SAC Ralhrang Nih Sawmnak A Tuah Mi Ah Hriamtlai Phu Khat An I Chap
SAC ralhrang nih ram daihnak sawmnak a tuah mi ah kai dingin cohlang cang mi phu 9 cazin chuah dih a si hnu a dih bak ah tu ni ah mah sawmnak a kai hnga ding in hriamtlai phu khat an i chap tiah SAC ralhrang in chim nawl ngeitu Zaw Min Htun nih a chim. Mah sawmnak ah a kai hnga ding a chap mi phu cu NCA min a thu cia mi LDU a si tiah theih a si.
Cu ruangah CNA ah min a thu ciami a si mi phu ah ALP, DKBA, KNU/ KNLA-PC, PNLO, NMSP le RCSS hna cu SAC ralhrang nih sawmnak a tuah mi ah, NCA ah min a thu ciami ah kai aa timh an si hna tiah theih a si. NCA ah min a thu rih lo mi ah UWSA, SSPP le NDAA phu 3 hna hi SAC ralhrang nih sawmmi ah NCA min a thu rih lomi in kai aa timh mi hna an si tiah theih a si.
A tu ah NCA ah min a thu cia mi an si ah, NCA ah min a thurih lomi hna tel in SAC ralhrang sawmnak ah kai dingin cazin a peek cang mi hi phu 10 an si cang i, KNU, KIO , ABSDF, CNF le KNPP hna nih cun kai lodingin cathanh an chuah tiah theih a si.
Relchap, Karenni ramkulh, Pruso peng le BawLaKhe peng tlawnkalnak lampi Pruso – Baw La Khe lampi cungah May 1 in 7 tiang kahdohnak ah SAC ralkap 44 an thi tiah KNDF nih cathanh an chuah. Pruso peng in Baw La Khe ( ဘောလခဲ ) peng lei ah eidin le hriamnam thilri hna chanh ah a kal mi SAC ralkap mawtaw 30 hrawng le KNDF karlak kahdohnak fak ah a chuak i zarkhat chung ah kahdohnak voi 13 a chuak , SAC ralkap mawtaw 8 a rawk i SAC ralkap 2 a nung in kan tlaih hna pin ah meithal zuun 15 le hriamnam dang kan lak khawh tiah KNDF nih an thanh.
May 6 Law Gyikhu khua kahdohnak ah KNDF ralkap pakhat a nunnak a liam tiah tuanvo ngaitu pakhat nih a feh ter. SAC ralkap mawtaw hna cu lamtan in an kah nak hna video zong KNDF nih May 8 ah an langhter i SAC ralkap tampi an thi i lampi cungah SAC ralkap mawtaw a kangh lio hmuh khawh asi. SAC ralkap a thi mi an tam nain SAC ralkap lei nih cathanh an chuah mi a um lo tiah theih a si.
Leave a Reply