Chin Ralkap Kah An Tonnak Yinmabin Kahdohnak Kong Thawng Thar(Updated)
=============================================
Sagaing ramṭhen, Yinmabin peng, Yinpaungtai(ရင်ပေါင်တိုင်) khua cu dalan thawngpeknak ruang ah SAC ralkap nih van lei kahdohnak a tuah i, thawngpetu cu theih a si cang, tiah Yinmabin pengkomh chimphuannak nawlngeitu Bu Myait Ko nih a chim. Chin ralkap hna nih hriamthil an phorh ah, an i tonnak hmun Yinpaungtai(ရင်ပေါင်တိုင်) khua le Pahtuta(ပုထိုးသာ) khua telh in khua 3 ah SAC ralkap nih nizaan August 11, zaanlei suimilam 3:00 hrawng ah van lei in kahdohnak a tuah, tiah Kawl media nih an langhter.
“Mi-35 pahnih le Mi-17 pakhat tiin helicopter 3 hmang in Yinpaungtai(ရင်ပေါင်တိုင်) khua le Pahtuta(ပုထိုးသာ) khua telh in khua 3 cu hmunkip ah an kah. Cu hnu ah Mi17 nih minung thazaang a chap i, zaanlei suimilam 3:00 hrawng ah Helicopter pahnih nih minung thazaang a chap ṭhan. Zaanlei suimilam 5:20 hrawng ah Mi helicopter pakhat le Mi35 pakhat nih kahdohnak a tuah ṭhan,” tiah helicopter in kahdohnak a tuahnak kong cu Bu Myait Ko nih a chim.
Hriamthil phortu hna an i tonnak ding hmunhma kong, Monywa nah-mah-khah sin ah thawng an peknak audio file cu khuami nih a hlankan in an theih caah, motor 2 in i tonnak ding hmun cu ṭhialnak an tuah ṭhan nain, SAC ralkap lei nih an i ṭhialnak hmun lei tiang vanlei in an kahdoh hna, tiah an ṭial.
“Hi thilcang kong ah a caan za rih lo kan ti caah thawng thanhnak kan tuah rih lo, Monywa nah-mah-khah sin ah thawng an peknak audio file tiang kan sin ah a phan,” tiah Chindwin ṭangrual phufonh committee ṭuanvo ngeitu le Yinmabin pengkomh ṭuanvo ngetu Bu Myait Ko nih Than Lwin Khet ah a chim.
Cu thilcang kong he pehtlai in thawngpetu phu chungtel dalan pakhat cu tualchung hriamtlai phu nih an tlaih i, bia halnak kan tuah tiah Yinmabin tualchung hriamtlai phu chungtel pakhat nih a chim. “Hriamthil a phortu Chin ralkap chungtel 80 chung ah minung 76 cu hmun pakhat ah an i tong dih cang, minung 4 cu kawl cuahmah lio an si,” tiah Bu Myait Ko nih cun a chim. Chin ralkap hna chung ah CDF-Mindat in ralkap 20 an i tel i, cu chung ah minung 2 an tlau, tiah an langhter.
Yinpaungtai(ရင်ပေါင်တိုင်) khua luhhnawh in kahdoh an ton ruang ah tualchung hriamtlai phu minung 7 an nunnak a liam i, hriamthil zeimawzat kan lakkhawh tiah SAC ralkap media hna nih thawngthanhnak an tuah nain, nunnak liammi kong ah tualchung hriamtlai phu lei nih fehternak an tuahmi a um rih lo.
Nihin August 12 ah Yinpaungtai(ရင်ပေါင်တိုင်) khua cu SAC ralkap nih Helicopter in minung thazaang a chap, zaanlei suimilam 4:00 luan hnu ah khuachung an khangh, tiah tualchung mi nih an chim. Atu tiang ah Yinpaungtai(ရင်ပေါင်တိုင်) khua ah cun SAC ralkap 150 hrawng umhmun an khuar i, nihin August 12 zaanlei hnu tiang ah van lei in kahdohnak an tuah rih, tiah theih a si. Hi kong ah SAC ralhrang cu teirul cham an si lai tiah kan theih.
Karenni Ramkulh, Shiataw Hmunram Kahdohnak Ah SAC Ralkap 7 An Thi – KNDF, Karenni ramkulh, Shiataw(ရှားတော) hmunram chung ah August 7 le 9 ah khan voi li tiang kahdohnak a chuak i, kahdohnak ah SAC ralkap 7 hrawng an thi, tiah KNDF battalion 17 nih nihin August 12 ah an thanh. Shataw(ရှားတော)khua, Tangusuu(တငူးဆို) sakhan in a chuakmi SAC ralkap hna cu August 7 in KA le KNDF B-17, B-12, B-14 nih an kahdoh hna. Kaphnih kar ah kahdohnak voi 3 tiang a chuak i, SAC ralkap lei 2 an thi, hliamhma tuar zong an tam, tiah an langhter.
