CDF Le Ralhrang Kahdohnak Thawng An Hun Thanh Cang

Chin ramkulh, Hakha he a neihnak khua pakhat ah hmunhma zohfelnak a tuahmi ralhrang phu hna le CNA, CDF phufonh kar ah November 15 le 16 ni hna ah kahdohnak a chuak. Ralhrang phu lei in minung 3 an thi, minung 14 nih hliamhma an tuar cun ralhrang kuan le an hmanmi thilri hna cu kan lak tiah CDF-Hakha sin in theih a si.

Chin ralkap phufonh hna nih ralhrang phu sinin an lak khawhmi thilri hna cu ralhrang uniform, kuan, kuan bawm, kut cheh bomb le phone hna an si. Hakha pawng kahdohnak a dih hnu ah ralhrang phu hna nih khauchungmi hna cu tlai in lam hmuhsak tu ah an hman hna tiah Chin ralkap CNA in bia chimnak nawl ngeitu Salai That Ni nih a chim.

“November 15 ni zaan ah Hakha pawng khua pakhat ah hmunhma zohfelnak a tuahmi ralhrang phu minung 50 hrawng le CNA,CDF phufonh kar kahdohnak a chuak. Ralhrang phu lei in minung 1 a thi, hliamtuar zong an um. November 16 ni zinglei tuante ah kahdohnak a chuakthan, ralhrang lei in minung 1 a thi than cun, hliamtuar zong an um.

Cun ralhrang phu hna cu Hakha lei ah hnu an tolh, a tu ah theihmi cazin hi ralhrang phu nih lam hmuhsaktu ah an tlaih mi khuami hna sin in kan theih than” tiah Chin ralkap Salai That Ni nih a chim. Cun November 16, zaan ah Hakha khuachung um ralhrang phu hna nih umhmun an khuarnak kin-sakhan 3 cu Chin ralkap phufonh nih luhhnawh in an kah hna, Chin ralkap lei in hliamtuar an um lo.

Zaan ah luhhnawh in kahdoh an si caah ralhrang lei in a thi an um le um lo fehter khawh a si lo tiah Salai That Ni nih a chim. Khit Thit Media