Chin ram kulh Paletwa pengah AA le SAC ralkap karlak kahdohnak a chuak tiah theih a si., May 26 sml 10:00am hrawngah Paletwa pengah AA le SAC ralkap karlak kahdohnak a chuak, an i kahnak khua tak hi Paletwa peng ABawngta khua ah a si tiah khuami pakhat nih BBC News sin ah a chim. “Atutiang an i kap peng rih ko. Paletwa ah a um mi SAC ralkap bu 287 nih hriamngan in an hei kah ve hna. AA he an i kah nak hi Paletwa khuapi in suimilam 1 chung kal hrawng a si” tiah Paletwa khua mi nih cun a chim.
Rakhine ram ah 2020 November thla hnu in SAC nih a ralkap thazaang a tthawn ter chin lengmang caah AA nih cun zeitin caan poh ai kap kho kan si tiah an chim. Cun SAC chimnak nawlngeitu Zaw Min Tun nih Rakhine ram AA nih a kan ngiar tiin kahdohnak a um ahcun SAC kan mawhthluk hlah tiah a chim ve. Cu ti an i ti tlawmpal ah AA le SAC karlka kahdohnak a chuak colh. Ref:BBC
Karenni ram ah ralhrang thawngpetu Dalan tiin lunghrinh ruangah rak tlaih mi hna cu tuchung May 26 ni ah thlah tthan an si tiin KSCC nih an langhter. Karenni ram ah Dalan ti i lunghrinh ruangah tlaih mi 126 chung ah minung cio zangfah zawnruahnak he minung 24 cu biakamnak tuahter hnu ah thlah an si.
“Tha tein kan hlathlai hna, bia kan hal hna hnu ah hi hna cu zei sualnak ngaingai hmuh an si lo. Cun sualphawt in thongthlak hmanh si hna sehlaw kan tlaih hna chung a sauh cang caah an thong in an chuah caan hmanh a tling cang men lai caah tutan ah zawnruahnak he kan thlah hna hi a si” tiah KSCC in chimnak nawlngeitu nih Myanmar Now sin ah a chim. Tutan ah an thlah mi 24 hna hi thla hlawh ei, ni ca in siseh a cozah rianttuan an si hna, dawr tuah mi zong an um, 80% cu Naypyidaw, Mandalay ramtthen, le Magwe ramtthan in an si hna, 20% tu hi Loikaw khuasa an si tiah a chim chap.
An tlaih mi hna hi an sining ai khah lo caah a cheu cu thla 2 , a cheu cu thla 1 lawng zong kan tlaih mi hna an um tiah a langhter. A tang rih mi 102 chung ah hin cun Dalan zong an um, misual zong an um, cun SAC ralkap a cohlang tu an miak nak ding ah rian a ttuan piak tu zong an um hna, mi fir zong an um, rithaisi a zuar mi zong an um hna tiah a chim chap. Dalan tiin lunghrinh in tlaih mi cheukhat cu an hlathlai hna i an sual kan hmuh lo cun ni 3-4 hnu zong ah kan thlah tthan mi an um ko tiah a chim.
“Ralhrang lei ah an dir ahcun mipi kan mah le mah kan i thah tluk a si. Ralhrang lei ah a dir, rian a ttuan ahcun kan tlaih ko hna lai, phungning tein sualphawt an si ko lai tiah KSCC in chimnak nawlngeitu nih cun a chim. Ref; Myanmar Now
SAC ralhrang he kahdohnak ni 10 chungah SAC ralhrang minung 30 hrawng an nunnak a liam i, Shan mipi vunventu lei in minung pa 4 nih ram le miphun caah an nunnak an peek nak kong cu Shan chak lei 1008 tatyin nih May thla ni 25 ah thanhnak a tuah. SAC ralhrang ralkap le a kuttang a si mi PNO phu fonh he Shan chak lei mipi runventu ralkap hna cu May thla ni 15 thawkin kahdohnak a chuak tiah theih a si.
Ni 10 chung kahdohnak he pehtlai in Shan chak lei phu 1008 tatyin pakhat a si mi nih kahdohnak theihter nak a tuah i mipi lei nih bomhnak peek ding zongin theihternak an tuah tiah theih a si. ” Ni 10 chung kahdohnak chungah SAC ralhrang leiin minung 30 nak tlawmlo an nunnak a liam i, kan mah lei 1008 tatyin lei in minung pakhat, Phekhung PDF in minung pa 2,
KNDF BO-3 in minung pakhat an zaapiin minung pathum nih ram le miphun caah an nunnak an peek. Ram caah a nunnak an peek mi ralkap pawl cu chungkhat ngaihchuatpinak kan hrawm ve hna i, ukpatnak sang bik kan peek hna. Phekhung nichuah lei ah a um mi ralzaam minung 10000 leng caah zongah bomhhal kan duh hna tiah.” mipi ralkap in minung pakhat nih a chim.
Shan ramkulh chaklei Phaekhung(ဖယ်ခုံ) peng nichuahlei Similawh(ဆီးမီးလော့) khua thlanglei SAC ralkap sakhan cu Karenni ralkap phufonh nih May 24 zinglei ah kan lakkhawh tiah Phaekhung PDF battalion 2 nih an chim. May 24, zinglei suimilam 4:00 hrawngah SAC ralkap sakhan cu Karenni ralkap phufonh nih luhhnawh in kan lak, SAC ralkap cu hnu an tolh tiah Phaekhung peng PDF battalion 2 in chim phuannak nawlngeitu pakhat nih RFA ah a chim.
Phaekhung peng nichuahlei SAC ralkap sakhan cu KNDF battalion 2,3,11,14 le KA, SSRY, Phaekhung PDF battalion 2 phufonh nih ni 10 chung kan kah hna, Cu kahdohnak chungah cun SAC ralkap 30 an thi, KNDF battalion 03 in ralkap pakhat, Phaekhung battalion 2 in pakhat tiin tualchung ralkap phu lei in minung 2 an nunnak a liam tiah KNDF Battalion 03 nih May 24 ah an thanh.
Leave a Reply