ding chunmang zong manh hram a thawk ve.
Asinain 2015, November ah thimnak cu tuah a si i USDP cu ṭhalolak in an sung ai! Thein Sein le MAH chunmang zong a tlau ve. Kum 2015 thimnak result kha cohlan lo dingin an i zuam len ko nain khalio i UEC Chairman U Tin Aye nih a duh lo pinah ralbawizik hlun Than Shwe nih NLD sinah nawlngeihnak pek phot dingin a ti hna caah NLD nih cozah an ser.
NLD nih cozah an ser hnu zongah MAH nih president ṭuan dingin chunmang a manh peng rih. Cucaah NLD Cozah chan vialte kha MAH cu NLD cozah he an i hlat, rian an ṭuanṭi kho tuk lo. USDP lei a hoih deuh. Cucaah a kuttang ah a rak um i pensen an lak hnuah USDP ah a lutmi ralbawi hlun hna kha biatak tein a komh hna. A kuttang ah a rak um i a hnuah hlutdaw palai a simi hna chungin a chimmi paoh a tuahmi hna kha hlutdaw ah a chuahpi duhmi biatung chuahpi dingin a fial hna.
Rakhine ramkulh hrambunh Western Command tlaitu ralbawi Tawng Aye kha Rakhine ramkulh Ngapali rili kam i vawlei chuhmi kongah buainak a rak tong i cucu dantat loin MAH nih a rak ngaihthiam. Cuticun ralbawi hlun Tawng Aye nih MAH chimmi paoh a zulh i a tuah peng ve.
Kum 2020 thimnak ah USDP in aa cuh dingmi palai an thimmi hna zong kha MAH sinah an hmuh i a lungtlin hnuah an fehter. USDP General Secretary U Thet Naing Win zong nih USDP nih an tuah dingmi vialte kha MAH sinah theihternak a tuah hmasa tawn. MAH zong nih 2020 thimnak ah USDP nih teinak an hmuh khawhhnga biatak tein a bawmh hna. Asinain USDP cu an sung ṭhiamṭhiam. Zatuak 26% hmanh an hmuh lo caah president ṭuan ding MAH chunmang cu a si kho hoi lo. Plan A cu a tlamtlin ti lo caah Plan B ningin cawlcangh an thawk ṭhan.
MAH nih U Tawng Aye cu thimnak ah vote cazin a dik lomi a um tiah hlutdaw ah biatung chuahpi dingin a fial. Cu kong cu thawnglatu hna sin zongah a chimter. Cun thawng fianternak zong an tuah i vote cazin a dik lomi a um tiah biatak tein an aupi. Cuti an tuah cu ralbawi dang hna nih an dirpi nak dingah a si. Hihi nawlngeihnak laknak dingah khua an khanmi a si. MAH nih cun vote cazin a dik lomi hi nuai 10 renglo a si tiah a chim nain UEC nih kumkhat chung zohfelnak an tuah i voikhat nak tam vote a pemi cazin 1,000 hrawng lawng an hmuh.
Kum 2020 thimnak ah vote cazin a dik lomi a um caah nawlngeihnak kan lak an timi cu MAH nih president a ṭuan khawh nakhnga an sermi Plan B a si ti a fiang ngaingai. Nawlngeihnak an lak lawngah MAH nih president ṭuan ding a chunmang a tlamtlinh khawh lai cu mu! Cucaah nawlngeihnak an lak hnuin thimnak ah PR (Proportional representation) System kan hman lai an tinak a si. PR System an hman lawngah USDP nih thimnak ah zatuak 26% cung an hmuh khawh lai.
Cu hlan thimnak i an rak hmanmi First-past-the-post (FPTP) cu vote tam bik a hmumi party nih ṭhutdan vialte i lak i cozah ser a si. FPTP ningin thimnak an tuah ahcun USDP nih zatuak 26% cung teinak an hmu kho lai lo. USDP nih zatuak 26.% teinak an hmuh ahcun ralkap palai 25% he an i fonh lai i cozah an ser khawh lai. Cuticun MAH zong Myanmar ramhun (president) a si kho lai. Cucaah MAH nih hramhram in nawlngeihnak an lak hi a si tiah ramkhel thiamsang hna nih an chim.
