Chawvaa Nak In Nunnak him cu a thadeuh lo maw.
=======================
Sodom le Kamorah bantuk in Than Tlang hi Tahchun ding a si hrim hrim lo.Nunnak himduh ah ThanTlang kan kal tak hi kan rak palh hrim hrim lo, nunnak cu thilribantuk in cawk khawh si lo, ser chawm khawh zong a si lo caah thilrinak in Nunnak tu hi kan rak I thimtu a si.
Halkha le Thantlang hi tahchun awk a tha lo, Halkha cu Chin State khualipi a si pin ah Thantlang bantuk in Nesat Myo a si lo. Vawlei cung ramkip Nesat myo paoh paoh a thatnak le a chiatnak aa cawhdih.
Cu ve bantuk in Kawl ram pumpi nesat myo paoh paoh cu ThanTlang bantuk in an tuar cio dih , a ruang cu Nesat myo timi cu business lei ah Khuadang myo nak in thanchonak lei ah a ran deuh bantuk in a ral zong a tam ve.
ThanTlang hi kaltak lo in va um uh si law, kan thisen tampi a chuah leng ah kan nunnak zong tampi a liam kho. Kan inn kan lo hna hi kan nunnak an kan khamh tu an si.
Cu caah cun pakhat le pakhat faktuk in i mawhchiat ding kan si lo, ThanTlang mipi nih kan tonmi harnak hi vawlei pumpi le kawlram pumpi nih ton cio mi harnak a si, Chin National Army, Front , Chinland Defence Force le Thantlang mipi kan palh a si hrim hrim lo pin ah Sodom le Khamorah bantuk in Pathian dantatnak zong a si lo.
Micheukhat nih Sodom le Khamawrah bang sualnak he aa khah mi Myo a si caah Pathian nih a hrawk ti tiang in ruahnak a ngeimi kan um hi hi a dik lo, Sodom le Khamawrah bantuk in thantlang khrihfa hna hi tahchun awk an tha lo,
sodom le khamawrah dantat nak petu le hrawk tu cu pathian le a mifa pei an si cu , Thantlang hrawk tu cu kawlram pumpi hrawktu MAH le a ralkap pei an si cu.
Cu ti a si ah cun Thantlang nak in Pathian a theilo mi zumlotu zakhat ah 75 um nak kawlrawn khi hrawh deuh ding si lo maw? Harnak kan tontik paoh I Pathian dantatnak kan ti mi hi cu , Pathian hi thlachuah petu si lo in, mithalo MAH bantuk in kan ruah caah a si.
Cu caah cun Thantlang kan zamtak hi chawvaa nak in man sungdeuh mi nunnak, pathian pekmi thlachuah kan kil ventu a si. Kan Nunnak cu kan mah nih kilven a hau, Pathian bia kan tlinh tu a si. A ciamdih mi kan Inn kan Lo caah kan tha chia hrim hrim hlahseh, Pathian nih a kan pek than te lai.
By Father Hrang Tin Thang
Leave a Reply