CNF/CNA Ralbawi Thet Ni a biachim mi
===================================
Tutan dothlennak hi kan Chin miphun le tlangcungmi ca’h cun, chance thatak a si. Tutan dohthlen nakah, kan Chin miphun nih kan i timh mi kan ngah khawhlo ahcun, hibantuk chance tha hi kan hmuh than lai ka zumh lo. Cuca’h kan miphun pi in dohthlen nak ah, kan ni tel dih a herh ko.
Mi tlawmte asi mi Chin miphun nih dohthlennak hi, hrial hlah usih, hi buainak hi chance tha lak i kan miphun that nak ca ah, nawr kan herh. Mah pumpak hlawk nak tu kawl hlah usih. Kan ttuanbia a dawh sual lailo. Ral hi a fak chin lai. Kum 2023 August ah election tuah a timh mi a nam cuah mah.
Cu ti a tuah hnu lawng ah international community nih recognize an ka tuah te lai ti hi Min Aung Hliang aa timh mi asi. Cucu atlam tling khawnak ca ah နယ်မြေ ငြိမ်းချမ်းရေး ti in EAO le PDF CDF hi akan kah taktak cang hih. Kan ralkap kan mipi an thisen a luang i, nunnak a liam cuah mah cang.
Kan inn le kan lo kan sung thluahmah cang. Celh ding silo. Cu ca’h kan pil lawlaw ve lai. A hohmanh i laklawh le lung awtawm in um hlah uh sih. Kan lung i rual seh! Kan ram le miphun nih damnak le teinak kan hmuh hlan chung hmai lei nawr chinchin hna uh sih. Crd-Salai Sang-Chinland Club Of USA
RElchap, Nihin August 20, zaanlei sml. 4:30 hrawng ah Timit lam lei ah SAC ralhrang le miphun ralkap karlak kahdohnak a chuak tthan, tiah thawngpang kan theih. “Hakha in SAC ralhrang motor pakhat a chuak i ralkap pawl a vung chiah hna rua. Mah motor cu tunai ah khan Hakha lei ah a lawng in a rak kir tthan cang. Timit lei ah ralhrang motor a kal hnu tlawmpal ah kahdohnak a chuak colh,” tiah minung pakhat nih thil sining a chim.
Tukar hrawng Hakha khuachung le Timit lei ah SAC ralhrang le miphun ralkap karlak kahdohnak pehzul in a um. August 17, zaan sml. 9:30 hrawng ah khan Hakha BOC ah minung 10 chung hrawng kap hnih kahdohnak a rak chuak. Cun, nizan August 19 zinglei sml. 8:30 hrawng zong ah Rual-U thlaan pawng hrawng ah i kahdohnak a chuak. Rual-U thlaan pawng kahdohnak ah SAC ralhrang a tlawm bik minung 5 an thi lai, tiah an zumh.
Mizoram Ah Myanmar Mi 2 Sin In Rithaisi An Tlaih Ṭhan! India-Myanmar ramri Mizoram ramkulh, Champhai peng ah August 19 ah Myanmar mi 2 sin in rithaisi le bing 14 gram kan tlaih, tiah Mizoram rithaisi khamtu phu nih an thanh. Rithaisi he tlaih a tongmi Myanmar mi 2 hna cu Tedim peng, Thinglei khuami Thang Sian Khai, kum 26 le Zam Lam Sum, kum 24 an si.
Tlaih a tongmi pa pahnih nih cun 125 Kenbo cycle in rithaisi cu an phorh i, lampi ah an tlaih hna, tiah theih a si. August 18 zong ah khan Champhai ah, bing 65.52 gram cu Mizoram mi pakhat sin in an tlaih, tiah theih a si. Tlaih a tongmi hna cu Upadi ning in an sualkawl a si.
Kalaymyo Ah SAC Ralkap Nih Pyituhsit Sin Ah Cycle 120 An Pek Hna! Kalaymyo ah SAC ralkap nih anmah lei a ṭangmi pyituhsit pawl sin ah nizan August 19 ah motor cycle 120 an pek hna, tiah SAC kong thawngthanhnak a tuah tawntu telegram le social media hna nih an ṭial.