August 9 ah Shiataw(ရှားတော) khua ah kahdohnak a chuak ṭhan i, SAC ralkap 5 an thih leng ah hliamhma tuar an tam, tiah KNDF battalion 17 nih an thanh. Kaphnih kar kahdohnak chung ah KA le KNDF phufonh lei hliamhma tuar an um lo, tiah an langhter. Kaphnih kar kahdohnak ruang ah Karenni ramkulh, Loikaw-Shiataw(ရှားတော) lampi cu mipi nih zulh rih lo ding in KNDF nih August 10 ah khamnak an tuah.
Watlet Ah SAC Ralkap Mawtaw Bomb Puahhnawh An Tong I, Ralkap 10 An Thi: Sagaing Ramṭhen, Watlet peng ah nihin August 12 zaanlei sang ah Mawṭaw pali in a rami SAC ralkap cu bomb puahhnawh an si i 10 an thi, tiah PDF phufonh nih cathanh an chuah.
August 12 zaanlei sumilam 2:45 ah Sagaing ramṭhen, Shwe Bo in Ralkap Mawṭaw ngan pali cu Watlet peng, Hlahtaw (လှတော်) khua lei an kal lio ah Shwe Bo pengkomh battalion 23, tatkhuai 1, Shwe Bo Defense Force, Daung PDF nih bomb lung 30 hrawng kan puah hnawh hna i 10 nak tlawm lo an thi, tiah Shwe Bo pengkomh Battalion 23 nih an cathanh ah an langhter.
CDM Tuah Siloin Chunglei Buainak Ruang Ah Ralkap In A Zaam Mi An Tam, Tiah Ralkap CDMer Pakhat Nih A Chim, SAC ralkap hna chung in mipi sin ah i fonh in CDM cawlcanghnak tuah siloin, a ruang tampi ruang ah SAC ralkap sinak kaltak in a zaam mi cu hlan nakin an tam, tiah SAC ralkap he naihniam in ummi hna nih an chim. SAC ralkap nih uknak an lak hnu ah, atu bantuk in a zaam mi cu an tam i, SAC nih an kuttang ummi ralkap hna cung ah hnekchihnak an tuah ruang ah le phaisa harsat ruang ah a zaam mi an tam, tiah theih a si.
SAC kuttang um ralkap hna cu a ruang tampi ruang ah an ralkap sinak cu kaltak in a thli in a zaam mi an karh ngai, tiah June thla chung ah CDM a tuahtu ralkap pakhat nih a chim.
“SAC kuttang in ka chuah hlan, Meiktila (မိတ်ထီလာ) ah thla 3 training kan kai lio ah, training in a zaam mi hi nitin ngawt in an rak um. CDM tuah siloin, Minung 3/4 tiin a thli in an rak zaam i kan kawl tawn hna,” tiah June thla ah khan CDM a tuahtu Myait battalion 501 in Ko Aung Min Htat nih a chim.
“A tlizaam mi lak ah hin ralkap sawhsawh lawng siloin ralbawi zong an i tel i, an tam ngai cang. SAC ralkap nih nawlngeihnak an lak hnu ah ralkap pawl cu kahdohnak i kal peng a si caah re a thei tuk. Thlahlawh le eidin thilman ah harnak an tong, dinhcaan lak in mah umnak khua ah tlun a ngah lo, cucaah a zaam mi an tam ngai. Hi hnu zong ah a zaam mi an tam rih ko lai. SAC cu amah tein a tlu te ko lai, a donghnak ah cun thantar lawng a dir te lai,” tiah CDM cawlcanghnak a tuahtu Bu-kyi Zin Yaw nih a chim.
Taze Shwe Daung Min Datsi Dawr Ah A Ummi SAC Ralkap Kah An Tong 3 An Thi: Sagaing Ramṭhen, Taze peng, Shwe Daung Min(ရွှေဒေါင်းမင်း) Datsi dawr ah a ummi SAC ralkap pawl cu Taze people Comrades TPC nih nihin August ni 12 chunhnu suimilam 3:15 hrawng ah an kah hna. Kahdohnak ah cun ralkap 3 an thi i, 2 hliam an tuar, tiah theih a si. Shwe Daung Min Datsi dawr cu SAC nih checkgate ah an hman i khualtlawng mi hna phaisa an hal tawnnak hmun a si, tiah theih a si.
Chunhnu suimilam 3:15 hrawng ah hriamngan thawng le hriamhme thawng kan theih hnu ah an i kap, tiah kan theih. Kaphnih kar kahdohnak cu minute 20 hrawng a rau, tiah khuami pakhat nih a chim. Cu kahdohnak ah cun Taze People Comrades phu nih an kah hmasa hna hnu ah kaphnih kar kahdohnak a chuak, tiah a chimchap.
Leave a Reply