Asinain atu hi president si ding nakin ralbawizik si i phungsernak, uknak le biaceihnak timi cozah suttung pathum hna hi amah pakhat lawng nih kum tampi tlaih dingin aa timtuah tiah chimrel a tam ngai. A tawifiannak cun Than Shwe nawl kha cawn aa tim. Cuti chimrel a sinak cu a ruang a um tiah Myanmar ramkhel kong hlathlaitu hna nih an chim.
MAH nih thimnak kan tuah ṭhan lai tiah a chimmi cu thiamsang tampi nih an zum lo. Dec 23, 2021 ah Hmawbi i ralbawi training a kai liomi hna he tonnak ah MAH nih “Ram a daih le daih lo zoh in 2023, August ah zapi i tel khawhmi thimnak kan tuah khawh nakhnga kan i zuam cuahmah” tiah a chim. Thimnak kan tuah hrimhrim lai ti a si lo, ram a daih le daih lo zoh in timi bia dangdanh a telh. Cu ruangah 2023 ah thimnak kan tuah lai tiah MAH nih a chimmi hi a lunghring mi le a zum lomi an tamnak a si.
A ruang dang a um rih. SAC nih an i cherhchanmi 2008 phunghrampi an rak sernak Hleku khuapi Nyanghnapin (ညောင်နှစ်ပင်) Town Hall cu MAH nih a va zoh i ṭha tein remh dingah nawl a pek hna tiah theih a si. Cu a va zohnak hmanthlak cu June 8 ah SAC kuttang media nih an langhter. Inn va zoh sawhsawh ding a si ahcun vuanci pakhat khat maw, ralbawi pakhat khat maw a fial khawh ko, asinain amah hrimhrim nih a va zohmi cu thil pakhat khat langhter a duh caah a si tiah ramkhel hlathlaitu hna nih an chim.
MAH nih a chim ningah cun August, 2023 ah thimnak tuah a si lai. Hi thimnak he pehtlai in MAH nih Plan A le Plan B a ngei ṭhan tiah thiamsang hna nih an chim. Plan A cu thimnak ah amah ṭanhtu party nih teinak an hmuh ahcun nawlngeihnak pek ding. Plan B cu phunghrampi a thar in kan ser lai tiin Than Shwe bantukin kum saupi khongton uknak tlaih ding!
MAH nih nawlngeihnak a lak ah khan a kuttang ralbawi zeimawzat an lungtling lo ti a si. Cucaah MAH nih a kuttang ralbawi le ralkap sawhsawh hna sin tiangah a kal i nawlngeihnak kan lakmi a si, chikhat kan tlaih chungmi a si, thimnak kan tuah lai i teinak a hmutu party sinah nawlngeihnak kan pek ṭhan lai tiah a chim lengmang. Asinain ramchung hmunkip ah kahdohnak a um i ram a dai rih lo tiin thimnak hi tuah loin um khawh a si ve.
Asinain 2008 phunghrampi ningin cun ralkap nih kumhnih tiang lawng nawlngeihnak an tlaih khawh. Kumkhat an tlaih lai i ram a daih lo ahcun thlaruk-thlaruk in voihnih an sauh khawh. Kan theih cio bangin July, 2022 ah a voihnihnak an sauh cang caah cu an sauhmi thlaruk a dih in cun ralkap nih nawlngeihnak an tlai kho ti lo.
Than Shwe nih a rak sermi 2008 phunghrampi pohmah 445 ah Nah-Wah Tah le Nah-Ah-Phah chan lio an sualnak vialte hna kha dantat kho lo dingin a kham. MAH nih amah le a chungkhar siseh a sualṭi hawi ralbawi dang hna himnak caah phunghrampi a thar a ser te lai tiah zumh a si. Cu phunghrampi thar ah cun SAC chan i sual le ṭhatlonak an tuahmi vialte kongah tazacuai le dantat khawh lo dingin a kham ve lai. Cuti a tuah ding a si ahcun a tlai bik 2023, January thla dih hlanah biakhiahnak an tuah a hau hnga.