Kalaymyo Regional command headquaters Aung San Hall ah nizaan August 19 ah biaruahnak an ngeihpi hna i motor cyecle(125/110) cu an pek hna, tiah theih a si. Cu bantuk in nihin August 20, Magway ramṭhen, Pakokko peng zong ah Pyituhsit hna cu SAC ralkap nih motor cycle an pek ve hna, tiah SAC ralkap lei ṭangmi telegram nih an țial.
Pauk Peng Ah Umhmun Khuarmi PDF Sakhan Cu SAC Ralkap Nih An Khangh Caah Ks. Sing 500 Man Hrawng A Ciam! Magway ramṭhen, Pauk peng ah umhmun khuarmi PDF sakhan cu SAC ralkap nih an khangh caah thilri kyats sing 500 man hrawng a ciam, tiah Pauk Regional Defense Force(PRDF) nih cathanh an chuah. SAC ralkap pawl cu Pauk Regional Defense Force sakhan an luhnawh lio ah kaphnih kar kahdohnak a chuak.
Kan sakhan cu kan venghim kho lo nain, a thimi le aa hliammi cu kan um lo, tiah PRDF nih an langhter. Sakhan an hrawhmi hi kyats sing 500 man hrawng a si, tiah PRDF nih an ruah damh. An langhtermi hmanthlak ah motor pakhat le cycle tam ngai an kaang.
Kan sakhan cu mizapi an i ruahchannak hmunhma a si. Ṭha tein kan dir khawh ṭhan nakding le Federal Demicracy kan hmuh khawh nakhnga bawmhnak tampi kan herh rih. Kan page zong in bawmhnak pek khawh kan si, tiah PRDF nih nawlnak le bawmhalnak an tuah.
SAC ralkap nih August 17 lio ah Pauk peng chaklei Chaizoh khua le thlanglei Chaizoh khua an rak khangh caah sianginn telh in, inn 70 hrawng an rak khangh, tiah tualchung mi nih an chim. SAC ralkap pawl cu Pauk peng le Myaing peng ah August thla hram thawk lio ah khan rallam an rak sial i, PDF nih an rak kah hna.
A Ra Lai Mi Thla 6 Chung Ah SAC Ralkap Nih Kadohnak Fakpi An Tuah Khawh – CDM Ralbawi: Uknak latu SAC ralkap nih a ra lai mi thla 6 chung ah van lei le vawlei lei in kahdohnak fak ngai an tuah khawh, tiah CDM tuahtu ralbawi hna le ramkhel lei hlathlaitu hna nih an chim. Mizapi nih thim mi cozah cu thlak in, ralkap uknak a latu SAC nih a luancia July 31 ah khan ralkap uknak cu thla 6 an rak chap.
CDM tuahtu ralbawi(captain) Lyin Htet Aung nih cun, “SAC ralkap nih rampi thimnak an tuah khawh nakhnga, a ra lai mi thla 6 chung ah dohthlennak tuahtu hriamtlai phu hna cu hriamnam tlangtlang in an kah khawh hna, kahdohnak fak ngai an tuah khawh,” tiah a chim.
Ngatayaw Khua Cu SAC Ralkap Nih An Khangh Caah Inn 500 Leng An Kaang Cang! Magway ramṭhen, Yesagyo peng, Ngatayaw khua inn 600 hrawng umnak cu SAC ralkap nih an khanghpiak hna caah inn 500 leng a kaang. Khuami hna cu a rannak in bawmhchanh an herh ko, tiah Yesagyo peng tualchung hriamtlai phu Yesagyo PDF chungtel Wai Kyi nih mipi sin ah a chim.
SAC ralkap le pyusawhṭi hna cu August 17 ah rak lut in, Yesagyo peng, Ngatayaw(ငတရော်) khua ah cun umhmun an khuar, inn 600 hrawng umnak khua cu a khuapi ning awk in an khangh, tiah theih a si. “Ngatayaw khua ah cun nihnih chung an caam i, cu hnu ah khuachung in le lo cu an khangh. Thilri zong zeihmanh a taang lo, an ciam dih.
