BREAKING, Zualko! Falam-CNDF Nih Ram Le Miphun Caah Minung 6 Nih An Nunnak A Peek e!

Kahdohnak ah a nunnak liammi hna cu Salai Alexander Sang Kung Thang le Stephen Biak Tha Thawng an si i Salai Stephen Biak Tha Thawng tu cu a ruak an char khawh nain ” Salai Alexander Sang Kung Thang tucu kan hmai deuh a si caah zeitihmanh in a ruak kan lak khawh lo caah, kan lung a ttha lo kan ngeih a chia, A nih hi mino te a si i kum 17 a tling kate a si ” tiah amah he ral a doh tti hawi pakhat nih The Chin Post ah a chim.

Sii-ai man a fah caah tlamtling in sii kan chia kho rih lo, emergency caah papek in chiah chung a si. Cun, kan ralkap hna zong an i manh caan ah carel ding le, mipi hna zong nih phaisa liam lo tein ca an rel khawhnak ding ah library kan tuah chih, tiah Thein Hngait (သိန်းငှက်) battalion 1 in ṭuanvo ngeitu pakhat nih a chim.

Sii-ai cawknak caah le Cauk cawknak ah bawmhnak a petu dihlak cung ah kan i lawm tuk ti in Thein Hngait(သိန်းငှက်) battalion 1 CDF-Mindat nih an thanh fawn. Tlamtling in pehzulh a si khawh nakhnga bawmhchanhnak pek a duh mi hna nih Thein Hngait(သိန်းငှက်) battalion 1 CDF-Mindat page ah pehtlaihnak tuah khawh a si, tiah CDF-Mindat nih an langhter.

Sagaing ramṭhen chung SAC ralkap nih an khangh mi khua hna chung in khua pakhat ca ah Kya Tanat(ကျားသစ်နက်)-PDF nih chungkhar pakhat ah 50,000 Mmk bawmhnak an pek hna, tiah theih a si. Chungkhar 104 ca ah sing 52 tluk cu inn an sak ṭhan khawhnak ding caah kan bawmh hna, tiah Kya Tanat (ကျားသစ်နက်) PDF in ṭuanvo ngeitu pakhat nih a chim.

“Phaisa cu umnak ding ca ah a har mi mizapi umnak caah hlut mi a si. Mipi hi kan herh bik hna le kan zei zongte an si caah, mipi an harnak cu kan harnak a si ve,” tiah Kya Tanat (ကျားသစ်နက်)PDF in ṭuanvo ngeitu nih cun a chim. Sagaing ramṭhen chung ah khua tampi cu SAC ralkap nih meikhangh in an hrawhpiak hna i, mah umnak ah um ngam lo in ralzaam dirhmun a phan mi minung 2,40,600 an um lio, tiah UNOCHA Myanmar nih a thanh.

ChawngOo-Pakokko Karlak Ah SAC Ralkap Motor Bomb Puahhnawh An Tong: ChawngOo-Pakokko lampi ah a um mi khua pakhat ah khuachung mipi hna thilri a firtu, SAC ralkap motor 3 in a kal mi hna cu bomb puahhnawh an ton caah a thi mi an tam, tiah Sagaing ramṭhen battalion-4(MSPDF) nih nihin May 10 ah an thanh. Nizaan May 9, zinglei suimilam 4:45 hrawng ah SAC ralkap hna cu bomb puahhnawh an tong i, Bomb puahnak ah cun Myinchain pengkomh battalion 1(27 revolution force), Natogyi Regional Defense Force le Myinchain (မြင်းခြံ) pengkomh battalion 3(Mayelatt PDF) phufonh hna an i bawm, tiah theih a si.

“SAC ralkap hna cu bomb lung 3 puahhnawh in doh an si i, motor pakhat cu a rawh ning zong a fak ngai,” tiah MSPDF in ṭuanvo ngeitu nih People’s Spring ah a chim. Kahdohnak ruangah minung a thi mi zat cu fiang tein langhter a si lo. May 7 Myaung pengchung ah rallam a sialtu SAC ralkap hna cu bomb puahhnawh in doh an ton caah minung 2 an thi i, midang 5 nih fak ngai in hliam an tuar, tiah MSPDF nih a thanh.