Nihin Thawngpang Kan Theih Mi Chungin Thawngpang Chia Fonh!!
=============================
Chin ramkulh, Falam khua sii-inn uktu Dr.Tluang Cung Thang(40) cu nihin September 28 zinglei ah an inn chungah hri in aa awk i a nunnaka liam, tiah theih a si. Falam sii-inn uktu Dr.Tluang Cung Thang cu hawikom tampi a ngeimi a si pinah Falam khuami hna caah ding fel te le zawnruahnak he a zohkhenhtu a si. A ruak cu Hakha ah an vui lai, tiah theih a si.
Falam sii-inn uktu Dr.Tluang Cung Thang nih Falam peng mizaw hna cu a fimthiamnak dihlak he a zohkhenh hna caah kum 2020 lio Falam khua ah zohchun awk tlak pakhat a si, tiah Chinland Herald nih upatnak a rak pek.
Chin ram ah hlasak/phan thiam a simi Salai Lowy Hrang(27)cu, nihin September 28 zinglei ah a chuahsemnak khua ah a nunnak a liam tiah theih a si. Salai Lowy Htang cu, SAC nih uknak an lak hnuin, Mindat peng meng 16 kahdohnak ah aa tel vemi a si i, a ngamdamnak ruangah CDF in aa din tiah CDF-Mindat ralkap hna nih an chim.
Salai Lowy Htang cu a luancia 2020 August thla ahkhan, စိန်ခေါ်မှု(Challenge) timi Album zong The Sun Music Team he hla a rak i chuah mi hlasak/phan thiam pakhat a si.
India-Myanmar ramri, Sagaing ramṭhen Tamu Nanphalung kalnak lamkam inn rawk pakhat ah a ho si theihlo mi pa pakhat ruak cu September 27 zaan ah an hmuh tiah theih a si. Cu ruak cu Neikbanlaan(နိဗ္ဗာန်လမ်း) mi bawmchantu phu nih lak in sizung ah an kalpi tiah theih a si.
Mi ruak hmuhmi hi sii a hmannak ruangah a thi mi a si kho tiah ruak a hmutu nih an chim, mi zei a si theih a si lo caah a ruak hlamtu ding zong theih an si lo caah a ruak hlamtu zong an um rih lo.
Nai chung hrawng Tamu khuachung ah hlamtu ngeilo mi ruak a tu le tu hmuh an si. Mi ruak hmuhmi hna cu kahthah mi ruak zong an um i, hliamhma he nunnak liammi ruak zong hmuh a si tiah Neikbanlaan(နိဗ္ဗာန်လမ်း) mi bawmchantu phu in ṭuanvo ngeitu nih a chim. DVB nih an khawmhsuat tawk ah thla khat chung ah Tamu pengchung ah hlamtu ngeilo minung ruak 6 tiang an um tiah an langhter.
September ni 27 zaanlei suimilam 3:30 hrawngah Karenni ramkulh Loikaw peng ummi SAC Battalion 250 le 422 hna nih Konethar khua cu hriamngan in an kah tiah theih a si. Cu SAC hriamngan kahnak ruang ah tualchungmi kum 55 tluk simi nu pakhat cu hriamngan kuan khennak in a nunnak liam i a dang pahnih zong hliamhma fak ngai an tuar tiah theih a si.
Zing suimilam 10:30 in zaanlei suimilam 1 tiang Kayantaya lamṭhen um mi SAC sakhan cu tualchung hriamtlaiphu hna nih sniper in an kah hna i SAC ralkap 6 an thi, cu hnu in a tubantuk in SAC ralkap nih hriamngan in dongcat loin an kah hna hi a si tiah tualchungmi pakhat nih a chim.
Thailand ram ah Myanmar rammi 95 cu Thailand nawlngeitu hna nih September 28 zinglei ah an tlaih hna tiah The Bangkok Post nih a langhter. Motor pahnih in Myanmar rammi 39 cu Thailand ram Tumphaphu pengkomh, Tambon Tha Khanu khua chuahnak lampi no.3272 check gate ah nihin September 28, zinglei suimilam 3:00 ah an tlaih hna tiah theih a si.