Atulio boruak zoh tikah PDF, CDF le tlangcung hriamtlaibu an ṭhawng chin lengmang. SAC ralkap a thimi an tam chin lengmang ve. Cutikah thlaruk chungah SAC nih tualchung hriamtlai hna hi a tei kho hna lai lo i daihnak zong a um kho lai lo. Daihnak si loin meithal thawng tu kan theih deuhdeuh lai ti a fiang. Cuticun ramchung daihnak a um lo caah thimnak kan tuah kho lo an ti te lai. Khatlei ah phunghrampi ningin kumhnih cung nawlngeihnak tlaih khawh a si fawn lo caah 2008 phunghrampi cu kan hrawh cang, a thi cang tiah an thanh te lai. Cun phunghrampi a thar an ser lai. Hi vialte hi MAH nih ṭha tein aa timtuah caah 2008 phunghrampi an rak sernak Nyanghnapin khua i Town Hall a va zoh i remh dingin a fial hna nak a si tiah zumh a si.
Asinain hihi a si bak lai tiah chim awk cu a ṭha thlu lo. Thlaruk chungah tualchung hriamtlai hna nih SAC ralkap hi an tei, an nawr khawh deuh hna a si ahcun August, 2023 ah thimnak tuah dingin biaruahnak ngeih khawh a si lai. Tualchung hriamtlai lei an sungh deuh ahcun MAH nih phunghrampi a thar kan ser lai a ti lai i Than Shwe bantukin caansaupi khongton uknak tlaih khawh a si tiah ramkhel thiamsang hna nih an zumh. Salai CP Lian (CEO, The Chin Post)
Relchap, Tedim Peng, Haimual Khuathar Cu SAC Ralkap Nih An Khangh! Chin ramkulh, Tedim peng, India-Myanmar ramri pawng Haimual khuathar cu SAC ralkap nih nihin August 14, zaanlei suimilam 4:30 hrawng ah an khangh, tiah theih a si. SAC ralkap 40 hrawng cu August 12 ah Rihkhawdar sakhan in Haimual lei ah an kal i, nihin August 14 ah Haimual khuachung cu an khangh caah inn 10 hrawng a kang cang, tiah khuami nih an chim. SAC ralkap hna nih khuachung inn an khangh hlan ah meithal an puah ta, tiah an chim.
Haimual khua thar cu tualchung ralkap hna nih umhmun an khuarnak a si i, cuka hmun cun Rihkhawdar SAC ralkap umnak sakhan cu drone in an kah tawn hna, tiah theih a si. Khuami pakhat nih cun, “SAC ralkap nih Haimual khua cu an khangh i, kahdohnak cu a chuak lo, nai ah Tualchung ralkap nih ralbawi pakhat Wai Myo Paing cu an kahthah hnu ah, atu bantuk in SAC ralkap nih Haimual khuachung an khangh nak hi a si,” tiah a chim.
August 10 zinglei Rihkhawdar kahdohnak ah SAC ralbawi (ṭaṭ-yin-hmu duh-bu-hnu-gyi) Wai Myo Paing telh in ralkap 5 cu Chin ralkap kut in an thi, tiah Chin ralkap hna nih cathanh an rak chuah.
Depeyin Peng Ah Tualchung Hriamtlai Phu Chungtel 4 Cu SAC Ralkap Nih An Thah Hna!, Sagaing ramṭhen, Depeyin peng, Hpoketantaw(ဖုတ္တန်းတော) khua ah tlaih a tongmi tualchung ralkap 5 chung ah ralkap 4 cu SAC ralkap nih an thah hna i, pakhat cu a tlau, tiah tualchung mi nih an chim. Hpoketantaw(ဖုတ္တန်းတော) khua cu August 9 ahkhan SAC ralkap 100 nih luhhnawh in umhmun an khuar. Khuachung thil sining hlathlainak a tuahtu tualchung hriamtlai phu chungtel 5 hna cu August 13 zaanlei ah tlaih an tong, tiah min langhter a duh lo mi khuami pakhat nih a chim.
