SAC Ralhrang 35 an thah than hna
March 28 Ralhrang uknak duh loin kahdohnak ah SAC Ralhrang lei in Ralhrang 97 an thi tiah Mipi humveng tu hna nih cathanh an chuah.
Crd:Khit Thit Media
Zumtu nun thlalang i bihnak Porhlawt Ruamkainak Teinak. Kan Baibal nih a kan cawnpiak mi cu minung nih aa porhlawt awk a si lo ti hi a si. Ruamkai in a um awk a si lo. Pathian a ttihzah a upat i nawl a ngaimi, mi toidor si kha a kan fial. Mi porhlaw le mi ruamkai hi mi hngal zong an si.
Duh paoh in mi a ti hlakmak mi an si i bia zong an i suum kho lo. Mi fim, miza bik ah an i ruat. Ruahnak cheuh khawh an si lo i, Pathian lungthin cheuhnak zong an kawl huam lo. Porhlawt ruamkai a hmangmi cu an hrinthan hnu hmanh ah an i uah kho tuk rih. Midang nun kha kut dong in an sawh ngam ning hna hi khuaruahhar lei khi a si.
Pulpit zong hi an hmaizah kho ti lo i, Pathian nih a profet ah a hman mi hna bang khin an i ruat i, duh tawk in biaceihnak aw phun in mi den, le thil a cang cia mi kong ah bia phuan an hmang.
Baibal chung i zohchun awktlak Pathian minung hna cu an nun hi nikhat hnu ni khat aa toidor mi an si i anmah minung sinak kha a zor chin lengmang i Jesuh Khrih a bawinak kha a ngan chin lengmang. Paul lebang nih cun a thih lai ah khan “Vawlei cung mi vialte lak ahhin misual bik ka si,” (1 Tim. 1:15) tiah tehte a rak khaan.
Naite in a kan thih taakmi Rev. Dr. Billy Graham siseh, atu lio i kan uar ngaimi Rev. Rick Warren te hna hi mi soisel an hmang lo, ning hngal ngai in bia an chim lo; thawngttha bia an phuannak i a hrintthan mi hna kha anmah le an khrihfabu pastorte le khrihfa upa nih Baibal bia in an tthan an rak cawm khawh nakding tu ah pehtlaihnak a tuah tu an si.
Ka za tuk, Pathian nih a ka hman tuk, ka crusade ah minung cu zat kha zat an piangthar, keimah nih ka zohkhenh peng hna awk a si tiah thlarau lei ah porhlawtnak an ngeih mi kan hmu ruam lo.
Herod siangpahrang nih a chuahcam a lawmh, a bawi pawl he zu an ri, a so a paw. A nupi fanu nih a laam piak hna i sopawt in na duhmi paoh ka hal tiah chiatserh in bia a kam. A donghnak ah tipil petu Johan lu tannak ah aa chuah.
Babilon siangpahrang Belshazzar kha a bawi thong khat hna he puai an tuah; Jerusalem biakinn chung sui hrai ngun hrai in zu an ding. Kutbor pi nih vampang ah ca a ttial: Mene, mene, tekel, u-pharsin (Daniel 5:25-29). Belshazzar siangpahrang cu a nun kha khingthlai piak a tong, a tling ti lo; a pennak cu Persia kut ah pek a si.
A pa Nebukhadnezzar zong aa porhlaw i kum sarih chung cawtum bang ramlak ah van dap le ram a ei i a vakvai ko. David siangpahrang pa zong kha a herh lo mi milu a rel ruang ah fak tuk in Pathian nih dan a tat. A fiang tukmi cu Pathian lungton awk ahhin porhlawt ruamkainak nih a tong kho lo,
fuhpanh khawh zong a si lo.
Minung kan kotho lungput te hi aa porhlaw duh ngai, phun le hram kong hoi hna i porhlawtpi a fawi ngai tawn. India ram a zik in thlennak a ngeih khawh lomi pakhat cu phun-sang le phun-niam sining kha an biaknak (Hinduism) nih a pom, an i tlaihmi democracy phung zong nih a kalpi mi hi a si.
Kawlram, Thailand, le Japan te pawl zong hi aa tlaihmi pura biaknak (Buddhism) hi a fim, a nem tuk mi a si i an nunphung a tthanpi tu a si tiah an zumh tik ah a nun a nem bik mi Bawi Jesuh kha an nunphung chung ah an luh ter kho taktak lo.
Hi Bawi Jesuh chung i an luhnak a dawn tu ngai a si kho mi pakhat cu kanmah khrihfa mi kan nun ziaza ruangah a si; khrihfami cheukhat cu kan nun aa porhlaw tuk, biaceih duhnak lungthin (judgmental attitude) kan ngei kho tuk deuh i an nunphung ah kan i tlum cia lo.