Cun minung 43 cu Tambon Tha Khanu(တန်ဘွမ်ထားခနူမြို့) khua i Kawhra cinnak dum ah tlaih an si i, a dang minung 13 cu Murang pengkomh chung Tambon Bangkao khua ah zinglei suimilam 8:00 hrawng ah tlaih an si tiah an langhter.
Thailand ram nawl ngeitu hna nih checkhlatnak an tuahning ah Myanmar rammi hna hi Thailand ramchung ah phungninglo in an lut, Thailand ram pal in Malaysia ah rianṭuan ding in rian kawlpiaktu puai-sa sin ah Thailand phaisa baht 60,000 an pek tiah The Bangkok Post nih cun a langhter.
Myanmar rammi phortu Thailand rammi motor khaltu pahnih zong Thailand cozah nawlngeitu hna nih an tlaih hna. Tlaihkhih a tongmi Myanmar rammi 95 cu Tumphaphu le Murang pwngkomh palik sin ah an ap hna i, Thailand ramchung ah phungninglo in an luh caah upadi nih in hmalaknak an tuah hna lai tiah theih a si.
Magway ramṭhen, Htilin peng Pana(ပုဏ္ဏား) khua cu SAC ralkap nih, nizaan September 27 ah mei in an khangh i inn 4 a ciam, tiah tualchung mi hna sinin theih a si. SAC ralkap nih nizaan September 27 zinglei sml 5:45 ah Pungna khua cu, hriamngan le hriamhme he an kah hnuah khua chungah an lut i, zaanlei sml 1:30 hrawng ah inn an khangh caah inn 4 a ciam. Cu pinah tualchung mi 30 nak tlawm lo an tlaih hna i zaanlei sml 2:30 hrawngah Htilin khua chung ah an kir, tiah theih a si.
SAC ralkap nih an tlaihmi hna cu an thlah ṭhan ko hna nain Maung Kyaing, Me Pu, Zaw Than, Tauk Kyi, kum tling lo tang kua siangngakchia Min Thet Paing, Thura Paing le Kyaw Naing cu an thlah hna lo, tiah theih a si. Cu pinah September 26 zinglei sang ah Myaing leng le Pauk peng ramri Kyetsuaih(ကြက်ဆူအိုင့်) khua cu, SAC ralkap nih an khangh caah inn 4 a ciam, tiah We love myaing sinin theih a si.
HpaAn peng Nyaungtone(ညောင်တုန်း) khua chungah umhmun a khuarmi SAC ralkap kuttang BGF nih, hriamngan an kah caah tualchung mi 3 hliamhma an pu, tiah KNU nih cathanh an chuah. Nyaungtone khua chungah umhmun a khuarmi SAC kuttang BGF check gate in BGF ralkap pawl nih, September 24 zaanlei sml 5:30 hrawngah hriamngan in an kah caah kum 8 tluk ngakchia pakhat le nu pahnih cu hriamngan kuan in hliamhma an pu, tiah an langhter.
Tualchung mi 3 hliamhma an put pinah caw 1 le meheh 1 zong hriamngan kuan nih a khen hna, tiah KNU nih cathanh an chuah. Ngaungtone BGF check gate cu BGF -1014 Battalin, Companny 2 kuttang an si i Company commander cu bawino Tin Win a si. Hriamngan kuan in hliamhma a pumi hna cu BGF nih i thlopbulhnak ah kyats sing 2 cio an pek hna, tiah theih a si.
Sagaing ramṭhen, Taze pengah SAC ralkap nih tualchung mi 11 an thah hna pinah inn 700 leng an khangh caah an ciam dih, tiah theih a si. September thla chungah Auhphul Ai(အုတ်ဖိုလ်အိုင်) khuami PDF ralkap 4 le khuami 5, Aungchanthar khuami 1 le Kwekone(ဂွေးကုန်း) khuami mino 1 cu SAC ralkap nih zohchia tuk in an thah hna, tiah tualchung mi hna sinin theih a si.