Khuami pakhat nih cun, “Thah a tongmi cu 4 an si i, an lu ah an tuk hna caah an lu cu zoh awk ṭha lo in an rawk. Fak tuk in an hrem hna hnu in an Kaa ah mei thal in an kah hna. Nihin August 14 zinglei i khuachung kan luh ah an ruak kan hmuh hna,” tiah a chim. Inn 300 hrawng khuasaknak, Hpoketantaw(ဖုတ္တန်းတော) khuami 800 leng cu a luancia zarh khat hrawng khan hmundang ah kan zaam hna, tiah Hpoketantaw(ဖုတ္တန်းတော) khuami hna nih an chim. Minung zakhat reng lo in rallam a sialtu SAC ralkap hna nih August 2 ahkhan, Depeyin peng khua hna ah lut in khuami 50 reng lo cu an rak tlaih hna, tiah tualchung mi nih an chim.
Yesagyo Pengchung Khuate A Khangtu SAC Ralkap Kahdoh An Tong I 20 Hrawng An Thi, Magway ramṭhen, Yesagyo pengchung khuate a khangtu SAC ralkap 50 hrawng le PDF hna cu August 13 ah voi thum an i kap, tiah theih a si. Zinglei suimilam 6:30 ah voi khat, suimilam 10:30 ah voikhat le zaanlei suimilam 3:30 hrawng ah voi khat tiin nikhat chung ah kahdohnak voi thum a chuak, tiah kahdohnak ah aa tel ve mi Daung Ngyi Naung(ဒေါင်းညီနောင်) tualchung hriantlai phu hruaitu pakhat nih a chim.
Kaphnih kar kahdohnak ah SAC ralkap 20 hrawng an thi lai, tiah Daung Ngyi Naung(ဒေါင်းညီနောင်) tualchung hriamtlai phu hruaitu pakhat nih cun a chim. Cu kahdohnak ah cun Daung Ngyi Naung(ဒေါင်းညီနောင်) tualchung hriamtlai phu, Phoenix pah-kah-phah, YLK pah-kah-phah, Thwaythauk Revolution Force, Myingyan pah-kah-phah phu, Black Wolf PDF(MDY), Wlof Brothers, Yesagyo PDF, le Yelaykyun(ရေလယ်ကျွန်း) tualchung hriamtlai phu le Nagani(နဂါးနီ) pah-kah-phah phufonh hna nih an kahdoh hna, tiah theih a si.
AA le SAC Ralkap Kar Kahdohnak Ah SAC Ralkap 7 An Thi I, 6 Tlaih An Tong!: Nihin August 13, zinglei le zaanlei ah Rakhine ramkulh, Maungtaw(မောင်တော) chaklei le thlanglei, Yataetaung(ရသေ့တောင်) peng ah SAC ralkap le AA kar fak ngai in kahdohnak a chuak. SAC ralkap lei a thi an tam leng ah hriamthil zeimawzat kan lak khawh, tiah AA lei chimphuannak nawlngeitu U Khine Thu Khah nih a chim.
SAC ralkap le AA hna cu August 13 ah khan voi 3 an i kap i, kahdohnak ah cun SAC ralkap 7 an thi i, midang 6 tlaih an tong, tiah theih a si. Maungtaw (မောင်တော) thlanglei Wailatauk (ဝေလာတောက်) lei zong ah kahdohnak a chuak ṭhan i, hriamngan kah thawng cu zinglei suimilam 10:00 hrawng in zaanlei tiang kan theih, tiah Minkhamaung(မင်းခမောင်း) khuami pakhat nih a chim. Maungtaw(မောင်တော) thlanglei ah SAC ralkap nih ramri an hngahnak sakhan a um i, Rakhine ralkap he atu le tu ti tluk in kahdohnak a chuahnak hmun zong a si.