Caw, rang, innzuat saṭil hna zong mei nih a kangh dih hna. Chungkhar 500 renglo cu umnak an ngeih ti lo caah, ralzaam sakhan ah an um hna,” tiah PDF chungtel Wai Kyi nih a chim. Ralzaam dirhmun in a ummi Ngatayaw khuami hna cu Yesagyo peng tualchung hriamtlai pah-kah-phah phu nih eidin tirawl an rin chung hna, tiah theih a si.
Mandalay Ramṭhen, Ngazun Peng Magyi Khua Inn 62 A Kaang! Mandalay ramṭhen, Ngazun peng Magyi khua komh, Magyi khua cu nizan August 19 zinglei sml 1:00 hrawng in a kaang, tiah mi bawmchantu phu sinin theih a si. “Mei a chuahnak hramthawk cu U Ban Tin, kum 56 rawlchuannak coka in a si, Meikang ruang ah hin Ngazu khua inn 62 a ciam,” tiah Mandalay meithat zung in ṭuanvo ngeitu pakhat nih a chim.
Cu inn kaangmi ruangah thilri a rawkmi hi buaktlak in kyats 358,5000 man a si, tiah Ngazun meithat zung nih cathanh an chuah. Inn kanghnak ruangah khuami; pa 114 le nu 137, an dihlak minung 251 cu Magyi khua sianginn le Laymyathna (လေးမျက်နှာ) phura umnak pawngkam ah caan karlak an um i, an zohkhenh hna, tiah theih a si. Mei kangh hram aa thawknak in ngeitu U Ban Tin cu upadi ning in taza an cuai, tiah theih a si.
Kawkareik Khua Chung Um Zung Hna Cu Rikhiah Um Loin An Khar Cang! Kawkareik khua chung ummi zung hna cu, ni caan rikhiah um loin an khar cang, tiah theih a si. “Zung cu rikhiah um loin an khar cang. Asinain zung kharnak kong cu langsar tuk in an chim duh lo. Chikkhat caan te lawng kan khar lai an ti. Cheu khat cu zung in an chuak cang, cheu khat cu an vaivuan ko,” tiah zung rianṭiantu he naihniam mi pakhat nih a chim.
Atu lio Kawkareik khua le khuate lei kalnak lam vialte cu SAC ralkap nih an kham dih cang. Mi lutchuak le khualtlawngmi hna zong check hlatnak an tuah hna. Kawkareik khua chung ah zan sml 6:00 hnu in leng chuah khawh a si ti lo, tiah theih a si. “SAC ralkap pawl cu khua chung ah an um i, anmah le anmah an i sik, an i velh sual ahcun tualchung mi zong an kan hrem, an kan tlaih sual lai ti hi phan a um ko,” tiah Kawkareik ummi pakhat nih a chim.
Kawkareik khua um palik sakhan kah an ton hnu ah Kawkareik khua pawngkam hrawng ah kahdohnak pehtlai in a chuak. Nizan August 19 zanlei zong ah kahdohnak thawng a thang ko, tiah a chim chap. Kawkareik palik sakhan kah an ton hnu in SAC ralkap nih khuate cheukhat cu hriamngan in an kah. SAC ralkap nih hriamngan in an kah tuk caah Kawkareik um Non- CDM pawl cu, khua chung in chuak dih ding in Karen hriamtlai nih an theihter hna.
Yangon, Kyi Myin Daing Peng Puahkehnak Ruangah Mino 6 An Thi, Yangon ramṭhen, Kyi Myin Daing(ကြည့်မြင်တိုင်) Setsan sang um, zupu(ခေါင်ရည်) dawr pakhat ah nizan August 19 zanlei sml 5:00 hrawng ah puahkehnak a chuak i, mino pa 6 an nunnak a liam, tiah theih a si. “Mino pawl cu pumpululh an chuih dih an ṭin lei ah zupu dawr ah an ṭhu pah. Cu lio ah bomb cu a puak i, pumpululh thuam he an ruak cu kan char hna. A thimi hna hi kum 18 a tling rih lomi an si,” tiah bomb puahnak sang ummi pakhat nih a chim.
