Dec 30, tuni zinglei ah a chuakmi

Dec 30, tuni zinglei ah a chuakmi Laykaykaw kahdohnak ah ralhrang ralbawi (တပ်ခွဲမှူး) telh in ralhrang 7 hna cu an hriamnam he KNU ralkap KNLA nih an tlaih hna tiah theih a si. Mawṭaw sawhsawh he an umnak an i ṭhial lio Yatehko khua ah an tlaihmi hna a si tiah Karen Information Center (KIC) nih a ṭial.

KNLA ralkap pakhat nih “Tuzing kahdohnak ah kan tlaih hna, ralhrang 7 an si. Tetkhuaihmu pakhat aa tel. A dang cu ralhrang sawhsawh an si. Cunglei upa hna sinah kan ap cang hna” tiah KIC ah a chim. Kan hnulei Dec 16 i Laykaykaw kahdohnak zongah ralhrang khah-mah-yiah 275 in ralhrang 6 le BGF 2 cu KNLA le nih an rak tlaih bal cang hna. Cu an tlaihmi hna cu harem le vuak um loin ṭha tein zohkhenh an si tiah KNU nih a thanh.

Ralhrang nih nawlngeihnak an lakmi duh lo langhternak ah aa telmi lemcang Pyi Ti Oo, a nupi Eaindra Kyaw Zin, Lu Min, Yee Htaih hna cu Dec 30, tuni ah thong chung i ralhrang biaceihzung nih rianhrang ṭuan le kum 3 thongdan dantatnak a tuah hna tiah theih a si.Pyi Ti Oo le Eaindra Kyaw Zin cu Feb 1 i ralhrang nih nawlngeihnak an lakmi duh loin lamzawhnak ah an i tel ruangah ralhrang nih,.

Pohmah 505 in taza an cuai hna i April thla thawk ah khan anmah inn ah an tlaih hna. Cuticun Insein thongah an khumh hna i an tlaih hna in thla 8 a rauh hnuah atu bantukin dantatnak an tuah hna hi a si. Lu Min le Yee Htaih zong hi nawlngeihnak an lakmi duh loin lamzawhnak i an i tel ruangah pohmah 505 in tazacuai in tlaihmi an si. Lu Min hi March thla ah an tlaih i Yee Htaih hi April thla ah an tlaihmi a si.

Eaindra Kyaw Zin cu Insein thong chung a um lioah Germany ram ah an tuahmi Film Festival ah “What Happened to The Wolf” timi movie in nu lemcang thiam bik laksawng an pek. Cu lawng si loin ralhrang nih nawlngeihnak an lakmi duhlo langhternak ah aa telmi hlasakthiam Saw Pho Khua, Po Po le make-up thiam Win Min Than hna zong kum 3 thongdan pek an si ve tiah BBC Burmese nih a ṭial.