Yinmabin Peng Yinpaungtaing Khua Ah Ruak 8 An Hmuh! Sagaing ramṭhen, Yinmabin peng yinpaungtaing khua ah SAC ralkap an luh hnu in thah a tongmi ruak 8 hmuh an si. Cu lawng siloin SAC nih ralphaw ah an tlaihmi hna cu helicopter in nihin August 14 ah an kalpi hna, tiah khuami nih an chim.
Tuzing suimilam 9 hrawng ah Yinpaungtaing khua le Pule peng, Zuanaung khua cu helicopter pahnih nih suimilam cheu hrawng an rak kah hnu ah khuami ralphaw an tlaihmi hna le hliamtuar mi ralkap hna cu helicopter in an kalpi hna, tiah theih a si. SAC ralkap an kal hnu ah atu bantuk in khuami ruak 8 cu kan hmuh hna, tiah min langhter a duh lomi Yinpaungtaing khuami pakhat nih a chim.
Khuami pakhat nih cun, “Mei in an khanghmi milu 6 kan hmuh i, nu le pa an si cu kan thei kho rih hna lo. Hmundang zong ah nu pakhat ruak le ruak dang pakhat kan hmuh, SAC nih ralphaw ah an kalpi mi hna cu pazeizat an si theih a si rih lo,” tiah a chimchap. Thazaang 100 hrawng a simi SAC ralkap nih a luancia August ni 11 ah inn 100 hrawng simi Yinpaungtaing khua cu an rak luhhnawh i inn 20 leng cu an khangh.
Cupinah an saṭil le an thilri man ngei pawl cu an i kalpi hna, tiah theih a si. Tuzing tiang ah tualchung hriamtlai phu le SAC ralkap kar kahdohnak cu an dai rih lo atu tiangah tualchung hriamtlai phu lei in ralkap 5 hliam an tuar i, 10 an tlaih hna, SAC ralkap lei zong 30 leng an thi cang, tiah tualchungmi nih an chim.
Afghanistan ah Nu Pawl Nih Nuhrin Covo An Ngeih Khawh Nakhnga Lam An Zawh, Afghanistan ah Taliban nih uknak an tlaih kumkhat a tlin lai August 13 ni ah, nu pawl nih fimcawnnak, rianṭuan khawhnak le nawlngeihnak an hmuh khawhnak ding in lam zawhnak an ngei. Taliban uk duhlonak a langhtertu nu pawl nih cun August ni 15 cu, Muihnak Ni a si tiah catar i ken in Kabul khuapi, Fimcawnnak Zung lei ah lam zawh in an au.
Duhlonak a langhtertu nu pawl nih cun Taliban nawl chuahmi; hmaihuh ding timi nawl zong zul duh lo in hmaihup lo in duhlonak an langhter. Duhlonak langhternak ah aa telmi hna cu Palik nih tlaih ding in an dawi hna i an tukvelh hna pin ah an ṭhenṭhek dih hna, tiah mithmutu pakhat nih a chim.
Nu nih duhlonak an langhter mi kong cu media ah thanh lo ding in Taliban nih thawnglatu pawl kham hna. Zalong tein duhlonak a langhtertu hna cu thazaang hmang in an tukvelh hna caah thinphang ngai a si, tiah Amnesty International phu nih Twitter ah an tarlangh. US Ralkap nih Afghanistan ram cu a chuaktak hnu in, nikum August ni 15 thawk khan Taliban nih uknak an tlaih i, cu thawk cun Afghanistan ram ah nu nih rian ṭuan khawhnak le fimcawnnak nawl cu an rak phih.
Myanmar Ram Khuapi Cheukhat Ah Rikhiah In Datsi An Zuar, Mandalay telh in Myanmar ramchung khuapi hmun cheukhat ah rikhiah in datsi(petrol) an zuar, tiah theih a si. Rikhiah in zuarmi datsi(petrol) zong a cat deng cang, tiah tualchung mi nih an chim. Mandalay khuachung telh in Shan ramkulh, chaklei ah petrol rikhiah in an zuar caah datsi cawk a tim mi pawl cu artlang in an hngak hna, motor tampi zong datsi rawn ding in artlang in an dir.
