Ralhrang Nih chin Mino Pakhat An Kah Than

Thantlang ah Nungak Pakhat SAC Ralhrang nih an Kah – Khuahringtlang lei in Thantlang ah thilri lak ta ding in a kalmi nungak Rachael (kum 23) cu SAC ralhrang nih meithal in an kah caah hliamhma fak ngaiin a pu, tiah Thinghual khua upa sin in thawngpang kan theih. Thinghual khuami saya Bawi Lian nih,

“Nihin zinglei ah khan Thantlang ah thil va lak ta ding in Rachael le pa pahnih an vung kal. Mah cun ralkap nih an rak kah hna i Rachael cu a paw ah an khen. Atu hi kan khua lei ah an rak tlunpi lio a si. A hliamhma a fak pah ngai an ti. Kan khua cu an phakpi rih lo,” tiah The Chin Journal ah a chim.

Aluancia October 6 ah khan Thantlang ah thil lak ding in a tlung tami sianginn cathimtu saya Thomas (kum 35) zong SAC ralhrang nih an rak kah i a liang ah hliamhma a pu. Atulio Thantlang khua kal kong he pehtlai in saya Bawi Lian nih, “Kei zong thil lak ah Thantlang ah ka kal bal. JMBC biakinn rii in chaklei khi cu kal awk ah a him lo ngaingai,” tiah a chim. Burmese

Chin ramkulh, Mindat khuapi, Magwe ramthen, Pakokku lei lam a awng mi le luhpi mi eidin sii – ai hna cu ralhrang hna nih an kham caah Chin ramkulh Mindat – Matupi lam thluan vialte i mizapi hna le ralzaam hna cu phaisa an ngeih hmanh ah cawk kho lo dir hmun an phan tiah theih asi.

November thla dih lei ah Mindat – Matupi lei kahdohnak cu a vun dai nain ralhrang nih eidin kham nak ruahnak cu an hman. Mindat CDF pakhat nih ” Ralhrang nih kan eidin rocar ter dih ding in an i zuam. Pakokku, Pauk lein kan mah mizapi hna tiang harsa in um hna seh ti in eidin hna an tlaih, Sii- ai hna an tlaih,

Minung zong an tlaih, a phunphun in hremnak hna an tuah.Thil man zong a har leng ah eidin cawk ding zong ahar tuk, harnak phunkip hi kan tong nain zeipoh tlawmtlin khawh nak caah kan i zuam cuahmah .Phaisa in cawk ngah lo phorh ngah lo tlunkal ngah lo in kan um. Ram kip bawmhnak kan duh lo si lo” tiah a chim.

Aluan cia November thla chung ah Mindat CDF le ralhrang kahdohnak ah ralhrang 70 hrawng an thi i tam tuk hliam n tuar.Mah bantuk in kahdohnak a um fa te ralhrang nih eidin, Sii – ai phorh nak lam an kham nak hn an tuah. Ahlan chan lio zong ah tlangcung mi hna cung ah ban tuk hin an rak tuah tawn.

Ralhrang nih Chin ramkulh ah eidin lam an phih bantuk in Sagaing ramthen, Kalay pengkomh, MinKin peng chung ah Chin Twin tiva ah a rak kai mi ralhrang eidin phor mawtaw hna cu ahmunhma PDF nih lam tan i an kah hna. DVBE, The Chin Post