Zupu dawr ngeitu pa cu a zaam i, a nu cu SAC ralkap nih an tlaih, tiah theih a si. Kutser bomb puah sual nakin a thimi hna hi Pyusawhti an si lai, tiah a ruatmi an tam nain bomb puahnak sang ummi hna nih anmah sangmi an sinak kong cu an langhter. Cun, an thih hnu ah ‘Pyusawhti an si’ an ti hna caah an lungfahnak kong zong sangchung mi nih an langhter chih.
News Of Myanmar min in Telegram ah, “Yangon ramṭhen, Kyi Myin Daing peng Setsan sang ah zanlei sml 5:00 hrawng ah puahkehnak a chuak i, ralhrang 1 a thimi an hmuh. Ralkap nih puahkehnak hmun an va zoh tikah inn pawng ah ralhrang ruak 5 an hmuh chap. Dawr ngeitu pa zing a zaam,” tiah an ṭial. Cuti an ṭialmi cu thawng dik lo ngaingai a si. Puahkehnak ruang ah nunnak a liammi hna hi sualnak ngei lo, kum tling lo mino an si, tiah tualchung mi hna nih an chim.
Rampi President Si Ding In Term Hnih Tiang Ṭuan Khawhnak Lam A Um – Min Aung Hlaing, Min Aung Hlaing nih upadi ning in Myanmar ram President si ding in term hnih(kum 10) chung ṭuannak lam a um, tiah UN palai a chimh, tiah SAC nih cathanh an chuah.
An cathanh chung ah Min Aung Hlaing nih, Myanmar ram hi zeitluk in dah a ṭhat khawh chung in a hruai, zeitin dah a ṭhanchon khawh lai timi lungput in a ṭuannak kong an langhter. A ra laimi caan chung ah rampi thimnak a um cang lai. Thimnak kongkau ah zung rianṭuan hna nih an tawlrel lai.
Upadi ning in Myanmar ram President hi term hnih chung ṭuan khawh a si. Thimnak ah teinak a hmumi nih President cu term hnih tiang an ṭuan khawh, tiah a chimnak kong zong an langhter. An cathanh chung ah Min Aung Hlaing nih President ṭuan te ding bantuk in timhlamhnak a ngeih le ngeih lo cu fiang tein an langhter lo. 2008 phunghrampi ning in President cu term khat ah kum 5 a si i, term hnih (kum 10) tiang ṭuan khawh a si ti langhter si lo.
UN palai nih cun Aung San Suu Kyi he ton a duhnak cu Min Aung Hlaing a hal i, a caan aa relrem tik ah kan tuaktan te lai tiah a leh. Hilio ah Min Aung Hlaing nih, Suh Kyi cu hinak faak in dantatnak kan tuah khawh ko nain zawnruahnak kan ngeih caah kan tuah lo, tiah a chim.
Magway Ramṭhen, Pa Kah Sah 21 Hriamnam Sernak Seh Zung Ah PuahKehnak A Chuak!: Magway ramṭhen, Seikphyo peng Shohpinin(ရှောက်ပင်အင်း) khua pawng ah SAC kuttang Pa Kah Sah 21 runvennak thilri chuaknak seh zung ah, August 17 lio ah khan puahkehnak a chuak, tiah theih a si. Cu seh zung ah cun vanlawng kahnak hriamngan 81mm le 40 mm hna an chuah. Hriamngan an chuah lio ah 81mm cu zanlei sml 4:30 hrawng ah a puak, tiah Seikphyo PDF in Bo Maing Shin nih a chim.