Shan ramkulh chaklei Lashio, Muse, Naungcho khua hna ah datsi 1 litre ah Ks. 5000 hrawng a phan, tiah theih a si. Naungcho ah cun datsi a tlawm tuk cang caah petrol cu rikhiah in kan zuarpiak hna, tiah datsi zuartu hna nih an chim. “Atu lio ah cun datsi kan ngeihcia mi a tlawm tuk caah rikhiah in kan zuarh hna, cycle pakhat Ks. 3000 le motor ah Ks. 20,000 man tiang lawng kan zuarh hna,” tiah datsi zuartu pakhat nih a chim.
Sagaing Ramṭhen, Kabyu Khua ah Bomb Puahnak In SAC Ralkap 5 An Thi: Sagaing ramṭhen, Ayardaw peng Kabyu(ကဗျူ) khua ah ralvengtu SAC ralkap pawl cu nihin August 14 zing ah tualchung hriamtlai phu nih Drone in bomb an thlak hnawh hna, tiah theih a si. Thazaang 100 hrawng simi SAC ralkap pawl nih cun Kabyu khuami cu Covid raikhamsii an chun hna, cu lio ah ralvengtu SAC ralkap 10 cu zing suimilam 10 le minute 45 hrawng ah Drone in bomb kan thlak hnawh hna caah a hmun ah ralkap 5 an thi i, 4 hliam an tuar, tiah Minchain Zero phu in an lutlai pakhat nih a chim.
Mon Ramkulh Ah Ralzaam Dirhmun A Phan Mi Sing Khat Le Cheu An Luan Cang – KNU: Mon ramkulh, Thathon(သထုံ) peng le Bago ramṭhen, Ngyaunglaypin(ညောင်လေးပင်) pengchung, KNU hmunram ah SAC ralkap nih uknak an lak kum khat le cheu chung ah, ralzaam dirhmun a phanmi minung sing khat le cheu an um cang, tiah KNU nih nihin August 14 ah an thanh.
KNU brigade 1 hmunram, Thathon(သထုံ) le brigade 3 hmunram Ngyaunglaypin(ညောင်လေးပင်) ah ralzaam dirhmun phanmi dihlak cu minung 154,866 an si, tiah an thanhmi ah cun an langhter. Ralzaam dirhmun phanmi tambik an umnak Thaton peng ah sii-ai le eidin an herh bik tiah KNU Doetahtu(ဒူးသထူ) pengkomh chimphuannak nawlngeitu nih a chim.
Sagaing Ramṭhen, Taze Peng Kahdohnak Ah Pyusawhti 7 An thi I, Myine Zong Ah 11 An Thi , Sagaing ramṭhen, Taze peng Inkokka(အင်္ကုက္ကား) khua nichuahlei pyusawhti sakhan cu PDF nih drone in bomb an thlakhnawh hna i, Taze PDF phufonh nih an kah chap hna caah pyusawhṭi 7 an thi i, hliamhma tuar zong an tam, tiah Taze PDF nih an thanh.
Nihin August 14, zinglei suimilam 8:45 ah drone in bomb thlakhnawh a tongmi pyusawhti hna cu an zaam i, cu a zaam mi hna cu Taze PDF battalion 6, Taze pah-kah-phah le Guerrilla Warfare – KPK phu hna nih an kah hna. Kahdohnak ah cun pyusawhti 7 an thi i, hliamhma tuar zong an tam. Pyusawhti hriamngan hmanmi nih PDF chungtel 2 a hliamh hna i, an hlaimhma kong ah thinphan ding a um lo, tiah Taze PDF nih an chim.
