A Poi Tuk E-CDF ruangah Mipi an lungtling ti lo!!

Hakha Peng Ah CDF Nih Thingkep Par Ṭawh Le Cawk Zuar An Khap!!
============================
Chin ramkulh, Hakha peng ah CDF nih thingkep par ṭawh, cawk zuar an khap, tiah theih a si. Hakha peng mi pakhat nih, “Tukum in CDF nih thingkep par ṭawh le cawk zuar an khap cang. Nikum ah cun an rak khap rih lo nain tukum lawng in an khap hi a si. Atu bantukin a man a ṭhami thingkep par phuntling paohpaoh ṭawh le cawk zuar an khapmi hi a ṭha tuk,” tiah The Chin Post ah a chim.

Tualchung mi pakhat nih, “Thingkep par(Nilung) kan rak kawlnak hi a luancia kum 30 lio in kan rak kawl cang. Cu lioah cuaikhat ah 100 hrawng lawng a rak si. Thingkep par, nilung cu September thla dongh in December thla tiang hi kawl tawn a si,” tiah a chim.
Nikum tiang ah khan thingkep par nilung cuaikhat ah kyats 80,000 leng a rak phan. Thingkung kai a ṭhawng mi ca ah cun nikhat ah cuai 3 hna an hmu.

Atu bantukin CDF nih thingkep par ṭawh an khap hi a ṭha tukmi a si ko nain khattelei ah kanmah bantuk harsa mi ca ah cun a har tuk hringhran. Thingkep par ka kawlmi nih hin chungkhar ca ah eidin facang le kan fale ca ah X’mas lai hruk-aih thilri kan cawkpiak tawn hna. Asinain atu cu thingkep par ṭawh le cawk zuar khap a si tikah kan nih bantuk ṭuanchom eichom in a nungmi kan ca ah cun kan van a sang tuk, tiah thingkep par a kawl tawntu pakhat nih The Chin Post ah a chim. Crd-The Chin Post (Note-Hi kongah mipi lei nih a tu lio kan har tuk lio ah hi bantuk khap cu tiin an duh lonak le an lungtlinlonak comments an peek len)

Relchap, Tamu Khua Ah Transportation and Communication Zung Cu Hriamtlai Phu Khat Nih An Khangh, Sagaing ramṭhen, Tamu khua Sawbua No.5 sang ummi Transportation and Communication(TC) zung cu, nizan October 28 zanlei ah min hngalh lomi hriamtlai phu khat nih an khangh, tiah tualchung mi nih an chim.

TC zung a kangh hnu in kaphnih kar kahdohnak a chuak i, TC zung kam ah a ummi Tanyawsin(သံယောဇဉ်) dawr zong a kaang, tiah tualchung mi nih cun an chim. “Zanlei sml 4:00 hrawng ah hriamtlai phu khat nih TC zung cu an khangh. Cu hnu caan tlawmpal ah SAC ralkap an ra i kahdohnak a chuak. TC zung kam ummi dawr pakhat zong a kaang,” tiah tualchung mi pakhat nih a chim. Min hngalh lomi hriamtlai phu khat nih TC zung an khangh lioah zung rianṭuantu aho hmanh an kai lo lio a si caah a thimi le aa hliammi an um lo, tiah theih a si.

Yetarshi Peng Ah Sianglairun Sianginn Pakhat Min Hngalh Lomi Phu Nih An Khangh, Pago ramṭhen, Yetarshi peng Takhuaigye(တခွဲကျဲ) khua sianglairun sianginn pakhat a kaang, tiah theih a si. Nizan October 28 zan sml 7:00 hrawngah sianglairun sianginn pakhat cu min hngalh lomi phu khat nih mei in an rak khangh, tiah tualchung mi hna nih an chim.

“October 28 zan ah sianginn cu mei in an khangh. Mizei phu nih dah an khangh ti cu kan hngal kho rih lo. Sianginn hmai ah khuami inn a um ko nain an kaang hraw lo, siangin lawng a kaang,” tiah tualchung mi pakhat nih a chim. Mei kangh ruangah E muisam in sakmi a sau pe 70 le a kauh pe 24 tlakrawh sianginn cu a ciam dih ko, tiah theih a si.

Kwelonetaing(ကွီလုံတိုင်) Sakhan Laak Kahdohnak Ah SAC Ralkap Le BGF 8 An Thi, Meithal Zun 43 Kan Lak Tiah Red Dragon Column Nih An Thanh, KNU Brigade 6 hmunran um Gyia Ing Seihgyi(အင်းဆိပ်ကြီး) peng Kwelonetaing sakhan laak kahdohnak ah SAC ralkap 15 le BGF 17 an dihlak 32 cu a sung an pek(surrender) caah meithal zun 43 kan lak, tiah Red Gragon Column nih cathanh an chuah.

KNLA Battalion 17 le 27, Federal Win, SOF le PDF ṭangṭi phu hna nih a luancia October 22 ah khan Kwelonetaing sakhan cu an rak kah i October 26 ah tlamtling tein an lak khawh. Cu kahdohnak ah SAC ralkap 4 le BGF 4 an thi, tiah theih a si. Cu kahdohnak a daih in SAC ralkap vanlawng nih sakhan pawngkam um khuate ah hriamnan in a kah ko nain khuami a thimi le aa hliammi an um lo. Kanmah lei zong in a thimi le aa hliammi kan um lo, tiah an langhter.

Aizawl Khua Pawng Um Ralzam Mi cu MRRC -Mizoram Nih Eidin Cheukhat An Bawmh Hna, Myanmar ram in Mizoram ah ralzam in aa dormi Aizawl khua pawng Tuirial ralzam camp ah a ummi hna sinah MRRC -Mizoram phu nih, nizan October 28 ah eidin cheukhat an va pek chanh hna, tiah theih a si. MRRC -Mizoram nih ralzam mi an bawmhchanhmi thil hna cu Facang tun 20, a Taṭuh tun 3, chiti pung 5, alu tun 3, kalape tun 3 le piat tun 2 hna an si, tiah theih a si.

Butitaung Peng Ah Ralhrial In Khuasa Mi 2600 Leng Cu Mah Umnak Hmun Kir Ding Ah SAC Nih A Hnek Hna, Rakhine ramkulh, Butitaung peng ah ummi ralhrial camp pakhat ah aa dormi minung 2600 leng cu a ra laimi October 31 a hnu bik chia in mah umnak hmun cio kir ding ah SAC ralkap, palik le pengkulh uktu hna nih auh in ralrinnak an pek hna tiah ralhrial camp ummi hna nih an chim.

Mah umnak hmun nan kir lo a si ah cun, hmunhma rilonh in khuasaknak, zaan chuahlo ding nawl chuahmi poh-mah 144 he tazacuai nan si lai tiah tlerh khonhnak an tuah tiah min langhter a duhlo mi ralhrial bawmtu pakhat nih a chim. “SAC ralkap hna le, pengkulh uktu hna nih ralhrial camp in chuah ding ah voi li an kan chimh cang. Ton biaruahnak voi hnih an kan tuah, cun ralhrial camp ah ra voihnih an kan chimh” tiah a chim.

Butitaung peng ah ralhrial camp hmun li a um i minung 2600 leng an i dor tiah theih a si. Rakhine ramkulh le Chin ramkulh thlanglei ah SAC ralkap le AA kar kahdohnak a chuah ruang ah mah umnak hmun kaltak in ralhrial dirhmun a phanmi 90000 leng an si tiah UNOCHA nih October 19 ah an thanh tiah theih a si. Crd-The Chin Post

Be the first to comment

Leave a Reply

Your email address will not be published.


*