“August 17 zanlei sml 4:30 hrawng ah puahkehnak a chuak. 81mn le 40mm vanlawng kahnak hriamngan an ser lio ah 81mm cu a puah caah cu chung i ummi SAC ralkap pawl zong hliamhma a pumi an um. Cu tlawmpal ah an motor a chuak i, ke in a kalmi zong an um,” tiah a chim chap. Cu puahkehnak a chuah dih in meng 3 hrawng a hlatnak ah SAC ralkap le an kuttang ralkap hna i bawm in ralkap 200 hrawng nih a pawngkam check hlatnak an tuah, tiah tualchung mi hna nih an chim.
Karenni ramkulh, Demoso Ralhrial Camp Hmun Hnih Ah Eidin An Ngei Ti Lo! Karenni ramkulh, Demoso thlanglei ralhrial camp pahnih ah eidin an ngei ti lo, an eidin tirawl a dih cikcek cang caah bawmchantu an herh ko, tiah ralhrial zohkhenhtu hna nih an chim. Ralhrial sing khat leng an umnak Demoso khua thlanglei ralhrial camp pahnih ah ei awk zeihmanh an ngei ti lo. Karenni ramkulh ralhrial camp hi buaktlak in hmun 5 a um. Hmun hnih ah cun ei awk a dih cikcek cang. A dang a taangmi zong hi eidin an i za ti lo, tiah ralhrial zohkhenhtu hna nih an chim.
“Ei awk kan ngei ti lo, tiah ca a rak ṭialmi hi ralhrial camp hmun hnih in an si. A dang a taangmi zong hi zarkhat hnih chung hrawng lawng ei awk kan ngei cang an ti,” tiah ṭuanvo ngeitu hna nih a chim. Eidin, sii-ai, angki, tawhrolh le ruah kham thilri hna rianrang in an herh. Cu ralhrial camp cu NGO cheukhat nih bawmhnak an rak pek ko hna nain, SAC ralkap nih phihkhamnak an tuah ruangah bawmhnak an hmuh ti lonak hi thla 2 hrawng a si cang, tiah theih a si.
Ralhrial hna nih ei awk an ngeih ti lo caan i an khua ah facang laak an kal lio ah SAC ralkap nih an thah hna pinah an inn ah bomb an hmanhmi nih a puah hna i, a thimi le aa hliammi an um. Ramchung ah ralhrial camp a ummi chung in ei awk a ngei ti lomi tam bik hi Karenni ramkulh in a si. Karenni ramkulh ah ralhrial mi hi zatuak 75 an phan, tiah theih a si.
Tanintharyi Ramṭhen, Yephyo Peng Ah Kum 19 Mino Pakhat Cu SAC Ralkap Nih An Thah!, Tanintharyi ramṭhen, Yephyo peng, Kalonehtar(ကလုံးထာ) khua ah umhmun a khuarmi SAC ralkap nih August 16 ah kum 19 mino pakhat, Thant Zin Htwe cu an hrem hnu ah zohchia ngai in an thah, tiah Dawei Information Center nih an thanh. August 16 zanlei sml 4:30 hrawng ah Thant Zin Htwe cu sianginn lam a tan lio ah SAC ralkap nih an tlaih i an kah thah, tiah tualchung mi hna nih a chim.
Sianginn chung ah SAC ralkap pawl umhmun an khuar cu a theih lo caah atu bantukin an kah hi a si. A ruak cu kan la kho rih lo,” tiah tualchung mi pakhat nih a chim. SAC ralkap 150 hrawng cu August 14 zinglei ah Kalonehtar khua pawng ah an rak phan i, khua chung ah umhmun an khuar. Cu ni zinglei ah umhmun a khuarmi SAC ralkap 100 hrawng tu cu Maykhani khua lei hoih in an kal. Kalonehtar khua ah ralkap 40 hrawng an chiah tak hna, tiah theih a si.
Sagaing ramṭhen, Kanbalu peng Kotaungbo khua ah umhmun a khuarmi SAC ralkap nih August 18 zanlei ah hriamngan in an kah i, inn pakhat a tlak caah inn chung a ummi nu pahnih cu an nunnak a liam, tiah Kotaungbo Revolution KTB-R nih an langhter.
Leave a Reply