Dalan Thah Ruangah Ralhrang Nih Veng Chungmi Minung 16 Thihdan A Pek Hna

Martial Law thanhnak Rangon ramthen North Okkalapa peng ah leirawitu (dalan) an si tiin chungkhar pakhat thah ruangah veng chungmi minung 16 hna cu SAC nih June 21 ah khan thihdan a pek hna tiah theih a si.

Dalan tiah ruahmi hna cu U Sein Moe le a fapa pahnih, Ko Aung Moe Hein le Htin Khanh Moe Hein hna an si i March 15 ah khan an inn ah nam tuknak hma he an ruak in char an si.

Hi pafa pathum thah an si hnu tlawmpal ah an umnak veng chungkhar 7 in pa 6 le nu 2 cu ralhrang nih an tlaih colh hna i midang 9 cu tlaih dingin an thanh. Ralhrang biaceihzung nih thla 2 renglo an buaipi hnuah an tlaihmi minung 8 le tlaih dingin an thanhmi 9, an dihlak mining 17 chungin 16 cu mithah lainawnnak phung dal 302 (1)/34/436 ningin thihdan pek an si. Pakhat tu cu mithahnak ah bawmtu a si tiin kum 7 thongdan an pek ve.

Thihdan an pekmi hna chungah 9 cu an tlai kho rih hna lo. A ngainai tiah cun atu tiang pafa pathum a thattu taktak an thei lo. Atu i thihdan an pekmi hna he hin hmasa zongah buainak tete an ngeih cia cang caah khan atu bantukin bia an ceihmi hna a si tiah thihdan an pekmi pakhat i a chungkhat nih an chim.

The Chin Post

Be the first to comment

Leave a Reply

Your email address will not be published.


*