Khadohnak Thawngpang Fonh!!
===========================
Sagaing ramṭhen Monywa khuahelnak lam ah um mi Myanmar Economic Bank hmaiah humhimnak a latu SAC ralkap cu tualchung hriamtlaiphu nih kutcheh bomb an puahhnawh hna caah SAC ralkap 2 an thi tiah theih a si.
Myanmar Economic Bank hmaiah humhimnak la mi SAC ralkap pawl cu October ni 9 zaanlei suimilam 2:35 ah Myanmar’s Royal Dragon Army (M.R.D.A) battalion 6, tatkhuai 2 nih kutcheh bomb in kan doh hna caah SAC ralkap 2 an thi tiah M.R.D.A nih cathanh an chuah. Cu kahdohnak ah cun tualchung hriamtlaiphu lei in hliamtuarnak um lo tein hnu an tolh kho tiah theih a si.
Rakhine ramkulh, Maungdaw chaklei ramri hngahnak SAC ralkap sakhan Laityiah(လိပ်ရ) cu Rakhine ralkap AA nih October 10, deilei ah an lak tiah AA lei nih fehternak an tuah tiah theih a si. Cu sakhan kahdohnak ah SAC ralkap lei duh-ṭat-yin-hmu telh in ralkap 30 an thi, 14 an tlaih hna, cun AA lei zong in a nunnak a liammi an um ve tiah theih a si.
“Cu ka sakhan ah cun hriamthil zei maw zat kan lakmi a um, cun tlaihmi zong an um, hriamthil lakmi le tlaihmi hi a zat fiang tein theih a si rihlo” tiah U Khine Thu Khah nih cun a chim. Maungdaw chaklei ah AA nih August 30 ah mengtung 40 pawng umni ramri hngak sakhan, September 11 ah khah-mah-yiah 352 sakhan le September 15 ah Mitait(မီးတိုက်) khuapawng SAC ralkap hriamngan chiahnak sakhan cu an rak lak i tutan ah Laityiah(လိပ်ရ) sakhan an lak ṭhan hi a si.
Bago lampi mengtung no.83 um SAC ralkap check gate le pyusawhṭi phu hna cu kahdoh an ton caah minung 5 nak tlawmlo an thi I hliamtuar an tam tiah theih a si. Mengtung no.83 check gate ah ummi SAC ralkap minung thazaang 17 hrawng cu October 9, zaan suimilam 8:00 hrawng ah tualchung hriamtlai phu hna nih an hna hi a si Check gate um SAC ralkap le pyusawhṭi phu hna cu Bago peng pah-kah-phah phu nih an kah hna. A kaptu tualchung hriamtlai phu lei in hliamhma tuarmi an umlo tiah tiah theih a si.
Sagaing ramṭhen, Myaung peng Kyaukyit sakhan pawngum SAC ralkap check gate cu, nili chung kan i timhtuah hnuah bomb kan puahhnawh hna, tiah Civilians Defense Security Organization Myaung(CDSOM) nih an langhter. Nizaan October 9 zinglei sml 10:30 hrawng ah Myaung peng Kyaukyit sakhan pawng ummi SAC ralkap check gate ah sentari a cawngmi SAC ralkap 2 cu, bomb in kan puahhnawh hna i a hmun ah an thi, tiah CDSOM chungtel Nwe Oo nih a chim.
“SAC ralkap nih Myaung peng tualchung mi hna harnak an pek lengmang hna caah anmah lehrulhnak ah bomb kan puahhnawh hna hi a si. M2W nih an serchuahmi bomb hmang in kan puahhnawh hna caah ralkap 2 an thi,” tiah Nwe Oo nih cun a chim. Kyaukyit sakhan ummi SAC ralkap nih, Myaung peng khuate cu an khangh pinah khuami an tlaih hna i an thah lengmang hna, tiah theih a si.
Magway ramṭhen, Htilin peng Shwe Aung Thar khua le Aung(အောင်း) khua karah riahcaw lak ding in a kalmi SAC ralkap pawl cu bomb an i lamh caah ralkap 5 hrawng an thi, tiah YDF Htilin sinin theih a si. Nihin October 10 zinglei sml 1:00 tluk ah ralkap 15 hrawng cu Shwe Aung Thar khua umhmun an khuar nak hmun in Aung khua lei an kal lioah bomb an i lamh hi a si.
“Riahcaw an lak tawnnak lam ah bomb kan hmanh. Zinglei sml 1:00 hrawngah bomb puah thawng kan theih i, kan ralkap hna nih an va hlathlai tikah kanmah nih kan hmanhmi bomb a rak puak. SAC ralkap thi le hnai le an kedan zong kan hmuh. Bomb a puah le cangka SAC ralkap nih an pawngkam cu meithal in an kah leen,” tiah YDF Htilin in ṭuanvo ngeitu nih a chim.
Mandalay ramṭhen, Maha Aungmay(မဟာအောင်မြေ) peng electric manager zung hngaktu SAC ralkap sergeant pahnih cu bia an i al i, ralkap pakhat nih a hawipa sergeant Kyaw Myo Htun cu an kah i a thi tiah theih a si. Nizan October 9 zaanlei sml 2:20 ah Maha Aungmya electric zung hngaktu SAC ralkap sergeant Myat Noe Aung nih a hawipa sergeant Kyaw Myo Htun cu a kah hi a si, tiah theih a si.
