Nyi Pyi Taw Ah Ralhrang Ralkap Thazaang Phorzarnak Tuah Dingmi Ni Ah Pangpar Tyi Oihtu Dingah Minung An Auh!
Nyi Pyi Taw ah March 27 ah tuah dingmi kum 77 tlinnak ralhrang ralkap ni ah SAC ralhrang ralkap nih a thazaang phorzarnak tuah aa timh caah mipi nih pangpar tyi oih khawh a si tiah SAC ralhrang nih anmah hmanmi sosial media ah thawng an thanh.
Cu ni ahcun pangpar tyi oih a duhtu nih phone in min cazin pek khawh a si i, hmatpungtin original, licence hmanthlak 2 a herh lai i, luhchuah khawhnak card kan in pek hna lai tiah cathanh an chuah hi a si.
“Ralkap thazaang phorzarnak ni ah pangpar tyi oihpiakmi cu anmah ralhrang ralkap chungkhar lawng an si.
Nawlngeihnak an laak hlan zongah a lenglei minung nih zeitik hmanhah an oih bal lo. Anmah chungkhar nih an vale, an fale cu pangpar tyi an oih tawn. Atu bantuk rambuai caan lebang ahcun a lenglei minung nih a chungah luh ding cu a harsa khun lai. Aruang cu a lenglei minung cungah zumhnak an ngei lo. Atu bantuk boruak lio ahcun a lenglei minung an rat ahcun biatak tein checking an tuah lai” tiah Nyi Taw ah ralhrang ralkap he naihniammi pakhat nih a chim.
1945 March 27, Bogyoke Aung San hruaimi Kawl Ralkap nih Tlangcungmi dihlak he rualrem tein tuanti hratin Japan ralkap pawl an dohnak ni a si tikah “Japan Ralkap Kahdoh Ni” tiah min an rak pek i, Kawlram ah philhlonak puai an hmang tawn.
1962 ah Bogyoke Nyi Win hruaimi ralkap nih rampi nawlngeihnak an laak hnuin “Japan Ralkap Kahdoh Ni” cu “Ralkap Ni” tiah min thlenh hratin nihin ni tiang an hmannak a si.
Kalaymyo Ah SAC Ralhrang Ralkap Le Mipi Vengtu Karlak Ah Kahdohnak A Chuak I, Ralhrang Ralkap (17) An Thi, Bomb Puah Sual Nakin PDF Kalay (1) Nunnak Liam!
March 20 zinglei caan ah Yi Su khua le Hakhalay khua chaklei tlang tluan in kahdohnak tuahtu SAC ralhrang ralkap hna cu timhcia tein a rak hngaktu Kalay PDF, Zomi PDF, CNDF fonhmi phu nih zinglei sml 7:00 thawkin hriamngan he hriamhme he an rak kah hmasa hna i, zinglei sml 9:00 tiang kahdohnak a fak. Kahdohnak caan chungah SAC ralhrang ralkap a tlawmbik 15 an thi kho i, PDF Kalay (1) nih a zual lomi hliam a tuar.
SAC ralhrang ralkap nih kahdohnak hmun in Chaung Khuah khua leikap ah an kir than i, cuka cun Aung Chian Tha khua ah an kal than i, zinglei sml 11:30 hrawngah Aung Chian Tha khua nichuahlei ramtang ah PDF Kalay, CNDF le CDF KKG fonhmi phu nih an rak kah than caah sml cheu chung kahdohnak a fak i, SAC ralhrang ralkap 2 an thi.
Cu kahdohnak ahcun mipi ralkap leiah a thimi an umlo nain March 19 ah SAC ralhrang ralkap rual cu bomb puah hnawh dingin timh tuah lioah bomb a puah caah PDF Kalay (1) nunnak a liam.
SAC ralhrang ralkap 100 lengkai hna cu March 18 thawkin Heluk khua le Khuicing khua tlangtluan in kahdohnak an tuah i, March 19 ahcun nitlaklei tu ah an i mel than i, Kalay peng le Falam peng ramri Parmuanchaung le Yisu khua leikap ah an kal hi a si.
SAC ralhrang ralkap hna nih chun ahcun Yan Gyi Aung khua leikap ah pehzulh in an kal tiah theih a si.
A liamcia March 17 zongah khan SAC ralhrang ralkap hna nih Chaungkhua khua le Aung Chian Tha khua karlak ah anmah le anmah an i kah sual nakin (7) an thi tiah theih a si.
Crd: Zalen
Mino 18 Hna Cu SAC Ralhrang Nih An Mah Pakhat Cio In Thihdan Le Thihhlanlo Thongdan An Pek Hna
Yangon ah mino 11 thih hlan lo thongdan an pek hna i minung 7 hna cu thihdan an pek hna hnu cu Myo Okkalapa sianginn cachimtu sayamah thahnak ah an tlaih mi minung pali hna zong thihdan an pek hna tiah theih a si.
Yangon ranthen chungah an tlaih mi hna minung 18 hna cu an hmuh an zoh piak hna i pakhat cio in thihdan le thihhlanlo thongdan an pek hna tiah thawng theih a si.
Dan an pek mi mino hna cu Hlantaya, Kyi Myint Tan, Dagon Seihkam, Myo Okkala hna ah a um mi an si tiah theih a si. Mino 18 hna lah ah minung 11 hna cu thihhlanlo thong dan an pek hna i, minung 7 hna cu thihdan an pek hna tiah theih a si.
Thihhlanlo thongdan an pek mi mino hna cu Hlantaya Yaungkyi Police sakhan an kahdoh, Khuauk Bawi zung cu bomb in an kahdoh, hriamnam an thuh, Tlangcung hriammtlai hna sinah tintan an kai , dohthlennak a tuah mi pawl he aa pehtlai mi an si tiin SAC ralhtrang nih an ti hna.
Thihdan an pek mi hna minung pa 7 hna cu Hlantaya le Myo Okkala ah a um mi an si i mah chungah minung pathum hna cu khuauk bawi meithal in an kahthah, a tang mi minung pali hna cu Myo Okkalapa sianginn cachim tu an kah thah tiin SAC ralhrang nih an ti hna. Mah thihdan an pek mi hna lakah nu mino pakhat zong aa tel ve tiah theih a si
Leave a Reply