CDF-Mindat le SAC ralkap Kahdohnak Ah SAC Ralbawi Pakhat Le Ralkap zeimawzat An Thi!: Nizaan June 14, ah SAC ralkap le CDF-Mindat kar hmun li ah kahdohnak a chuak i SAC ralkap hna nih khuachung mipi umnak inn ah lut in checkhlatnak an tuah, inn ngeitu Nu hna cu an tukvelh hna i, phaisa sing 100 leng an i kalpi tiah theih a si.
Nizaan June 14 ah a cangmi kahdohnak ah SAC ralkap ralbawi pakhat telh in ralkap thimi zong an um i, hliamhma tuar zong an tam tiah theih a si. SAC ralkap nih church pastor pakhat an tlaih i an kalpi. Nihin June 15 tiang ah an thlah rih lo tiah theih a si.
Nihin June 15, zinglei ah Latmon(လက်မွန်) khua in a kirmi SAC ralkap nih KyanṬaw(ကြံတော) khuami 6 cu an tlaih i an kalpi hna. Chunhnu hrawng ah Mindat khuachung in khualeng lei khua hna ah hriamngan an thlah tiah theih a si.
Yephyu Peng Ah Khuami Pakhnih SAC ralkap Kuttang Um Pyusawhṭi Nih An Thah Hna: Tanintharyi ramṭhen Hṭawai pengkomh Yephyu peng, Eakanih(ဧကနိ) khua ah Ko Myo Ko le Ko Yan Pyine Soe tiah theih khuami pahnih cu SAC ralkap kuttang um pyusawhṭhi nih an tlaih hna hnu ah an thah hna. Cun, NLD party ṭanhtu U Kyi Ngway inn zong bomb puahhnawh in an hrawhpiak tiah theih a si.
June 15, zinglei suimilam 4:00 hrawng ah Ko Myo Ko le Ko Yan Pyine Soe cu an umnak inn ah luhhnawh in an tlaih hna hnu ah Watchaung(ဝက်ချောင်း) khua hleidonh pawng ah an thah hna i an ruak cu an hlonh, tiah tualchung mi pakhat nih a chim.
“Khuachung ah meithal thawng le bomb puah thawng a tam ngai i, khuami pahnih thah an tonnak hmun pawng ah pyusawhṭhi Sunye(စွန်ရဲ) phu hmahthahnak catlap an pharhmi hmuh a si,” tiah tualchung mi pakhat nih cun a chim.
Cun, NLD party țanhtu U Kyi Ngway cu a umnak inn ah pyusawhṭhi phu nih tlaih ding in an luh hnawh i, amah an hmuh lo caah a inn cu bomb puahhnawh in an hrawhpiak tiah theih a si. NLD party ṭanhtu pakhat si ve mi U Myo Thein zong tlaih ding in a inn ah an luhhnawh ve i, amah an hmuh ve lo caah a fanu cu hriṭem buin an kaltak tiah Aekanih(ဧကနိ) khuami pakhat nih a chim. Cred : The Chin Post
Leave a Reply