Chin ramkulh Mindat Khuiring khua ah December 22 chunhnu suimilam 2:00 hrawngah ralhrang phu le Chin mizapi vengtu ralkap CDF kar kahdohnak a chuak i cu kahdohnak ah cun ralhrang lei in minung 3 an thi,minung 5 nih hliamhma an tuar tiah Mindat peng phu sin in theih a si.
Kaphnihkar kahdohnak a chuah dih hnu ah Khuiring khua um ralhrang phu hna rallam cu Thalawng khua lei in a rami ralhrang phu hna he i fon in, Myinchitlangcung ah umhmun an khuar tiah theih a si. Khit Thit Media
Ukraine le Russia buainak boruak aa leh cuahmah lio ah North Atlantic Treaty Organisation(NATO) aa hrawlh ve a si ahcun an caah harnak faakpi a chuak lai, tiah hronak bia Russia President Vladimir Putin nih a chim. Russia Ralkap General rual hmai ah Russia President nih hin Biachimnak a ngei i,
NATO nih Europe nichuahlei ah ralkap an chiah mi hna kirter ding in a duh kong a chim. Nitlaklei ram hna nih an kan nam peng ahcun ralkap thawnnak le ralthuam in kan rak leh ve hna lai, tiah a chim. Atu ah hin Russia nih Ukraine ramri ah ralkap sing leng le ralthuam zeimawzat a chiah cang i, a dang a chiah chap cuahmah.
A luancia zarh hnih hrawng ah khan Russia president hi US Presdent Joe Biden nih biaruahnak a ngeihpi nain an biaruahnak tlam tlin dawh a si lo, zual lei a panh cuahmah. US Secretary of State, Antony Blinken nih cun, “Russia nih a lung a thumh lo ahcun a herhning teirul kan cham ko lai,” tiah a chim ve.
Russia le Ukraine an buai hin US nih cun Ukraine ram innpa Lithuana ah anti tank missile zeimawzat a zuar, hihi Russia nih cun a rem lo ngai tiah a lang. US Secretary of State nih cun Russia nih an rak tuk sual hna zong ah ralring tein an um cia dih kong a chim rih. Kum 2015 le 2016 kum i Russia nih Ukraine Electric Power luhnak a rak phih bantuk a can sual a si zong ah timhcia rein an um kong an chim. The Chin Post
Leave a Reply