September thla chungah Hnetpuitaw(ငှက်ပျောတော) khua inn 121, InnNa khua inn 98, Nabetkyi(နဘက်ကြီး) khua inn 124, Teysa(သဲစား) khua hmailei le hnulei inn 80 le a dang khuate hna telh in a dihlak inn 723 cu SAC ralkap nih an khangh caah a ciam dih, tiah theih a si.
“SAC ralkap nih inn an khangh dih in khua chungah kan lut i, inn 21 a rak kaang. Khuami pakhat zong an thah i mei in an khangh. Aho a si cu hngalh a si rih lo, mino pakhat zong a tlau,” tiah Kwekone khuami pakhat nih a chim.
“Kannih khua hi inn 120 hrawng a ummi a si. Cu chungah inn 88 a kaang. Ka naupa(ဝမ်းကွဲ) zong hri in an ṭem i mei in an khangh. Cu tan ah PDF ralkap 4 le khuami 2 an thah hna. Ramlak ah kan zam i thilri zeihmanh kan i put lo. Caw le cawleng lawng kan i put khawhmi a si. Kum upa hna cu an zawt caah sii-ai an herh. Cun minung kan tam caah eidin ti le rawl kan herh tuk,” tiah khuami pakhat nih a chim.
Taze peng mino pakhat nih, “SAC ralkap nih inn an khangh pinah mi an thah lengmang hna caah mizapi nih kan huat tuk cang hna. Uico ralkap tiin kan auh hna. Ni ni khat ah an tuahsernak vialte an in te lai,” tiah a chim. Crd-The Chin Post
Relchap, Myanmar ramchung ah nikhat chungah minung 350 leng nih Covid zawtnak an i chawnh, Myanmar ramchung ah Covid zawtnak i chawnhning a karhṭhan i nizaan September 27 ni khat chung ah Covid-19 zawtnak aa chawnhmi minung 356 an si tiah SAC ralkap kuttang um ngandamnak vuanci zung nih cathanh an chuah. Ngandamnak zung nih September 27, zaan suimilam 8:00 tiang cathanh an chuahning ah minung 12903 checkhlatnak an tuah hna i, cu chungah minung 356 sinin Covid-19 zawtnak an hmuh caah zatuak 2.76 nih cu zawtnak an ngei.
A tu ah Covid-19 zawtnak a ngei tiah langhtermi zat hi SAC ralkap kuttang um siizung, sii-khan ah aa zohtermi hna chungin hmuhmi a si caah a tu langhtermi nak in a lengah zawtnak ngeimi an tam deuh kho tiah mibawm chantu phu hna le ngandamnak lei rianṭuantu hna nih an chim.
Yangon, Dawpone peng tualchungmi pakhat nih “sangchung sii khan ah aa zohtermi mizaw an karh ngai, cu mizaw hna chungin a tam deuh cu Covid-19 zawtnak an si lai tiah ka zumh, an tak a sa, an khuh, a taksa fak mi an tam Covid-19 zawtnak check ah cun cu zawtnak a ngeimi an tam lai” tiah a chim. SAC ralkap kuttang um ngandamnak lei vunci zung nih mibupi umnak siangin le training kainak, zung cheukhat ah minung tampi zawtnak i chawnhnak a cang tiah September ni 15 ah media ah an rak chim.
Chin ramkulh chung ah, SAC nih onmi sianginn ah a kaimi siangakchia hna i nichiar an kaizat cazin cu SAC nih an lak!! Chin ramkulh chungah, SAC nih onmi sianginn ah a kaimi siangakchia hna i an min cazin le nichiar an kaizat cazin cu khuachung um SAC ralkap nih an lak tiah theih a si.
Nizaan September 27 thokin, Chin ramkulh, Matupi khua chung ah, cu sianginn kaimi min cazin cu an lak i, class chungah siangakchia zeizat dah um? tuni minung zeizat dah a kai kho? minung zeizatdah an bau? zeiruang ah dah an bau? ti mi pawl tiangin a kan hal dih.