Cu bantuk in, nihin August 14, zaanlei suimilam 4:50 ah Magway ramṭhen, Myine le Poah tualchung hriamtlai phufonh nih Myine thlanglei ah rallam sialtu SAC ralkap hna cu Pauk peng, Kantit(ကန်သစ်) khua le Htanppauk(ထန်းပေါက်) khua kar ah bomb lung 11 an puahhnawh hna caah SAC ralkap 4 an thi i, 2 hliamhma an tuar, tiah Myine tualchung hriamtlai phu hna nih an thanh.
A luancia July 26 lio ah Magway ramṭhen, Myine peng nichuahlei ah rallam a rak sialtu SAC ralkap 75 hrawng cu Reaper Column hriamtlai phu nih an kahdoh hna caah SAC ralkap 7 hrawng an thi i, hliamhma tuar zong an rak tam ngai, tiah tualchung hriamtlai phu nih an thanh.
Hpruso Peng Kahdohnak Ah SAC Ralkal 4 an Thi Hriamthil Zeimawzat kan Lak Khawh – KNDF: Karenni ramkulh, Hpruso(ဖရူဆို) peng ah rallam a sialtu SAC ralkap hna cu kan kah hna caah ralkal 4 ah thi, hriamthil zeimawzat kan lak khawh, tiah KNDF battalion 15 nih nihin August 14 ah an thanh. August 11 ah SAC no.14 raltuk cawnnak sianginn in Hpruso(ဖရူဆို) chuahlei ah minung thazaang 30 hrawng he rallam a sialtu SAC ralkap hna cu KNDF-Battalion 15 le KA nih an kahdoh hna caah SAC ralkap pakhat a rak thi.
August 13, zinglei suimilam 6:30 hrawng ah Hpruso(ဖရူဆို) khah-mah-yiah 531 in SAC ralkap 150 hrawng he Hpruso(ဖရူဆို) nichuahlei ah rallam a sialtu SAC ralkap hna cu KA le KNDF B-15 nih an kahdoh hna, ralkap 3 an thi hriamthil zeimawzat kan lak khawh, tiah KNDF lei nih an thanh. Kahdohnak chung ah KA le KNDF lei hliamhma tuar an um lo, tiah an langhter. Nihin August 14, zaanlei suimilam 6:30 hrawng in Hpruso(ဖရူဆို) ah fak ngai in kahdohnak a chuak, tiah theih a si.
Karenni Ramṭhen, Myawaddy Ah Phaisa Thlengtu Minung 5 Cu SAC Ralkap Nih An Tlaih Hna, Karenni ramṭhen, Myawaddy ah Thailand le Myanmar phaisa thlennak a tuahtu minung 5 cu SAC ralkap nih August ni 13 ah an tlaih hna, tiah theih a si. An tlaihmi hna chung ah a tam deuh cu Myawaddy no. 1 Chit Kyi Yae(ချစ်ကြည်ရေး) hlei pawng ah a um mi an si, tiah min langhter a duh lomi pakhat nih a chim.
Cu tlaihkhihnak ah cun Myawaddy sipin, palik le SAC ralkap hna an i tel, tiah theih a si. An tlaih hna nak a ruang bik cu Myanmar phaisa thlen rate nan tlakter tiin sual an puh hna, tiah khuami pakhat nih a chim. Tlaih a tongmi hna chung hin phungning loin phaisa thlennak a tuahtu zong an i tel, phungning tein (license ngeimi) a thlengtu zong an tlaih ṭhiam hna, tiah a chim chap.
Thailand le Myanmar pehtlaihnak hmun pakhat a simi Myawaddy ah cun August ni 14 tiang ah Thailand phaisa Baht 1275 ah Kawlram phaisa Kyats 100,000 in an thlen, tiah theih a si. Nihin August ni 14 zong ah SAC ralkap thazaang 20 tluk nih checkhlatnak an tuah, tiah theih a si. Yangon zong ah phaisa thlennak a tuahtu pawl cu SAC ralkap nih tlaih ding in an kawl len hna, tiah theih a si. Nihin Aug 14 phaisa an thlennak man cu; US $ 1 ah Kyats 3000, Thailand Baht 1 ah kyats 75 a si, tiah phaisa thlengtu hna nih an chim.
Leave a Reply