Chin ramkulh Paletwah khuapi ah November 1 khi ralhrangbu lungtlin langhternak tuah ding a si i cuka ah cun khua pakhat ah mining 30-50 nan chuak hrimhrim lai tiah ralhrangbu nih khuabawi hna sinah nawl an pek hna. Hi kong he pehtlai in khuachung ah chimceih a tam ngaingai. Ahohmanh nih ralhrangbu lungtlin langhternak ah cun i tel an duh lo, tiah Paletwa mibawmchantu pakhat nih a chim.
Asinain ralhrang nih nawl an pekmi hna a si caah zulh lo ding cu tihnung ngai a si fawn. Nai zongah khan Paletwa ah ralhrangbu lungtlin langhternak ah aa telmi cu mining pakhat ah facang pung 2 kan in pek hna lai tiah an lemsoi cang hna. Atu cu lemsoi si ti loin nawlpek a si cang. Paletwa peng khuami hna cu thil pahnih karlak ah lungretheih in an um, tinak a si. Source: BBC
Tanphu Khua Pawngah Phaisa Sing 8 Tluk A Kengtu Pa Telh In Khuami 5 Ralhrang Nih An Tlaih Hna: Sagaing ramthen, Kalay peng, Kalay-Gangaw kalnak motor lampi cung i TanBo le YangiAung khua pawng i ralhrang check gate ah ramdang ummi a farnu nih phaisa 7,80000 a kuatmi cu a chuahtu Falam peng chung ummi tlangval telh in Tanphu khuami 5 hna cu Oct 23 ahkhan aruang umlo in an tlaih hna i,
Ni 6 a tlin tiangah an thawngpang zeihmanh an theih hna lo caah chungkhar hna lungrethei ngai in an um tiah theih asi. Thil sining cu hitihin a si. Oct 23, zinglei sml 8:00 ah Falam peng, Khupleng khuami Salai Van Hmui Cuang kum 16 cu, ramdang ummi a farnu nih phaisa a kuatmi 7,80000 leng cu chuah in khua leiah tlung dingin a kalnak lam, Tan Bo le YangiAung khua chuahnak i ralhrang umnak sakhaan ah ralhrang nih zohfelnak tuah in a phaisa an chuh pinah amah zong an tlaih chih.
Cu thawngpang a theitu Tan Bo khua ah a ummi Salai Van Hmui Cuang cingla rualchan simi U Van Tin Uk, kum 50 leng minung le U Zaw Ling kum 30 hna nih an tlaih ni zinglei sml 11:00 ah ralhrang umnak check gate ahcun an tlaihmi cu va chuah dingin an va kal hnawh tikah anmah 2 zong an rak tlaih than hna. Cu pinah chun sml 12:30 hrawngah Tan Bo ( khua in thilri cawk dingin motorcycle in a kalmi Tanphu khuami Pu Cung Lian Sang kum 30 leng le U Zaw Min Htun hna zong a ruang umlo in an rak tlaih than ve.
Khuami pakhat nihcun, minung an tlaih hna ni ah hin khuachung ah ralhrang tampi an lut i, innchung tiangin an kan luhhnawh cang. Cucaah khuami hna cu an zaam dih. Anmah he pehtlai in an tlaihnak in ni-6 tiang ah an thawngpang zeihmanh theih ti lo hnu ahcun zeituah awk zong kan theilo, hngah sawhsawh asi ko. Sualnak ngeilo mi mizapi hna an si caah a ran khawh chungin an thlah than ding kan duh.
Hmasabik an tlaihmi mino pakhat dah tilo cu nupi le fate ngeimi lawngte an si. Chungkhar hna cu mitthli he an i ciah ko tiah a chim. Tanphu le YangiAung khua lonh i ralhrang umnak sakhaan check gate ah hin palek le ralkap 30 leng an um peng tiah theih asi. Source: Zalen
Leave a Reply