Chinmi An Tlaih Than Hoi Hna Vanchiat Ahcun A Kum in Thong Tla Kho An si

India ram,Manipur ramkulh Inpha vanlawng bual ah September 30 i Delhli lei ah zuang in Indigo vanlawng no.6E-2209 ah India rammi sinak deu a tlaihmi Chinmi 14 an tlaih hna. Inpha khua Bir Tikendrajit vanlawng bualrawn ah humhimnak lakmi nih rami sinak deu he a lutmi Chin mi 14 an tlaih hna i,Sinjiami palek riahbuk ah an kuat hna. Hi an tlaihmi minung 14 hna hi Chin ramkulh Tedim peng le Tonzaang peng in kum 16 in kum 35 karmi mino an si hna. India ram Assam ramkulh,Kohati ah Chinmi 26 zong India rammi sinak feu he September 12 ah an rak tlaih cang hna.

Mizoram Ah A Dormi Ngakchia Sianginn An Kai Khawhnak Ding,Education Minister Pu Lalchandama Ralte le Cozah Lutlai Dang Nih An Ceih Myanmar ram buai ruangah Mizoram chung i a dor ngakchia hna nih an ca cawnnak an peh khawh nak hnga School Education Minister Pu Lalchandama Ralte zungpi ah September 29, 2021 ah online meeting an ngei.Hi meeting ahhin district kip in Education Officer (DEO) cio nih an district ah a dormi dirhmun le an herhmi tete report an pek.MBSE(Mizoram Board of School Education) tang ah taang 10 le taang 12 zong camepuai an phit ve khawhnak ding tiang tuaktan a si.

Mizoram i a dormi siangngakchia umzat fiang tein an theih khawhnak hnga hlathlainak tuah ding lam zong tuaktan colh i, an hlathlainak tuahmi hi Central Cozah(India cozah) sinah kuat than te ding a si lai. Chin ram in a rak i dormi siangngakchia hna nih an ca cawnnak an peh khawhnak ding ahhin September 17, 2021 ah khan Education Minister Pu Lalchandama Ralte nih Delhi khuapi ah Central Cozah lutlai pawl a rak ton cang hna. Cu lio an rak i chawnhbiaknak he pehtlai cun a dormi siangngakchia nih sianginn an kai Khawhnak ding hi pehzulh a si.

Central Cozah an rak ton lio hna ahhin Pu Lalhmachhuana, State Project Director, Samagra Shiksa Mizoram zong nih a rak zulh. Hi online meeting ah hin Education Minister Pu Lalchandama Ralte nih cun a rak i dormi pawl cu kan unau an si pinah kan minung hawi an sinak zongin bawmhchanh hna hi kan rian a si, tiah a chim. Hi meeting ah hin Secretary, School Education Department le Officers dang leng ah Directorate of School Education, Directorate of SCERT, MBSE le Samagra Shiksha lutlai hna le district kip in Education Officer hna zong an i tel.