Covid-19 Sii Aa Chunh Rih Lo Mi Paoh Paoh Dantat Nan Si Lai Tiah Paungde Pengkulh SAC Ralhrang Phu Nih Ralring An pek
Covid khamhank sii aa chunh lomi nih Covid zawtnak an karh ter a si ah cun Kokek harnak Upadi ningin dantat nan si lai tiah Paungde pengkulh SAC ralhrang phu nih ralring an pek. Cu ruangah Covid khamhnak sii aa chunh rih lo mi hna nih i chunh ding, Paungde pengkulh ah April ni 22 in Covid khamhnak sii chunhnak hram an thawk cang tiah theih a si.
” Sii aa chunh rih lo mi an um. Cu ruangah ralring pek nak caa an chuah mi hi a si lai. Kan nih cu voihnih kan si chunh cang. Khamnak sii a si caah tlawmpal tal cu an kan khamh khawh lai tiah kan ruah caah kan i chunh. Voithumnak cu kan i chunh ti lai lo” tiah Paungde khuami pakhat nih a chim.
Paungde khuapi ah covid khamhnak sii chunhnak cu April ni 30 tiang chung a si lai i Kum 15-18 kar, kum 18 cung paoh paoh sii chunh a si lai nak kong, Sii chunhnak certificate ngeih lawng ah zalong tein khualtlawn khawh a si lai tiah theih a si.
Matupi Khua Bank Hngak SAC Ralkap 2 An Hriamnam He An Zaam! Chin ramkulh, Matupi khuachung Myanmar Economic Bank security hngaktu SAC ralkap 2 cu April 22 ah an hriamnam he an zaam i April 22 chun ah SAC ralkap pawl nih Matupi khuachung ah chekfelnak ṭha tuk an tuah. Khua luhchuahnak hauka ah SAC ralkap nih thazaang an chap pinah tualchung mi cheukhat zong an tlaih hna. Khuachung in khualeng lei ah hriamngan voi tam ngai an kah tiah theih a si.
April 22 zing sml 10:00 hrawng ah Matupi-Paletwa tlawnlam ah SAC ralkap pawl cu CDF-Matupi nih an kah hna i 6 an thi, 7 hliam an tuar. Matupi- Paletwa tlawnlam um mi khuate cheukhat hna cu ramtang ah an zaam hna i SAC nih an inn an bauh i an duhmi thilri paoh an laak.
Sagaing Lei Ah Rallam A Samh Mi SAC Ralkap Le Ṭangrual Phu Kahdohnak Ah SAC Ralkap 13 An Thi, Mandalay in Sagaing lei ah nizaan April 21 ah thazaang chap in rallam a samh mi SAC ralkap motor le palik motor hna cu nihin April 22 zinglei ah kahdoh an si i SAC ralkap 13 an thi, tiah tualchung mipi vengtu ralkap nih an thanh. April 22 zing Sml 10:00 Mandalay-Monywa lam, Monywa in Minmu lei kalnak Koipintaw(ဂွေးပင်တော) khua le Bo Mingyi Kin (ဘိုးမင်းကြီးကင်း) kar ah motor pahnih in a kal mi SAC ralkap 20 hrawng cu Myaung-PDF le CDSOM nih bomb an puah hnawh hna, tiah theih a si. Bomb lungli aa thuanh mi bomb in puah an si i, motor hmailei le a sirlei a rawk. SAC ralkap 8 an thi i, a dang 15 cu an zaam. Cu hnu ah Bomb lung 11 in puahhnawh an si ṭhan i SAC ralkap a thi mi an tam ngai ngai, tiah Myaung- PDF le CDSOM nih thawng an thanh.
Cun, April 22 zing Sml 11:00 ah Sagiang in Monywa lei ah a kal mi palik motor 24 aa zul mi cu Minmu peng, Wonpyae(ဝမ်းပြည့်) le Allakappa(အလ္လကပ္ပ) khua karlak ah bomb puah hnawh an si i motor pakhat a rawh lengah palik 5 an thi, tiah DK PDF-MUU nih thawng an thanh. Minmu peng kahdohnak ah hin Minmu khuapi ah dirh mi DK PDF-MUU, Blak Eagle Defense Force MUU, CDSOM (Myaung), PAFD le ṭangrual phunga i bawn in an kah hna, tiah theih a si.
Leave a Reply