“SAC ralkap 2 hna hi Magway ramṭhen Sinpaung Way(ဆင်ပေါင်ဝဲ)Kah Pah Sah 13 in an si. Sergeant Myat Noe Aung nih amah nakin rank sang deuh sergeant Kyaw Myo Htun cu a kah i a thi. A ruak cu Kah Pah Sah 13 ralkap sakhan ah an vui lai. A thattu sergeant Myat Noe Aung cu Nandwin ah an tlaih cang,” tiah theih a si.
Mandalay ramṭhen, Myeikhtilar(မိတ္ထီလာ) Wundwin Myoma(ဝမ်းတွင်းမြို့မ) palik sakhan in sakhan hmu Saw Naing Oo cu, nizaan October 9 ah kan kah I a thi, tiah Wundwin Township Revolution Force(WTRF) in ṭuanvo ngeitu nih a chim. October 9 zaanlei ah Wundwin peng Myoma palik sakhan in palik bawi Saw Naing Oo cu meithal zun 6 in WTRF nih an kah i a thih hi a si tiah theih a si.
WTRF ṭuanvo ngeitu nih, “palik bawi Zaw Naing Oo cu motor in Wundwin No.1 sang uk zung hmai a kal lioah pistol kuan ruk aa tlummi in a zun ruk ning in kan kah caah a hmun ah a thi colh. Humhim kan duh caah a thilri tucu kan la kho lo,” tiah a chim.
Relchih, Venezuela Ram Ah Mincimhnak A Chuak I A Thimi Le A Tlaumi 70 Leng An Phan, Venezuela ram ah fak tuk in mincimhnak a chuah caah minung 20 leng an nunnak a liam i 50 leng an tlau, tiah theih a si. Nizaan October 9 ah Venezuela ram chaklei Aragua hmunram ah fak tuk in ruah a sur caah Los Tijeres tiva pi a lian i mincimhnak a chuak, tiah Vice President Delsey Rodriguez nih a chim.
Mincimh ruangah har tongmi cu a si khawh chungin bawmhchanh dingah Ministry of Interior and Internal Security cu Vice President Delsey Rodriguez nih nawl a pek hna. Palik, mi bawmchantu phu le pawngkam zohkhenhnak zung in ṭuanvo ngeitu 1000 nih mincim nih a hrenmi hna le a tlaumi cu an kawl cuahmah hna, tiah theih a si.
Nigeria Ah Tilawng Pakhat A Pil Caah Minung 76 An Nunnak A Liam, Nigeria nichuah thlanglei Anambra ramkulh ah tilawng pakhat ti ah a pil caah tilawng chung cuangmi minung 76 nak tlawmlo an nunnak a liam tiah theih a si.
Minung 80 nak tlawmlo a phurtu tilawng cu Anambra ramkulh Obaru hmunram tili chung ah a pil i, nunnak a liammi chungah mi tamdeuh cu nu le ngakchia an si tiah ṭuanvo ngeitu hna nih an chim. An umnak hmun ah ti a lianh caah a himnak hmun i ṭhial dingin tilawng ai cit mi an si, tilawng hi ti chung a pil hlan ah a engine seh ai rawk, cucaah hlei pakhat a pah i ti chungah a pil hi a si tiah ṭuanvo ngeitu cheukhat nih an chim.
Tilawng a pil ruangah a nunnak liammi hna kongah president Muhammadu Buhari nih a ngaihchiatnak kong a chim. Nigeria ah tilawng in thil phurhnak kong siseh humhimnak ding ca ah siseh nawl zulhnak thazaang a der caah tilawng hi atu le tu ti tluk in ai let lengmang tiah theih a si.
Ramdang Kal Aa Timmi CDM 2 Cu Yangon Vanlawng Tual Ah SAC Ralkap Nih An Tlaih Hna, October ni 9, Yangon vanlawng tual ah ramdang kal ding in aa timmi CDM tuahmi 2 cu vanlawng an hngah lio ah SAC ralkap nih an tlaih hna tiah theih a si. Tlaih a tongmi CDM tuahmi hna hi Mahlaing peng siangniam ruun cachimtu U Aye Kaung le Yangon medical university lecturer Daw May Htu Kyaw hna an si.
CDM an tuah ruang ah an tlaih hna hi a si. Aluancia September thla zong ah sianginn cachimtu pakhat cu vanlawng tual ah an rak tlaih bal cang nain a phone le computer ah ramkhel kong zeihmanh a tarlanghmi um lo caah phaisa an hal i an rak thlah ṭhan tiah CMD lei tawlreltu pakhat nih a chim.
SAC ralkap nih CDM tuahmi min cazin pawl cu vanlawng tual le ramri checkgate kip ah an pek hna i an rak tlaih lengmang hna. An tlaihmi hna cu an hrem hna hnu ah rianṭuan ṭhan ding in min an thut ter hna i rian ah an luhter ṭhan hna. A cheu phaisa ngeimi nih cun kyat sing 50-100 kar an pek hna i an thlah ṭhan tawn hna tiah theih a si. Crd-The Chin Post
Leave a Reply