Chinmi le chinmi chung i hibantuk thawng theih lengmang cu poi ko e

Dallas ah “Shalom Thang” Nam Sawhnak in a Nunnak a Liam – November 25, US ram, Dallas khua ah Sopum khuami Shalom Thang (27) cu zuri Ram Hel (30) nih namte in a sawh caah a nunnak a liam, tiah chungkhar sin in thawngpang kan theih. Shalom Thang hi a upa don ding in a va kalnak ah nam in sawh a ton hi a si.

Shalom Thang chungkhar saya Van nih, “Indianapolis ah a ummi Shalom Thang i a upa hi Dallas ah a rak tlawng hna i a hawile inn ah a leng. A upa don ding in Shalom Thang cu a kal i a va phanh cun an ri pah cang. Bia an i el hna i, i el len lo ding in a thloh hna. Shalom Thang le a upa cu ttin ding in motor cung a kai bak ah an hawipa Ram Hel nih cun nam in a sawh,” tiah The Chin Journal ah a chim.

Ram Hel nih Shalom Thang cu a hnakruh tang ah fak ngaiin nam in a sawh caah sizung an phanhpi ko nain a hliamhma in a nunnak a liam. Shalom Thang nam in a sawh dih hnu ah Ram Hel zong amah tein nam in a aat ve. “Nam in a sawh dih ah amah zong namte in ai aat ve. 911 an chawnh zokzok i sizung ah an kalpi hnu ah Shalom Thang cu a nunnak a liam. A sawhtu pa zong palek nih sizung ah an thlop lio a si.

Shalom Thang a ruak cu an la kho rih lo,” tiah saya Van nih a chim chap. Nam in a sawhtu Ram Hel hi Malaysia a um lio zong ah a rak i vel lengmangmi a si i, aa velhnak ruang ah a lung tlawm pah cangmi a si, tiah a theitu hna nih The Chin Journal ah an chim. – The Chin Journal

COVID-19 in a Nunnak a Liammi Chinmi Pastor 50 Chungkhar CBMM nih Tangka Bawmhnak a Pek Hna COVID-19 zawtnak ruang ah a nunnak a liammi Myanmar ramchung khuasa Chinmi Pathian rianttuantu pastor 50 hna i an chungkhar pawl cu Yangon hrambunh Lai Mission rianttuannak a simi

“Cornerstone Baptist Mission Myanmar-CBMM” nih tangka ting 200,000MMK cio bawmhnak a pek hna, tiah ttuanvo ngeitu sin in thawngpang kan theih. CBMM haotu Rev. Uk Ling Thang nih, “COVID-19 in a nunnak a liammi Pathian rianttuantu chungkhar 50 kan bawmh hna. Laitlang ah chungkhar 10, Kalay ah chungkhar 5 le Yangon ah chungkhar 35 tiin ting 2 cio bawmhnak kan pek hna,” tiah a chim. – The Chin Journal