Kawkareik- Myawady Lampi Kahdohnak Ah SAC Ralkap 80 Hrawng An Thi!
KNU nih umkalnak ah hman rih lo ding in theihternak cathanh an chuahnak hmunhma Myawady-Wawlay motor lampi Tebawbuu(သေ့ဘောဘိုး) khua pawng ah SAC ralkap le KNLA phufonh cu March 27 – March 29 tiang kahdohnak a chuak i, cu kahdohnak ah cun SAC ralkap 80 hrawng an thi, tiah theih a si.
Kawkareik (ကော့ကရိတ်)-Myawady motor lampi kahdohnak hi a fah tuk caah mizapi nih cu lampi cu caan karlak hmang rih lo ding in mizapi vengtu ralkap nih nawlnak an tuah.
Myawady-Wawlay (ဝေါ်လေ) motor lampi ah a ummi Tebawbuu (သေ့ဘောဘိုး) khua pawng zong ah nihin March 29 zinglei suimilam 3:00 hrawng in kahdohnak a chuak i, SAC ralkap lei a thi mi cazin zong hlat cuahmah rih a si. Kaphnih kahdohnak ngol a si hnu ah mizapi vengtu ralkap phufonh lei cu hliamhma tuar an um lo, tiah Cobra Column nih cathanh an chuah.
A luancia March 27 Tebawbuu(သေ့ဘောဘိုး) khua pawng kahdohnak ah SAC ralkap lei minung 61 an thi i, minung 28 nih hliamhma an tuar lengah a nung in minung 2 tlaih an si, cun, hriamthil zeimawzat zong laak a si, tiah theih a si.
SAC Foreign Minister U Wanna Maung Lwin China A Kal Lai
SAC Foreign Minister U Wanna Maung Lwin cu China Foreign Minister nih official tein a sawm caah China ram a tlawng lai, tiah theih a si i, hi kong hi SAC biachimnak nawlngeitu Zaw Min Htun zong nih a fehter.
China nih zeiruang ah dah a sawm ti cu hngalh a si lo i, SAC zong nih a ruang an chim lo. Tutan hi SAC nih uknak an laak hnu in official tein China ram a voikhat tlawnnak a si lai. Tutan SAC Foreign Minister China a tlawn ding kong ah Tipaw peng MP nih cun, “China nih SAC hi ASEAN hnatlaknak 5 zulh ding, Myanmar daihnak kong ah China nih a bawmh ding mi le Ramkhel buainak ah Palai tonbiaruahnak in tawlrel ding timi pawl a forhfial lai,” tiah a zumhning a chim.
SAC Vice- Chairman Soe Win nih cun SAC a kan cohlangtu ram tlawmpal te he lawng hmai kan fong ko lai, tiah a rak chim i SAC a kan cohlangtu hna cu China, Russia, India, Cumbodia le Laos ram hna an si, tiah a rak chim.
SAC Nih Nawlngeihnak A Laak Hnu 421 Chung Ah Minung 1714 Thah An Tong Cang!: AAPP nih March 28 tiang thawng a thanh ning ah Myanmar ram pumpi SAC nih uknak a laak hnu ni 421 chung ah SAC ralkap nih civil mi 1714 nunnak an laak cang, tiah theih a si. Tlaih a tong mi 12,989 tiang an si cang. Tlaih ding in nawl chuah mi 1974 an si. SAC ralkap kut in civil mi an thih tam biknak hi Yangon ah a si.
Thawai Mino Pakhat Cu kum 10 Thong Thlak Ding In Biakceihpiak A Si!
Taningtari ramṭhen, Thawai (ထားဝယ်) Kalingawng(ကလိန်အောင်) no.1 sang um mi Ma Saung Hnin Phyu kum-19 cu kum 10 thong thlak ding in biakhiahpiak a si, tiah Thawai thongtla tawlreltu DPPN nih an chim.
‘Phu pakhat cu K-pay in phaisa na kuat’ tiah puh a si caah Ma Saung Hnin Phyu cu a luancia 2021, August ah thlaih a rak si i, thla 7 a rauh hnu March 29, 2022 ah Thawai(ထားဝယ်) pengkomh biaceihzung nih kum 10 thong tla ding in biakhiahnak an tuahpiak. Ma Saung Hnin Phyu cu tang 10 pass kate a si i, University kai ding in a hngak lio mi a si, tiah DPPN in chimphuannak nawlngeitu nih a chim.
“phu pakhat cu K-pay in phaisa a hlut an ti caah an tlaih i phungrelnak 52(a) in tazacuai a si. K-pay in phaisa 13,500 ks a hlut ti in puh a si,” tiah DPPN rianṭuantu nih cun a chim. Thawai(ထားဝယ်) thonginn biaceihzung hin thong thlak ding in biakhiahpiak a tong mi; pa 175 le nu 38 an si, tiah DPPN nih cun an langhter.
Russia Le Ukraine Tonnak An Ngeih Than Lai
Russia le Ukraine ton biaruah ceihhmainak cu Turkey ram ah tonnak an ngei tthan lai tiah theih a si. Russia le Ukraine tonbiaruah ceihhmianak cu Turkey ram Istanbul khuapi ah tuah dingin President Putin le Turkey president Recep Tayyip Erdoğan hna cu March thla ni 27 ah lungtlinnak an ngei cang tiah Turkey president zung nih thawng a thanh.
Ukraine cozah lei in tonbiaruahnak Palai pakhat a si mi Davyd Arakhamia zong nih Russia-Ukraine tonbiaruah tuah than ding ceihhmainak cu a ra lai mi thla chungah Turkey ram ah tuah a si lai tiin ni zaan, zing lei ah a chim
Leave a Reply