CDF Kanpalet le SAC ralhrang kar kahdohnak cu September thla chung ah ralhrang phu lei in a tlawmbik minung 30 hrawng an thi Fak ngai in kahdohnak a chuah nak hmun Chin ramkulh, Kanpalet in mipi vengtu ralkap(CDF-KANPETLET) le SAC ralhrang phu kar, September thlachung ah ralhrang phu lei in a tlawmbik minung 30 hrawng an thi cang.
Chin ramkulh mipi vengtu ralkap CDF-KANPETLET lei in hliamtuar minung pahnih hrawng an um nain an hliam tuar mi ah thinphan ding a um lo. Hramhram nawlngeihnak la tu SAC ralhrang phu nih khuachung ah RPG,60 mm, launcher hmang in an kah hna caah minung umnak inn, biak nak lei inn le khuachung lam cheukhat cu an rawk. Khuachung hmun cheukhat ah a puak rih lo mi bomb zong hmuh a si caah,
Zaam ding in a harh mi, mipi hna nih a herhtuk mi dah ti lo, umkal hrial ding in a him lai tiah ruahnak hmun lawng ah um ding in ralrin nak an chimh hna. CDF-KANPETLET nih mipi hna caah rawhral nak a tlawmbik ding in zuam a si, ralhrang uk hramchah nak ding le federal democracy dirh khawh nak ding ah, mipi hna zong nih dirkamh le bawmhding in nawlnak an tuah.
June 1 thok in August 31 tiang ah thlathum chung kahdohnak chung in Myanmar ram chung ah hriamtlai hna kar ah kahdohnak 1171 a um i ralhrang minung 1710 an thi i mipi lei in 431 an nunnak a liam tiah NUG cozah nih a thanh. Mahlawng si lo in hriamtlai hna he kahdohnak ah ralhrang lei in minung 632 an thi i mipi lei in minung 184 nunnak liam le hliam a hmu mi zong an um tiah an langhter.
Thlathum chung ah ram chung hriamtlai vial te kahdohnak chungah ralhrang 509 an thi i 214 hliam an tuar mipi lei in 14 an nunnak liam i a hliam mi 17 an si tiah NUG nih a thanh. Mipi hna duhlo nak an langhternak ah ralhrang lei in 994 an thi i minung 349 an i hliam ban tuk in mipi lei in minung 85 an nunnak liam i minung 34 an i hliam tiah an langhter. Ramchung vialte zatuak in i thah nawnnak ah ralhrang 102 an thi i 19 an i hliam,mipi lei in 14 an thi i 7 an i hliam. Ramchung vial te zatuak in bomb puahnak ruang ah a thi mi ralhrang lei in 65 an thi i 47 an i hliam,
Mipi lei in bomb puah ruang ah minung 15 an nunnak liam i minung 35 an i hliam. June thla thok in August thla chung ah ralhrang nih mipi hrem ruang ah minung 302 an thi i 91 an i hliam tiah NUG vuanci lei nih a thanh. Thlathum chung ah ram chung zatuak in ralhrang anmah le anmah an i kahnak ah ralhrang minung 37 an thi i minung 2 an i hliam. Ralhrang anmah le anmah an i kah nak ruang ah mipi lei 1 a nun nak a liam.
Leave a Reply