Breaking,Nizaan Kahdohnak Ah SAC Ralhrang Nih Pingpalo In Thawng An Zamh!!

Nizaan Thantlang Kahdohnak Ah SAC Ralhrang Media Nih Pingpalo In Thawng A Zamh

“Nizaan zinglei suimilam 9:00 hrawngah Chin ram, Thantlang pengah Tatmadaw ralkap  hna nih hmunhma thianhhlimhnak an tuah lio ah sahrang CDF pawl he kap hnih in kahdohnak a chuak i, tatmadaw ralkap lei hliam tuar le thi mi um loin an kir tthan kho i, CDF-Thantlang ruak pahnih le India chuah mi meithal zuun hnih, kuan 5, kut in tuah mi bomb lung 4 hna cu CDF an laak piak hna.” tiah SAC ralhrang Media a si mi Firty Two News nih pingpalo in thawng a zamh.

Cun nizaan zaan lei suimilam 1:00 hrawngah Sagaing ramtthen, Kalay pengah Tatmadaw ralpah hna nih hmunhma thianhhlimnak a tuah lio ah Kalya myo peng khuate inn hna ah PDF phu nih an laak mi Meithal (Tuumi) zuun khat, kut in tuah cuah mah lio mi Meithal zun khat le hraimnam dang hna cu Tatmadaw ralkap hna nih an laak piak hna tiah thawngdiklo a phozar tthan.

Nizaan zaan lei suimilam pa 4:00 hrawngah Sagiang ramthen, Monywa khuapi, Tatlayet sang hmunhma pa (1) San Ngeu Yawng lam ah a um mi Daw Aye Aye Ma timi dalaan nu cu PDF kan ralkap hna nih meithal in an kahthah tiah theih a si. Magwe ramthen, Pakokku khuapi a hmat (2) sang, Sar Yi Tan lam ah a um mi Mipi kan ralkap a bomtu Zaw Zaw Lwin cu SAC ralhrang nih an tlaih tiah theih a si.

Cu bantuk thiamthiam in Magwe ramthen, Pakokku pengkulh, Paantanchan khuate penghfonh, Myoh Luu Kaan khuate ah a um mi Mipi kan ralkap PDF hna he pehtlai in rian a tuantti tiin an ti i Paan Way Lin cu SAC ralhrang nih an tlaih tiah theih a si.

Buainak hna, hramhram thiltuahnak hna , nuhrin covo buarnak hna le hremnak hna chung in a zaammi Nuai 100 an phanh hi a voikhatnak bik a si tiah United Nations Officer for the Coordination of Humanitarian Affairs (UNOCHA) canthanhnak ah an langhter. Myanmar ram telh in Afghanistan , Burkina Faso, Congo, Ethiopia le Nigeria ram hna ah inn le lo a zaamtak mi hi kum 2021 dongh tiangah Nuai 90 an phan tiah a langhter.

Cun kum 2022 hramthok in Ukraine-Russia raltuknak ruangah Nuai 14 nih inn le lo an zaamtak. Myanmar ram ah cun SAC ralkap nih hramhram in nawlngeihnak a lak hnu kum khat leng caan chungah ralzaam thar 590,100 tiang an i chap tiah UNOCHA nih kum 2022 May thla thok a report ah a langhter. A hlan lio te ah a rak um cia cangmi ralzaam 346,600 he fonh ahcun a tulio Myanmar ram ah ralzaam 936,700 leng an si tiah a langhter.

Hriamtlai buainak a fah khunnak Chin ramkulh , Magwe ramthen le Sagaing ramṭhen hna ah ralzaam thar 330,000 leng an a tambik an i chap i a tangmi cu Karen, Kayah, Shan, Mon, Taninthary le Bago ramṭhen hna in an si. Nuai 100 a lonhmi vawlei pumpi ralzaam kan zoh a si ahcun ṭih a nung tuk i, buainak dihter zok a hau cang tiah UN nih a chim.

Mizapi nih SAC ralkap dohnak( D-Day) cu 2021 September 9 ah NUG Acting President Duwa Lashi La nih a rak thanh. Atu NUG Defense Ministry cathanh an chuahmi ah 2021 June 1 in 2022 May 17 tiang, thla 11 chung ah SAC ralkap a thimi zat cu NUG nih a langhter.

