Ukraine i Mipi Vote Thlaknak a Phichuak zoh tikah Russia he i Fonh dawhdang an si
================================================================
Ukraine ram chung pengkulh 4 Russia he i fonh dingin vote an thlakmi a phichuak zoh tikah, Russia he i peh ding, ti a fiang ko cang, tiin mah ka pengkulh 4 i bawi pawl nih an chim. Mah hi vote thlaknak hi UN ah kan hnonpiak hna lai, tiin US nih timhlamhnak a ngei.
Russia nih Ukraine pengkulh 4 a lak than ah cun nawlnolh in a chungah phihkharnak kan tuah rih lai, cun Ukraine hi $1.1 billion man hriamnam kan bomh chap rih lai, tiin US nih a chim.
Kahdohnak nih Russia pipeline ngan 2 a hrawh (a zuhter), tiin Germany, Sweden le Denmark nih an chim hnu ah, European energy runvenpiak an i timhmi US Secretary Blinken nih a chim. Zinan a zuhtertu mizei a si hi theih a si rih lo. Pengkulh 4 i vote an thlakmi vialte chungin 87% in 99.2% tluk nih Russia he i fonh dingin vote an thlak, tiah Russia nih rian an khinhmi bawi pawl nih an chim. Mah hi pengkulh 4 lak an si mi hi Russia upper house of parliament nih Oct. 4 ah khin fehternak a tuah te lai.
“A phichuak hi a fiang ko. Russia in kan in don hna!” tiin khahlan Russian President Dmitry Medvedev nih a chim. Pengkulh 4 chungah cun Russia nih rian an khinhmi bawi pawl cu vote kuang an i ken hna i inn khat hnu in khat in an chawhhnawh hna. Mah hi tuahsernak hi Ukraine pengkulh 4 hi phungningtein Russia nih a lak ko, tiin fehternak tuah an duh caah a si. Kan cohlan kho lai lo, tiin Ukraine le Nitlak ram nih an chim.
Mah bantuk zoh a chiami tuahsernak hi ram mipi vote thlaknak (referendum) tiin a min bunh ding hrimhrim a si lo, tiin Tuesday ah khan Zelensky nih a chim. Ukraine vawlei ah zeibantuk thlennawnnak hmanh a um rih lo. Russia nih a ralkap pawl kirter than dingin tuanvo a ngei, tiin UNSC ah biachahnak luhpi dingin US ai timlam cuahmah. “Mah bantuk zohchia khenhru a si mi referendum hi cohlan a si sual ah cun, chinh khawh ti lo mi thingkuang a awntu thil thalo ah ai chuah te lai,” tiin US palai Linda Thomas-Greenfield nih a chim.
UNSC ah hin Russia nih veto tuahnak nawl ai ngeih. Asinain, SC i veto a hman a si ah cun, mah hi bia su hi UN General Assembly ah US nih kan luhpi thiamthiam lai, tiin Thomas-Greenfield nih a chim. “Meithal in hmuahchih bu i vote thlakmi paohpaoh cu za a longmi le ai ningcangmi a si kho bal hrimhrim lo,” tiin Britain Deputy UN Ambassador James Kariuki nih a chim. Tutan Referendum hi mipi duhnak le i thimnak phung zul bu tein tuahmi a si, tiin UN meeting ah Russia UN palai Vassily Nebenzia nih a chim.
“Kyiv nih a palhnak ai theih lo chung paoh le, a mipi hna an duhnak kha ai hruaiter lo chung paoh le an ram lente a celhtu hna an duhnak tonghmanglo in a zulh chung paoh cu mah bantuk karhlannak hi ai pehzul peng ko rih lai” tiin a chim. Russia nih Ukraine pengkulh 4 a lak a si ah cun, Ukraine nih lak than a timh tikah, ‘Russia na kan doh a si’ tiin Putin nih a ti te ding khi a fiang ko.
