Chin miphun nih kan dohmi ral hi Kawl miphun ruahnak a si

Chin miphun cu zeitik hmanh ah Kawl miphun kan si lo i, Chinram ah Chin miphun lawng nih dah nawl a ngeih ko lo ahcun aho miphun hmanh nih nawl an ngeih ding a si lo.

Chin miphun nih kan dohmi ral hi Kawl miphun ruahnak a si. Kawl miphun a si lomi (Tlangcungmi) hna kha Kawl miphun ah canter duhnak an ngeihmi ruahnak le Ralkap uknak hi Chin miphun nih kan dohmi ral a si.

Panglong hnatlaknak bantukin kan Ram kan dirh i, kan Miphun nih cu ram ah nawl kan ngeih tikah ramchung ral a dih lai i, daihnak le t’hanchonak a ummi Ram kan dirh khawh lai. Cu bantuk Ram dirh dingah Kawl miphun le ralkap nih an kan kham peng a si ahcun “Kanmah tein nawl kan ngeih khawhnak Ram kan dirh a herh”.

Chin miphun nih ral kan dohmi hi kan miphun le kan ram a lohtlau lo nakhnga le kan ram ah kan miphun nih duhdim tein khuasak tintuknak kan ngeih khawh i, kan Pathian zalong tein kan biak khawh nakhnga caah a si.

Chin National Force nih Chin Miphun caah aa timhmi Self-determination, Democracy le Federalism a hmuh khawhnak ding caah cun ka kut a um ti lo hmanh ah ka ke pahnih in ka t’uan lai,ka ke pahnih zong a um ti lo i, ka kaa in chim khawhnak a um rih ko ahcun ka kaa in ka ttuan rih ko lai tiah bia kaa kam.

Bia chim lio i thlan a chuakmi hmanh hnawh ka duh lo,thlan chuak loin miphun caah rian t’uan khawh a si lo,ramtang ah thlanhripi he miphun caah rian a t’uan cuahmahmi an um caah kei zong ka thlan hnawh ka duh lo.

Kei mah nih ka ruahchihmi le nihin ni tiang ka dirhmun cu,zeitikhmanh ah American Citizenship ka laak lai lo ti hi a si.Zeicatiah Chin miphun le Chinram caah ka nunnak vialte ka sining vialte ka thazaang thap in rian ka t’uan lai tihi a hlan tein biakhiahnak ka rak ngeih cang caah,cu leng cun a dang ka thim kho lo.

Ka ram caah ka t’uan tiak kha ka ram caah khan ka ram caah ka nun nak ka thap ding si.Ka miphun caah ka t’uan tikah kha ka miphun caah khan ka nunnak ka pek ding a si tihi kei cu kaa tlaih zungzalmi si.

Miphun dawtnak cu Nuhrin nakin i chuahpi mi a si lo.A cawn in cawn a hau mi a si. Nihin Chin miphun hna zong nih Miphun dawt nak hi kan cawn hrim hrim a hau. Chin miphun hna,u le nau hna kan ih sawhsawh ding a si lo,kan t’hut sawhsawh ding a si lo.

Kan hmurkaa in kan miphun le kan ram caah tiin au sawhsawh lawng kha atu hi a caan a si ti lo.Tuahser nak a herh cang kan pumpak in kan i tel khawh lo hmanh ah kan ngeihchiah,kan ruah nak tampi he kan i tel a herh kan umnak a khat lo hmanh ah cu kan umnak cio in cun rian kan t’uan a herh.

Ramchung i a um mi kan miphun hna an si a fak,kan cawl kho lo tiah kan t’hut i, Mi an chimmi,minih an kan tuah tomi paoh kan ing ko asi ah cun,zeitik hmanh ah luatnak kan phan kho lai lo, Luatnak a duh miphun hna nih an nunnak an thap i,an ngeihchia dihlak an thap tawn.

Kan thazaang hi khoi ka hmanh ah a um lo, United Nation  zongah a um lo, American zongah a um lo,khuazei ram hmanh ah a um lo. Kan Chinmi kut chung lawngah a um,kan Chin miphun nih luat nak kan duh,zalon nak kan duh a si ahcun “kan ram kan kut chung phakter”kha kan luat ni a si ko.

Chin National Force le Chin miphun nih “Daihnak taktak” kha nihin ni caan ah kan duhmi cu a si.Cu daihnak taktak cu khuazei ah dah a bunh ti a si ahcun,kan mah tein kan Holh duhdim tein kan chim khawh nak hnga,Kan Ca zalong tein kan chim khawh nakhnga,

Kan duh mi paohpaoh zalong tein khua kan ruah khawh nakhnga,kan ramah kan mah tein nawl kan ngeih i kan duhmi paoh kha nawl kan tuah khawh nakhnga le kan khua kan ram cia kanmah tein kan i uk khawh nakhnga ding caah,kha vialte a tlamting tik ahcun kha a hman mi a dikmi,

“daihnak” kha kan hmuh tiah kannih nihcun kan ruah cu a phak hlan lo paoh cu zei tik hmanh ah Chin National Force  hi kan hriamnam hi chiah kan tim lo, Cu daih nak taktak kan phak hlan lo paoh cu hi kan cawlcangh nak hi ngol kan i tim lo,hmailei ah kan kal peng lai.

Kan nih Chin National Force  hna hi paralt’ha le Hero kan si lo. Kan Chin ram le miphun caah nunnak a pe mi hna minung 80 renglo tu hna kha kan Chin miphun nih kan i ngeihmi hna zohchun awktlak “Ram pasalt’ha Hero”an si.