SAC ralkap nih hrmahram uknak an lak hnu in mizapi nih duhlonak langhter a si caah SAC ralkap nih a phunphun in hremnak, tlaihkhihnak le thahnawnnak an tuah. 2021 April in mah le ngeihmi hriamnam he SAC ralkap cu doh cio a si. NUG nih 2021 May 5 ah PDF a dirhnak kong a thanh i, hmunkip ah PDF an karh. SAC ralkap thawng petu Dalan pawl zong an doh hna.

PDF a dirka ahcun tlangcung hmun cheu khat lawng ah SAC ralkap doh a si i, atu ahcun Yangon, Mandalay le Naypyitaw khua ngan pawl telh in hmunkip kakip ah SAC ralkap le anmah lei ṭangmi hna cu nifatin in an thi. PDF nih an hipmi, an ukmi hmunhma hna ahcun mizapi uknak an ser cangnak zong NUG Defense Ministry nih a langhter. Sagaing ramṭhen, Magway ramṭhen, Kachin Chin, Karen le Kaya ram ah kahdohnak a zual tuk caah SAC ralkap thazaang tam tuk an chap. Tualchung mi inn le lo an khanghmi a tam chin lengmang.

2021 Febuary 1 ni thok in, 2022 May 15 tiang ah kahdohnak voi 4,679 nak tlawm lo a chuak, tiah Institute for Strategy and Policy- Myanmar nih cathanh a chuah. An cathanh cu 2022 May 23 zanlei ah an chuahmi a si i, cu chung ah SAC ralkap le Tlangcung mi hriamtlai ”EAOs” kar kahdohnak hi voi 3,107 a chuak, SAC ralkap le PDF kar kahdohnak hi voi 1,380 a chuak. SAC ralkap le EAOs, PDF ṭangṭi phu kar kahdohnak hi voi 106 a chuak, anmah le anmah EAOs kar kahdohnak hi voi 41 a chuah pin ah SAC ralkap le hngalh lomi phu hna kahdohnak hi voi 20 nak tlawm lo a chuak, tiah an langhter.

Kahdohnak cu Karen ramkulh le Sagaing ramṭhen ah voi tam bik a chuak. Inn 5,701 a kangh pin ah kahdohnak ruangah tualchung mi 46 nak tlawm lo an thi. Sagaing ramṭhen peng 51 chung ah SAC ralkap le PDF kahdohnak a zual caah, May 15 chung ah tualchung mi 38 nak tlawm lo an thi, tiah an langhter.

Hramhram in uknak an lak hnu in tualchung mi 5,646 nak tlawm lo an thi i, lamzawh lio a thimi le an tlaihmi hna chung in a thimi fonh ah 1,831 an thi. SAC ralkap nih thawng fianternak an tuah lio le USDP Chairman nih a chimnak ah Dalan 3,107 thah an tong. Hriamtlai kut in a thimi hi 690 an si i, thisen din in biakamnak a tuahtu phu in 18 an thi, tiah theih a si.

Pakukko peng Kankyisu(ကံကြီးစု) khua chaklei ah mizapi thil a fir i, a tlerh khawnhtu SAC ralkap pawl cu, May 24 ah Myint Che Kywin Chaung(မြစ်ခြေကျွန်းချောင်း) PDF(MC – KC DF) nih Phone mine an puahhnawh hna caah SAC ralkap 13 an tihi, tiah theih a si. Nihin May 24 zinglei ah Tankyitaung(တန့်ကြည့်တောင်) lam hmun pakhat ah motor 2 in a rami SAC ralkap pawl cu kan kah hna, tiah (MC – KC DF) G 3 nih an langhter.

“Nihin May 24 zing ah phone in mine kan hmanh mi Bomb cu SAC ralkap pawl nih an lak i, Light Truck cung ah an khin lioah kan puah. Hlan lio zong ah kan phummi bomb an rak lak bal cang. Nihin zing ah motor cung ummi SAC ralkap 13 an thi,” tiah an langhter.
‌ Ral tuknaknak caah Myint Che Kywin Chaung(မြစ်ခြေကျွန်းချောင်း) PDF(MC – KC DF) nih meithal le kuan-zen kan herh tuk, rak kan bawm u, tiah G 3 nih an thanh.