Ka ram kilvennak ding caah ka nuclear hriamnam hman ka ngamh, tiin kan hnung zarh ah khan Putin nih a ti cang. Nuclear hriamnam siseh, vote thlaknak hmangin kan hmunhma an lak mi nih hin Kyiv hi a lungthin a pialter kho hlei lai lo. Russia nih an lakmi vialte lak than dih dingin hmai kan nawr peng ko rih lai, tiin Zelensky i a adviser Mykhailo Podolyak nih a chim.
Tutan Referendum tuahnak ah thazaang a chuahtu Ukraine rammi pawl hi ram leirawitu ah chiah an si lai i, a tlawmbik kum 5 thong thlak an i huah lai. Asinain, vote thla dingin hnek a si mi belte cu dantat an si lai lo, tiin a chim.
US Hriamnaam Kuatnak Thar, Tutan i kuat an timhmi hna lakah HIMARS le a zenkuan le raltuknak drone le radar systems a phunphun an i tel. Spare pass, training peknak le technical lei in bawmhchanhnak zong ai te lai, tiah theih a si. Ukraine hriamnaam a bomhmi kongah Russia nih US ralrin a pek than. “Nitlak ram nih Kyiv hriamnam a bomh tikah hin zeitluk an i palh, ti hi Washington nih ai theih rua lo…Kan Fatherland runvennak dingah karhlannak kan tuahmi hi a fek ngaingai, tiin Russia US envoy Anatoly Antonov nih a chim.
Vote an thlaknak pengkulh 4 hi a ningpiin Russia kut a phanmi pakhat hmanh an um lo. Ukraine nih hma an nawr cuahmahnak hmunhma an si lehlam. Donetsk ah khua 7, Zaporizhzhia ah khua 20, Kherson ah khua 35 Russia nih bomb in a kah, tiah Tuesday ah khan Ukraine general staff nih a chim. Ukraine nih Brianka bomb in a kah caah gas zung riantuan 3 an thah, pakhat an hlemh, tiah Luhansk ah Russia nih an chiahmi bawi Leonid Pasechnik nih a chim. “NATO nih an pekmi hriamnam nih hngakchia, nunau, tar le khua ca i riantuantu pawl an thah hna,” tiin a chim. Crd-Chelsea Bawi
Relchap, Myanmar ramchung ah nikhat chungah minung 350 leng nih Covid zawtnak an i chawnh, Myanmar ramchung ah Covid zawtnak i chawnhning a karhṭhan i nizaan September 27 ni khat chung ah Covid-19 zawtnak aa chawnhmi minung 356 an si tiah SAC ralkap kuttang um ngandamnak vuanci zung nih cathanh an chuah. Ngandamnak zung nih September 27, zaan suimilam 8:00 tiang cathanh an chuahning ah minung 12903 checkhlatnak an tuah hna i, cu chungah minung 356 sinin Covid-19 zawtnak an hmuh caah zatuak 2.76 nih cu zawtnak an ngei.
A tu ah Covid-19 zawtnak a ngei tiah langhtermi zat hi SAC ralkap kuttang um siizung, sii-khan ah aa zohtermi hna chungin hmuhmi a si caah a tu langhtermi nak in a lengah zawtnak ngeimi an tam deuh kho tiah mibawm chantu phu hna le ngandamnak lei rianṭuantu hna nih an chim.
Yangon, Dawpone peng tualchungmi pakhat nih “sangchung sii khan ah aa zohtermi mizaw an karh ngai, cu mizaw hna chungin a tam deuh cu Covid-19 zawtnak an si lai tiah ka zumh, an tak a sa, an khuh, a taksa fak mi an tam Covid-19 zawtnak check ah cun cu zawtnak a ngeimi an tam lai” tiah a chim. SAC ralkap kuttang um ngandamnak lei vunci zung nih mibupi umnak siangin le training kainak, zung cheukhat ah minung tampi zawtnak i chawnhnak a cang tiah September ni 15 ah media ah an rak chim.
