Philippines ram Ministry of Health nih cun COVID-19 raikhamsii a hleivuang mi pawl cu Myanmar ram le Papua New Guinea ram an pek lai, tiah theih a si. Philipines nih cun atu hnu thla 3 ah chunh caan luan ding COVID-19 raikhamsii dose nuai 27 tluk a ngei rih i, cu lak ah hnarcheu cu Myanmar ram le Papua New Guinea ram pek a timh.
“COVID-19 raikhamsii a hlei mi dihlak cun kan pe hna lai lo. Anmah lei nih zeizat dah an herh i kanmah lei nih zei tuk dah kan bawm khawh hna lai, ti mi zoh chunh in kan pek hna lai. kan check cuahmah lio a si,” tiah Philippines ngandamnak lei in chim phuannak nawlngeitu Maria del Rosario nih a chim.
Philippines ram ah hin minung milu nuai 110 an um i, nuai 66 cu COVID-19 raikhamsii an i chun cang. Cu lak ah cun nuai 12 cu a voithumnak an i chun cang, tiah theih a si. COVID-19 raikhamsii aa chun rih lo mi minung nuai 40 an um rih nain chunh caan a luan hlan ah chunh ding in aa relrem lo ruang le harnak dangdang a um ruangah ramleng pawl pek ding, tiah Philippines nih timhtuahnak a ngeihnak hi a si.
March thla dongh tiang cazin lak mi ning ah Myanmar ram ah COVID-19 raikhamsii aa chun cang mi hi minung nuai 26 hrawng an um i, Myanmar ram milu hnarcheu an i chun cang tinak a si. Milu nuai 9 hrawng umnak Papua New Guinea ram ah cun minung 3% tluk lawng COVID-19 raikhamsii aa chun mi an si rih i milu sing 3 tluk lawng nih raikhamsi an i chun rih. Papua New Guinea ram ah siibawi 500 hrawng lawng an um i nurse an tlawm tuk, tiah theih a si. Cred : The Chin Post
Leave a Reply