American Ram Ah Meithal Kahnak A Chuak Minung 10 An Thih Pinah
American ram, New York khuapi State chung um Buffalo khuapi ah minthang pakhat a si ve mi Super Market pakhat ah meithal kahnak a chuah i minung 10 an nunnak a liam i, minung 13 nih hliam an tuar tiah theih a si. Kum 18 a si mi meithal tama cu an tlaih tiah theih a si.
Meithal in hliam a tuar mi minung 13 hna lak ah minung 12 cu minak pawl an si tiah theih a si i, a tang mi minung pahninh hna cu mirang an si tiah theih a si, A thimi minung 10 hna lak ah Super Market riantuantu pakhat aa tel ve tiah theih a si. Tliah a tongmi mi pakhat cu sahrang mithleidan a hmang mi a si tiah Police nih an chim.
Relchap, US-ASEAN Summit ah a kaimi Malaysia ramleng vuanci Saifuddin Abdullah le NUG ramleng vuanci Daw Zin Mar Aung cu Washington DC i Willard Hotel ah May 14, zinglei ah tonnak an ngei tiah theih a si. Hi tonnak ah ASEAN hnatlaknak panga kong, Malaysia cozah cu Myanmar mipi hna leiah an dirnak kong le Malaysia cozah le NUG hi zeitindah hmunkhat ah rian kan ṭuan khawh lai timi kong an i ceih. Cu tonbiaruahnak kongah Daw Zin Mar Aung nih cun kaa lunghmuih ngai tiah RFA ah a chim.
Cu tonnak kong he pehtlai in Malaysia ramleng vuanci nih cun “NUG Cozah ramleng vuanci Daw Zin Mar Aung he hin online lawngin kan rak i tong, atu hi hmaitonh in a voikhatnak kan i ton a si. A sunglawi tukmi tonnak a si. Lungthiang tein bia kan i ruah kho. NUG le NUCC hi ASEAN nih cohlan dingin voihnih ka chim cang.Nizan i US-ASEAN Summit lio zongah Malaysia Prime Minister nih NUG he NUCC cohlan dingin US President Joe Biden sinah a chim. Cun Daw Zin Mar Aung he kan i tonnak ah mining hawi zawnruah bawmhnak kong zong kan ceih.
Minung hawi zawnruah bawmhnak hna hi SAC nih hriamnam bantukin hman i an duhmi hna sin lawngah an pek ding kha kan duh lo. SAC zong nih ASEAN hnatlaknak kha ṭha tein an ṭuan ding a si. ASEAN hnatlaknak cu SAC nih an cohlan cangmi a si. NUG zong nih an cohlan ko. Asinain atu tiang zeihmang thlennak a um lo i thah a tongmi an tam chin lengmang. A tlizammi zong an karh chin. Tuhnu kum khat kan hngak kho ti lo” tiah a chim.
Cu lawng si loin thawnglatu hna nih Myanmar ram kongah Malaysia cozah lungput an halmi cu “Pakhatnak ah nawlngeihnak latu SAC kan cohlang lo. Pahnihnak ah Malaysia cozah nih NUG/NUCC he pehtlaihnak tuah dingin biakhiahnak kan tuah cang. Pathumnak ah Myanmar mipi hna sinah NUG sin in minung hawi zawnruah bawmhnak kan pek lai” tiah Malaysia ramleng vuanci Saifuddin Abdullah nih cun a leh hna.
Cu pinah Malaysia ah NUG Cozah palai zung onnak kong zong an i ceih i a rauh hlan a fiang te ko lai tiah Saifuddin Abdullah nih a chim fawn. Malaysia cozah nih NUG he ṭha tein pehtlaihnak le biakchawnnak tuah i rianṭuanṭi kan i tim, hi pin cu chimchap dang a ṭha rih lo tiah Malaysia ramleng vuanci Saifuddin Abdullah nih thawnglatu hna sinah a chim.
Leave a Reply