Rakhine ramkulh chung ah kahdohnak a chuak ṭhan khomi a si caah SAC ralkap an umnak pawngkam le an camp he naihnaimnak ah nan um hrimhrim lai lo, tiah mizapi ralrin peknak AA nih cathanh an chuah. Rakhine ram ah SAC ralkap nih an phummi bomb cu, Myinpia peng le Ann peng ah tualchung mi pahnih nih an i lamh sual caah an thi, tiah theih a si.
“Kawl ralkap nih Rakhine ram chung ka zakip ah thazaang an chap tuk, United League Of Arakan(ULA) nih biaceihnak, ngunkhuai kholhnak le ukhruainak a tuahmi cu hnahnawh an pek. Cu chung i rian a ṭuanmi hna zong tlaih ding in an tlerh hna, biaceihnak zung zong an kulh, SAC ralkap nih Rakhine-Muslim karlak ah rem lonak thiltuah an i tim,” tiah AA chim phuannak nawlngeitu Khine Tu Khah nih a chim.
Cu pinah SAC ralkap le AA karah i zumh lonak a zual hi a sau tuk cang. May 11 ah Kyauktaw umhmun khuarmi Kha Ma Ya 375 Battalion camp pawngkam ah, bomb an phummi a puah caah an lau i anmah le anmah i kahnak a chuak, tiah theih a si.A luancia caan ah AA ralbawi zik Htun Myat Naing nih Tainghmu General Htin Lat Oo zong ralrin a rak pek cang.
Remdaih Ton Biaruahnak A Kai Ding ALP Cu Rakhine Ram Mino Bu 24 Nih An Cohlang Lo, SAC ralkap nih remdaih ton biaruah sawmnak ah a kai ding Arakan Liberation Party(ALP) cu Rakhine ramkulh chung um mino bu 24 nih an cohlan lonak kong nizan May 15 ah cathanh an chuah. “Rakhine rammi hna ca ah a dang timtuahnak lam a um cang ko bu ah mizapi aiawh loin remdaih tonbiaruahnak an kai ahcun mizapi inn-lo, humhimnak ca ah a fekmi biakamnak a si lo i, zumh zong a um lo caah kan cohlan lonak a si,” tiah Rakhine Student`s Union in chimnak nawlngeitu Kyaw Naing nih a chim.
“ALP nih remdaih tonbiaruahnak ah kan kai lai an ti ko nain Rakhine rammi nih an cohlan lo ahcun pakpalawng a si ko. Rakhine ram mizapi ca ah kan tuaktan mi lam a um cang ko. Mizapi nih an cohlanmi bu lawng he remdaih ton biaruahnak kan tuah lai,” tiah a chimchap. Ton biaruahnak ah a kai ding ALP a cohlang lotu hi Rakhine Student`s Union telh in mino bu 24 an si. AA ralkap le ni chuahlei ṭangṭi phu 3 nih cun hi remdaih ton biaruahnak hi ṭha tein kan ngiat rih lai, tiah an chim. Tlangcung hriamtlai NCA minthu mi phu chung in phu 7 cu ton biaruahnak ah an kai lai i, NCA minthu lomi chung in phu 3 an kai ve lai, tiah theih a si.Ref. The Chin Post
Myanmar Ram Pumpi Nikhat Chung Kahdohnak Ah SAC Ralkap 84 An Thi, Myanmar ram pumpi huap May 15 nikhat chung kahdohnak ah SAC ralkap 84 an thi i PDF 3 an nunnak a liam ve tiah Khit Thit Media nih a langhter. Khit Thit Media nih cazin a khawmhsuat ning ah SAC ralkap a thi mi hna cu Sagaing ramthen , Kani ah 15 , Sagaing ramthen , Chuang Oo ah 6, Sagaing ramthen, Yinmarpin ah 19, Magwe ramthen, Myaing ah 4, Sagaing ramthen Kathar ah 4, Bago ramthen, Yeetashi ah 4, Tanintharyi ramthen Dawei ah 2, Shan, Karenni, phekone ah 10, Sagaing ramthen Minmu ah 18, Sagaing ramthen ShweBo ah 2 tiin an dihlak 84 an thi i Sagaing ramthen ah ah PDF 3 an nunnak liam ve.
A voi 31nak Sea Gameslentecelh zuamnak ah Wushu (Nangun) celhzuamnak ah Mg Thein Than Oo aa zuam i, Myanmar ram caah a pa 4nak sui laksawng a hmuh caah SAC ralhrang Ram Administration president Ralhrang Min Aung Hlaing nih a biakam bangin Sui Laksawng a co tu cu U.S dollar 3000 a peek tiah theih a si. Cu leng ah SAC ralhrang Min Aung Hlaing nih a rak chim cia mi a bia bangin Myanmar tangkaa kyats in ting 300 a co rih lai tiah theih a si.
Leave a Reply