Chin ramkulh chung ah, SAC nih onmi sianginn ah a kaimi siangakchia hna i nichiar an kaizat cazin cu SAC nih an lak!! Chin ramkulh chungah, SAC nih onmi sianginn ah a kaimi siangakchia hna i an min cazin le nichiar an kaizat cazin cu khuachung um SAC ralkap nih an lak tiah theih a si.
Nizaan September 27 thokin, Chin ramkulh, Matupi khua chung ah, cu sianginn kaimi min cazin cu an lak i, class chungah siangakchia zeizat dah um? tuni minung zeizat dah a kai kho? minung zeizatdah an bau? zeiruang ah dah an bau? ti mi pawl tiangin a kan hal dih.
Nichiar zongin cu cazin cu an kan lak te khawh men tiah siangcachim saya pakhat nih a chim.
Cu bantuk thiam in, Chin ramkulh Falam khua chung zongah, siangakchia hna nichiar an kaizat cazin cu, Tat-Yin-Hmu sinah an pek tawn tiah theih a si.
Falam khuachung lawng si lo, SAC nih sianginn an on nak hmun poah ah cu cazin cu an lak i, a baumi an um a si ah cun zeiruangah dah an bau tiin cachimtu saya/mah te cu an kan hal. Nichiar ti awkin, cu cazin cu an lak caah, cheukhat nu le pa cu zeiruangah dah si hnga tiah thinphang in an um ko tiah siangcachim sayamah pakhat nih a chim.
Chin ramkulh chungah, tualchung hriamtlaiphu(CDF) le CDM saya/mah hna i bawmin an onmi sianginn ah a kaimi siangakchia an tam caah, SAC nih an onmi sianginn ah a kaimi siangakchia hi mi tlawmte lawng an si tiah theih a si.
Kawlram Ramri Kong He Pehtlaiin Bangladesh Nih Tuluk He I Bawmin Kan Kalpi Lai, Kawlram ramri kongkau he pehtlaiin Bangladesh ram nih Tuluk ram he i bawmin kan kalpi lai tiah Bangladesh lei nih thawng an thanh tiah theih a si.
Kawlram cungah Tuluk hipkhawhnak a um ko caah ramri hrawnghrang i a cangmi thil he pehtlaiin Tuluk bawmhnak laak in kalpi an timh hi a si tiah theih a si. Ramri kongkau ah hin Bangladesh hi a lungre a theih pah caah Bangladesh Ambassador nih Tuluk cozah sinah a tubantukin bawmh a hal hi a si. SAC ralkap le AA hriamtlai kar lakah kahdohnak a zual chin lengmang caah ramri kongkau ah Bangladesh nih a tubantukin a kalpi hi a si tiah theih a si.
SAC cozah tangum remdaihnak phu le UWSP, NDAA, SSPP hriamtlaiphu tonnak an ngei, SAC cozah tangum ramdaihnak phu le WA hriamtlai UWSP, NDAA le Shan hriamtlai SSPP hna cu Naypyidaw zung pakhat ah September 27 ni ah tonnak an ngei tiah theih a si. Tonnak hmun ahcun SAC cozah tangum ramdaihnak phu hruaitu Bochoh Ya Pyae le UWSP in vice Chairman an i tel I biachimnak an ngei hna tiah theih a si.
SAC cozah phu leinih an duhmi le an duh ningin thil kalpi ding kong an chim hnu ah UWSP, NDAA le SSPP hriamtlai aiawh a kaimi hna nih an duh mi chimnak an ngei, cun ceihhmainak tlawmpal an ngei i a nikhatnak meeting an dih ter tiah theih a si. A nihnihnak tonnak cu September 28 ni (nihin) ah an tuah than lai tiah theih a si. Crd=The Chin Post
Leave a Reply