Britain Prime Minister Boris Johnson Nih Putin He Ceihhmmainak Ngeih Cu Tisartlam He Ceihhmainak Ngeih He Aa Khat
Russia president Putin tonbiaruahnak tuah cu Tisartlam he tonbiaruahnak bantuik a si caah Russia le Ukraine kar ah Toonbiaruahnak ceihhmainak pawl cu a tlam tling kho lai lo taih Britain Prime Minister Boris Johnson nih India ram ah khual tlawnnak a kal lai ah a chim.
Putin he ceihhmainak ngeih cu Putin a kut kee pawl a kaa chung a phak tikah Tisartlam he ceihhmainak ngeih bantuk a si tiah Britain PM Boris Johnson nih a chim i, nitlak lei ram hna nih Ukraine ram cu petzulhin raltuknak hriamnam pawl bomhnak pek dingah a biapi tuk mi a si tiah a chim.
Russia Ralkap Nih Ukraine Nichuahlei Um Kreminna Khuapi An Lak Khawh Cang! Russia ralkap hna nih Ukraine nichuahlei cu fak deuh chinchin in a tuk peng i, Nichuahlei um Khuapi Kreminna zong an laak khawh cang. Kreminna Khuapi hi minung 18,000 umnak khua a si i, Luhansk region ah Russia nih Khuapi an laak hmasa bik mi a si.
Luhansk region Governor Serhiy Gaidai nih cun, “Kreminna cu Russia kut ah a um cang,” tiah cawn nihnih ni ah khan a chim. “Ukraine venghimtu ralkap hna cu hmundang ah an ṭhial dih cang i, hmundang ah Russia ral an doh cang,” tiah a chim. Russia nih Kreminna khuapi la ding hin hmunkip in missile in a kah tiah a chim i, civil 200 hrawng an thi, tiah cozah nih a chinchiah nain a taktak ah cun hinak in an tam ṭheo lai, tiah a chim chap.
Russia nih cun february 24 khan Ukraine tuk hi a thok i, special millitary operation tiah cu tukdohnak cu min aa sak. Hi tukdohnak ah hin civil mi kan hrial hna, tiah Russia nih an chim nain Ukraine nawlngeitu hna chinchiah ning ah civil mi 20,000 leng nunnak a liam cang. Tuzarh cawn nikhat ni khan Ukraine nichuah chaklei cu biatak tein Russia nih a nam ṭhan i, khuate tampi an luhhnawh lengah Khuapi ngan deuh cu missile in an kah hna.
Hilio ah Mariupol khuapi i, Ukraine ralkap tlawmpal le civil mi tlawmpal a taang rih mi hna zong hmun pakhat an i chang peng rih i, Russia ralkap lei nih an sin ah i ap ding in an thanh ṭhan hna nain atu tiang an duh rih lo. Russia ralkap nih cun an sin i an i ap duh lo ahcun an dihlak in civil mi he kan in thah hna lai, tiah an hro hna. President Zelenskyy zong nih Mariupol khuapi i a taang rih mi Ukraine mi hna dirhmun cu a ṭha lo ngai, tiah a chim i, Russia ralkap nih lam an kham dih caah ei le din pekchanh khawh zong an si lo, tiah a chim. Russia ralkap hna nih Mariupol chung um mi a thong leng an rak thiarchuah mi hna cu nihin ni tiang khoika dah an chiah hna kan hngal ti lo, tiah a chim.
Leave a Reply