CDF Le Ralhrang Kahdohnak AHnu Bik Hnu Bik Thawngthar An Thanh Cang

Chin ramkulh Kanpalat palik sakhan in a chuakmi ralhrang phu hna cu Chin mi zapi vengtu ralkap phu Kanpalat nih nihin December 7 zinglei suimilam 8:00 ah bawh in doh an ton caah ralhrang minung 2 an thi, minung pakhat nih fakngai in hliamhma a tuar tiah theih a si. ” Palik sakhan in a tummi ralhrang phu hna cu bawh in doh an si,

Zinglei suimilam 8:00 in 9:90 tiah kahdohnak a chuak, ralhrang minung 2 an thi i pakhat nih hliam a tuar tiah” CDF Kanpalat chungtel pakhat nih a chim. December 3 le 4 ah Kanpalat khuachung high school sianginn hmunhma chungah umhmun khuarmi ralhrang phu hna cu kahdoh an si i ralhrang minung 4 an thi,

Minung 1 nih fakngai in hliamhma a tuar tiah CDF-Kanpalat nih cathanh an chuah. Cun Mon ramkulh Tathung peng Thungbukyi khua pawng ah cawlcanghnak a tuah mi ralhrang phu hna cu December 6 ah KNLA brigade 1 phu,Tathung mi zapi vengtu ralkap TPG hna phufonh nih bomb puahhnawh in an doh hna caah ralhrang minung 2 an thi i,

Ralhrang lei minung 2 an kee a bul tiah TPG nih cathanh a chuah. KNU brigade 1 hmunhma Thungbukyi khuapawng ah hmunhma lonh in a ra mi ralhrang phu hna lamcu December 5 ah KNLA le Tathung mi zapi vengtu ralkap phufonh nih bomb puahhnawh in an doh hna caah ralhrang minung 1 a thi i, minung 2 nih hliamhma an tuar tiah theih a si. Khit Thit Media

Nizan December 7, 2021 ah khan Lawngtlai District chung i party pathum; Bharatiya Janata Party(BJP), Indian National Congress (INC) le Zoram People’s Movement(ZPM) District Headquarters hna nih, India Phunghrampi 125th amendment tuah ding in rian an tuan cuahmah lio ah Mizoram cozah nih a rak kham/doh hna cu Lawngtlai khuapi ah duhlonak an langhter.

Hi 125th Phunghrampi hi an remh khawh ahcun Mizoram thlanglei i Autonomous District Council pathum, Lai, Mara le Chakma hna nih nawlngeihnak ngan deuh an ngeih khawh lai caah Mizoram cozah nih hin an duh lo, tiah an langhter. Mara khuapi Siaha le Chakma khuapi chawngte hna zong ah duhlonak an langhter.

Nizan khuakik le ruahsur lak ah Lawngtlai khuapi ah cun khua laifang Areopagy ah tonpumhnak caan an ngei hna. Hi caan ah hin phunghrampi remh kongkau ah Mizoram cozah nih comment an peknak ca copy vialte an duah dih i, an biachim(comment) khirh than ding in mizapi an au. Mizoram cozah hruaitu Chief Minister Pu Zoramthanga zong a rian dinhtak ding in an duhnak an langhter fawn.

Hi caan ah hin Lawngtlai District chung Party pathum BJP, INC le ZPM hna leng ah siangngakchia bu Lai Students’ Association (LSA) hna zong an i tel ve. Tonpumhnak ah biachimtu Party pathum hruaitu hna nih cun Mizoram Cozah tlaitu MNF party hi Lai, Mara le Chakma hna thanchohnak a duhlotu le Autonomous District Council (ADC) cu hrawhpiak an rak timh tawn nak kong an chim.