Upatmi CDF-Thantlang hruaitu hna, Pu Sang Kian(Tlangpi, anupi Zephai) hi Thantlang peng fimcawnnak zung cazi lutlai a si i chungkhar harsat ruang ah CDM a tuah kho lo, a fanu 2 lawng CDM an tuah khawh. CDM a tuah lomi CDF nih an tlaih cio hna caah Pu Sang Kian zong CDF minung 6 hrawng nih a zamnak Tlangpi ah an rak lak ve.
A fale nih a thil zong tha tein an timh piak i an kalter ve ko. Amah zong nih phunzai lo tein a zulh ve ko hna. Khua lonh ah CDF ralkap nih an pakhat he an chiah tak chung hna i anmah cu khuachung ah wine an ding ta. An rit hnu ah an hruaitu pakhat nih Pu Sang Kian cu ‘CDM na tuah duh lo’ tiin a velh, cuti a velh lio ah cun
Thil chanh ding a ra thanmi Mang Thawng(Farrawn khuami, Pu Sang Kian a fanu vapa) nih a hmuh hna i a thlauh. Nain, Mang Thawng(amah zong hi CDM a tuahmi a si) zong cu a velh ve. Meithal he a si hlei ah a meithal in a hmuaih chih hna caah an let ngam lo, a duh chung in a velh hna i Pu Sang Kian cu a hnarthi a chuak,
Mang Thawng cu fak tuk in a velh caah a hmai zong a kuai dih i tuhi a tho kho lo, drip an thlaih lio a si. Pu Sang Kian cu a thi he CDF ralkap nih cun an kalpi. A velhtu CDF ralkap hi tanghra a rak kai lio ah Mang Thawng lila nih ca a rak chimhmi a si. A pa cu pastor a si. Security vennak caah a khua le a min cu langhter awk a tha lai lo.
Pu Sang Kian CDM a tuah lomi cu a hman, CDM a tuah lo caah an kalpi i phunzai lo tein a zulh ko hna. Nain, dalan bantuk cu a si hrimhrim lo. A fale nih zeitluk in dah CDF thazaang an pek timi cu nanmah CDF-Thantlang nih fiang tein nan thei dihmi a si ko. Pu Sang Kian hi keimah ka pa a farnu i a va a si, ka ttang a si.
CDM a tuah lomi cung ah kanmah zong nih kan mawhchiat ngai ko. Nain, tlaih in thisen chuah tiang velh a ton hlei ah kan unau Thawng Bawi tiang tho kho lo tiang in a velhmi cung ah a chungkhat kan ngaih a chia ngai ko. Mah tiangtiang hi cu miphun ralkap pakhat nih a tuah awk a si lo tiah kan ruah.
A si khawh ahcun CDF-Thantlang hruaitu le CNF upa hna nih thil sining kan zohfel piak u law a velhtu kan ralkap hi a herh nan ti ning in dan kan tat piak hram ko u tiah zaangfah kan in nawl ko hna. Nanmah hlei in bochan awk dang kan ngei hna lo. Hi thil kan ton hnu zong ah kan in kan in zumh hna nak a zor bak lo, miphun le ram caah nunnak thap in rian nan tuanmi cung ah upatnak sang bik kan in pek zungzal ko hna. Salai Lungthli Tum
Kachin ramkulh Putao khuapi ah ralhrangbu hruaitu Min Aung Hlaing cu kal aa tim i “Putao ah Min Aung Hlaing a rat ahcun kan kah lai” tiah Putao PDF nih Oct 3, tuzing ah ralrin peknak cathanh an chuah. Ralrin peknak cathanh an chuah lawng a si lo. Putao khuapi luhnak i ralhrang nih mi lut-chuak an check nak Mulashidi Gate cu Oct 3, tuzing suimilam pakhat hrawngah Putao PDF nih hriamngan he hriamhme he an kah fawn.
Putao PDF nih cun Mulashidi gate an kahnak ah ralhrang lei a thimi an um kho, ralhrangbu hruaitu Putao rat aa timhmi cu kan duh lo, a rat chih ko a si ahcun kan kah hrimhrim lai tiah cathanh an chuahmi a si. Hi cathanh an chuah hlan zongah Putao ah Min Aung Hlaing a ra lai ti thawng a len hmasa lioah Putao PDF nih kahdohnak thok dingin timhcia kan si tiah an rak thanh bal cang. Ref: Khet Thit Media
Leave a Reply