Nizaan zaan lei suimilam 6:00 hrawngah Sagaing ramthen, Tantse, pengkulh, Singsaa khuate in chak lei ah a um mi PDF hna ah SAC ralhrang le mipi kan ralkap karah kaphnih in kandohnak a chuak i, SAC ralhrang hna nih PDF sakhan cu an laak piak hna pinah Hrimnam pawl zong an laak piak hna i, eidi chiti le facang tibantuk zong an laak piak chap hna tiah theih a si.
Cu bamntuk thiamthiam in nizaan zaang lei suimilam 2:30 hrawngah Sagaing ramthen, Kalay Myo pengkulh , Uh Yin khuate lei ah a um mi mipi kan ralkap Kalay-PDF tatyin 8 sakhan cu SAC ralhrang nih an kahdoh i SAC ralhrang nih an sakhan an lak piak hna pin ah an hmanmi hraimnam le thilri tel in eidin facang le chiti tibantuk zong an laak piak hna tiah theih a si.
Kalay , Tahan ah nihin May 23 zing ah SAC ralkap 10 leng nih zulh mi mibu nih innkhat hnu innkhat in meters box an chek tiah theih a si. SAC ralkap hna nihcun RPG bantuk hriamngan hna an i put tiah mit hmutu pakhat nih a chim, ” Meters box an rak zoh, Cun May 29 ah Electric zung ah rak ra uh an kan ti. Inn chung tiang in an lut i cheknak an tuah. Meters box chek lawng si lo in a dang an i timhtuah mi a um theo lai ” tiah a chim. Kan hnuzarh thok in SAC ralkap hna he hmunkhat ah Tahan, TaungPhila veng hna ah inn khat hnu inn khat meter box an chek bal cang.
Nizaan zaan lei sang suimilam pa 2:oo hrawngah Magwe ramthen, Gangaw pengkulh, Sing Myo khuate pawngah SAC ralhrang nih kahdohnak hmunhma thianhtlimnak an tuah lio ah PDF hrimnam kut in tuah mi meithal zuun 3, Tuumi meithal zuun 3, kut in tuah mi bomb lungruk telin hraimnam a dangdang an laak piak hna tiah theih a si.
Nizaan Sagaing ramthen, Depayin pengkulh, Inpin khuate pawngkam ah SAC ralhrang nih hmunhma thianhhlimnak an tuah lio ah PDF he kahdohnak a chuak i, PDF minung pa 6 hna nih ram le miphun caah an nunnak an pek i, SAC ralhrang nih meithal zuun 6, kutin tuah mi meithal zuun 6 le Keypad phone pakhat tel in hraimnam dang kan lak piak hna tiah SAC ralhrang nih thanhnak an tuah.
Cun May thla ni 21, zaan suimilam 7:30 hrawngah Sagaing ramthen, Ye Oo pengkulh, Inpin khuate pawngah SAC ralhrang nih hmunhma thianhhlimnak an tuah lio ah mipi kan ralkap PDF pawl he kahdohnak a chuak i, SAC ralhrang nih Drone pathum (Anti Drone Gun ) an laak piak hna tiah theih a si.
Cun Thazaang 80 in rallam a sial mi SAC ralkap hna cu Pakokku peng, TanhKyi Taung nitlaklei lam hmun pakhat ah Myint Che – Kyun Chaung PDF ( MC – KCDF ) tel in ttangtti phu hna nih an kah hna i kaphnih kahdohnak fak piin a chuak tiah MC- KC DF i tuanvo ngeitu G 3 nih a chim. ” Nizaan ah SAC ralkap hna cu kan ruah ning bantuk tein thazaang 80 hrawng in rallam an sial, Kanmah lei nih hriamngan in kan kah hmasa hna i kan hmai ah minung 2 an rilh ko khi kan hmuh. Minung 20 hliam an tuar ti zong kan theih ” tiah a chim.
Cu SAC ralkap hna cu ShweBo peng, SikKhun khua ah thazaang 150 leng an phan i cu chung ah SAC ralkap 80 leng cu Bagan lei in tilawng in an kal i Pakokku lei ah rallam an sial tiah theih a si. Myint Che – Kyun Chaung mizapi vengtu ralkap phu ( MC – KC DF ) le SikPhyo chaklei mizapi vengtu ralkap ( NSP) hna i bawm in an kah hna. Mipi ralkp lei in ralkap 1 hliam a tuar i a hliamhma thinphan ding um lo tiah MC – KC- DF nih cathanh an chuah.
Chin ramkulh, Mindat khua ah umhmun khuarmi SAC ralkap nih, Madat khua lei ah nihin May 23 zing sml 8:00 hrawng ah hriamngan voi tamtuk an kah, tiah theih a si. Hriamngan kuan nih kum 11 hrawng ngakchia pakhat a khen caah a ke bul. Kum 40 leng nu pakhat zong a khen caah a lu ah aa hliam i pina inn 2 zong a khen caah an rawk dih, tiah CDF-Mindat nih cathanh an chuah. Madat khua cu Mindat he hmaitonh in a ummi khua a si i, vanlawng lam in tah ahcun meng 3 hrawng lawng a hlami a si. Nizan May 22 zan sml 10:00 hrawng ah Mindat khua meithat zung ah umhmun khuarmi SAC ralakp cu, CDF-Mindat nih an va kah hna caah 2 an thi. CDF-Mindat lei in a thimi le aa hliammi um lo tein hnu an kir kho, tiah theih a si.
Leave a Reply