Nichiar zongin cu cazin cu an kan lak te khawh men tiah siangcachim saya pakhat nih a chim.
Cu bantuk thiam in, Chin ramkulh Falam khua chung zongah, siangakchia hna nichiar an kaizat cazin cu, Tat-Yin-Hmu sinah an pek tawn tiah theih a si.
Falam khuachung lawng si lo, SAC nih sianginn an on nak hmun poah ah cu cazin cu an lak i, a baumi an um a si ah cun zeiruangah dah an bau tiin cachimtu saya/mah te cu an kan hal. Nichiar ti awkin, cu cazin cu an lak caah, cheukhat nu le pa cu zeiruangah dah si hnga tiah thinphang in an um ko tiah siangcachim sayamah pakhat nih a chim.
Chin ramkulh chungah, tualchung hriamtlaiphu(CDF) le CDM saya/mah hna i bawmin an onmi sianginn ah a kaimi siangakchia an tam caah, SAC nih an onmi sianginn ah a kaimi siangakchia hi mi tlawmte lawng an si tiah theih a si.
Kawlram Ramri Kong He Pehtlaiin Bangladesh Nih Tuluk He I Bawmin Kan Kalpi Lai, Kawlram ramri kongkau he pehtlaiin Bangladesh ram nih Tuluk ram he i bawmin kan kalpi lai tiah Bangladesh lei nih thawng an thanh tiah theih a si.
Kawlram cungah Tuluk hipkhawhnak a um ko caah ramri hrawnghrang i a cangmi thil he pehtlaiin Tuluk bawmhnak laak in kalpi an timh hi a si tiah theih a si. Ramri kongkau ah hin Bangladesh hi a lungre a theih pah caah Bangladesh Ambassador nih Tuluk cozah sinah a tubantukin bawmh a hal hi a si. SAC ralkap le AA hriamtlai kar lakah kahdohnak a zual chin lengmang caah ramri kongkau ah Bangladesh nih a tubantukin a kalpi hi a si tiah theih a si.
Model Nan Mwe San Cu SAC Nih Kum 6 Thongthlak Ding In Bia An Khiah Piak, Model Nan Mwe San cu electronic pehtlaihnak upadi section 33(a) in SAC ralkap biaceih zung nih, thong kum 6 thlak ding in bia an khiahpiak tiah nizaan September 27 ah NOM nih cathanh an chuah.
Electronic act upadi section 33 in Model Nan Mwe San cu taza an cuai i, Insein thonginn nih nizaan September 27 ah thong kum 6 thlak dingin bia an khiahpiak hi a si. Model Thin Zar Win Kyaw zong Mayangon(မရမ်းကုန်း) peng ralkap biaceih zung nih taza an cuai i a sualnak an kawl cuahmah lio a si, tiah NOM nih cun an langhter. Model Nan Mwe San le Thin Zar Win Kyaw cu a luancia August thla ah khan kum 7 tiang thong thlak khawhnak electronic upadi section 33(a) in SAC ralkap nih taza an rak cuai hna, tiah theih a si.
SAC cozah tangum remdaihnak phu le UWSP, NDAA, SSPP hriamtlaiphu tonnak an ngei, SAC cozah tangum ramdaihnak phu le WA hriamtlai UWSP, NDAA le Shan hriamtlai SSPP hna cu Naypyidaw zung pakhat ah September 27 ni ah tonnak an ngei tiah theih a si. Tonnak hmun ahcun SAC cozah tangum ramdaihnak phu hruaitu Bochoh Ya Pyae le UWSP in vice Chairman an i tel I biachimnak an ngei hna tiah theih a si.
SAC cozah phu leinih an duhmi le an duh ningin thil kalpi ding kong an chim hnu ah UWSP, NDAA le SSPP hriamtlai aiawh a kaimi hna nih an duh mi chimnak an ngei, cun ceihhmainak tlawmpal an ngei i a nikhatnak meeting an dih ter tiah theih a si. A nihnihnak tonnak cu September 28 ni (nihin) ah an tuah than lai tiah theih a si. Crd=The Chin Post
Leave a Reply