Falam khuapawng ah ralhrang motor 9 bomb puahhnawh in an hrawh: Chin ramkulh Falam peng Taal khuapawng i ralhrang nih umhmun an khuarnak hmunah ralhrang motor 9 cu nizaan October 17 zaan ah CNF, CNDF, CDF phukomh hna nih bomb puahhnawh in an hrawh tiah theih a si. Hramhram nawlngeihnak latu ralhrang motor 60 hrawng cu October 13 zinglei ah Falam in Hakha lei ah an chuak nain nihin tiang hmai fong kho lo in phih le kham an tong. CNDF biachimnak nawlngeitu nih “Nizaan ah Taal khuapawng ah ralhrang hna motor 9 cu hrawhpiak an tong, cheukhat motor cu a kee dihlak a tlong mi zong an um, a thimi cazin tu cu fianghlang in theih a si rih lo.
Nihin zinglei ah Falam khua in hriamngan in voihnih an vun kah, cun vanlawng zuan thawng zong kan theih ” tiah a chim. October 14 ni zong ah Chin ralkap hna nih ralhrang motor 7 cu bomb puahhnawh in an hrawh tiah Zalen nih a tial. Hlasakthiam minthang Ko Gyapoh cu a nu le pa nih an fa sinak in an hlawt: Hlasakthiam minthang Ko Gyapoh cu a pa hlasakthiam minthang Yingo le a nu Daw Mon Mon Kyaw hna nih an fapa sinak in kan hlawt cang tiah October 18, tuni ralhrangbu kuttang thawngthanhca Kyaemung ah an langhter.
Cu cathanh chungah cun an fapa Han Htoo Lwin cu nu le pa cawnpiaknak chungah um duh lo in amah duhning teinn inn a chuahtak caah nihin thok in kan fapa sinak in hlawt a si cang, cun hmailei zongah amah kong he pehtlai in zeihmanh tuanvo kan ngei lo tiah sihni pakhat nih sin in cathanh an chuahmi ah an langhter. Hlasakthiam Gyapoh@Han Htoo Lwin cu amah kut tein Doodle Art a suaimi Ukulele guitar cu zuamcawh in zuarnak a tuah i nizaan zaan ah vawleicung a sangbik man pek in an cawk.
Cu zuamcawh nak in hmuhmi phaisa cu NUG cozah sin ah pek a si lai tiah theih a si. Hlasakthiam minthang Ko Gyapoh cu ralhrang uknak duhlo langhternak cawlcanghnak ah a tel mi a si caah ralhrangbu nih pohmah (504)(a) in tazacuai a si nain, nihin ni tiang ah a umnak hmunhma in ralhrang uknak dohnak ah a tel peng mi ramchung minthang pakhat a si. Ref: The Irrawaddy Nizan October 17, 2021 Zarhpi Ni ah khan Auto-rickshaw Association, Sangau nih ralzam hna bawmhnak ah phaisa 8000, cite le chiti an pek: Auto-rickshaw Association, Sangau hna hi October 11, 2021 ah khan charity service an rak ngei cang. Hi charity service hi ralzam bawmhnak ah an rak tuahmi a si.
Hi lio i an phaisa hmuhmi cu Pangkhua, Sangau-1, Sangau-2, Sangau-3 le Sangau-4 chung i aa dormi hna sin ah an pek. Auto-rickshaw Association, Sangau tang ah hin member 20 an um lio i, tukum chung cu ralzam ca ah Auto-rickshaw hman man 50% an thumb piak hna. Mizoram ah Chin ram in a lutmi ralzam an karh: Chin state ram chung ah ralhrang tampi an luh hnu in Mizoram ah ralzam an karh. Ralhrang nih hin mipi inn le biakinn an khangh leng ah bomb zong a hman i, CNA hmunpi Victoria camp zong fakpi in an kah lai, tiah thawng an theih caah naite ni 4 chung hrawng ah khan Mizoram hmunkip ah ralzam an karh ngaingai.
Tuipuiral Group YMA president Pu Lalramenga sinin bia kan theih ning ah tunai ni 4 chung ah khan ralzam 187 in an karh. Tuipuiral Group YMA ram chung khua 21 ah ralzam 2,627 an um lio. Hilio ah hin Champhai lei zong ah ralzam an rak karh ve. Champhai Khuapi chung lawng ah ralzam 3,000 hrawng an um lio ve. Champhai District pumpi ah ralzam 6,000 hrawng an um, tiah thawng kan theih. Mizoram hmun dang bantuk in Hnahthial district lei zong ah ralzam an karh ve thiamthiam. Atu tiangah ralzam 2,235 an um cang. Thingsai khua ah 900, Cherhlun ah 168, Bualpui H ah 151, Hngarchhip ah 162, New Hngarchhip ah 439, Tarpho ah 92, South Chawngtui ah 25, Khawhri ah 68, Tuipui D 35, South Vanlaiphai ah 8 le Hnahthial ah 187 an um lio tiah theih a si. By. Tluanga Zathang
Leave a Reply