Abiana ah Gangaw peng um, Senthang kan unau Kawl rawn ah an pipu chan in a rak peem cangmi hna cu Buddhist an si cang i Khrih thawngttha kan va chimh tik hna ah an nun kan thleng kho hna lo; khrihfa a cheu khat cu anmah nakin nuncan ziaza ah duh a nung deuh lomi kan um,
Cucu ni fatin an kan hmuh fawn tik ah a nun a nem tukmi kan Khamhtu Bawi Jesuh Khrih kha an hmu kho ti lo. Jesuh Khrih an hmuhnak ding ah a dawkhan tu bik kha kanmah khrihfami nuncan ziaza lila a si ve. Kan i thawh i an lung a khong tuk tiah kan puh lehlam hna. Hihi thlalang kan i bih tthan a herhmi a si.
Anmah lungkhon bia maw a si, asiloah kanmah khrihfami nunzia duhnung lo mi ruang ah dah a si? Biakinn chung le pumhnak lawng i a hrintthanmi khrihfa mi nuncan ziaza, porhlawt ruamkainak ziaza te aa ken pah ko rihmi nunning nih a kan mualpho pi cuahmah rih ko lai.
Ning hngal ngai in bia kan chim ngam, cu bantuk bia phunphai lawng ngaih kan duh cuahmah rih ko ahcun, tipil petu Johan bia kha ruat hna usih: “kei cu ka zor lai i Anih (Jesuh) cu a lian lai,” a ti mi bia kha.
Pathian hmai i cuaithlai kan si ve tik ah u-pharsin (na tling lo) tiah a kan ti ve sual nakhnga lo vanlei hmanh a zoh ngam lomi ngunkhuai khawl pa thlacamnak, lungthin bunghnak phun khan Bawi Jesuh fuh panh ko hna usih. Rev. Lal Pek Lian.
Kyiv khualipi hi a lak khawh a hau ding asi. Cucaah a tu hi Ukraine nichuah lei ah a ummi Ukraine ralkap pawl!
Russia Nih Ukraine Atei Khawi Ti lo Hnu Cun Atuk Ning Tactics Athlen, Ukraine lei nih hehchet tiah an rak dironh khawhmi ral cu Russia nih hin dih zokzok cang seh, ti lawng a duh cang. Cu ti i a si khawhnak dingah cun Kyiv khualipi hi a lak khawh a hau ding asi. Cucaah a tu hi Ukraine nichuah lei ah a ummi Ukraine ralkap pawl cu heh tiah a phomh hna.
Ukraine ralkap a tambik hna cu nichuahlei ah hmunhma an khuar deuh. Cuka hmunhma cu Russia lei tang Separatists pawl he kum 8 chung ral an i tuknak hmun a si. Ukraine ram ah a laihlumbik nak bak, tiah an ruah i Donbas hi Russia nih a kulh dih i Ukraine ralkap pawl a hrawh khawh dih hna ahcun, Kyiv tiangin khin a vun tei khawhnak dingah abiapi tukmi asi i, thil a um kho mi cu, cu bantuk in Russia nih a tuah khawh ahcun Ukraine hi hmunhnih ah a cheu lawlaw te khawh mi a si.
“Tutan ral kan tukmi a dotkhatnak (first stage) cu tlamtling ngaiin kan lim cang. Cucaah, Russia nih a biapibik in an i hmaithlakmi Donbas lak vial lawng kan i hmaithlak ko cang,” tiah Friday ah khan Russia ralkap nih thawngthanhnak a tuah. Putin nih a Strategy a thlenmi zoh tikah, Ukraine ah ai ruah ningin thil a tuah kho ti lo, ti a lang. Cu tikah, ai tinhmi goal tung a vun bitter than cang i, Russia economy le vawlpi nih remlomi ram ah a cantertu thatlonak in khua a khanmi zong cu phundang deuhsep in a vun thlen than.
“Russia nih Kyiv ah hmunhma khuar ai zalh rualrual in nichuah lei ah hehchet tiah Ukraine ralkap pawl a kah hna, cun a dang khuapi ngangan pawl zong rockes le miakpi in heh tiah a kah hna,” tiah US le British officials nih an chim. “Putin nih ai tinhmi a thlen thanmi zoh tikah North Korea le South Korea bantukin khin kan ram hi hmunhnih ah then duh sehlaw a dawh. Cun i halhmi hmun le halh khawhlo mi hmun, ti bantukin then duh sehlaw a dawh,” tiah Sunday ah khan Ukriane ralkap intelligence lubik Kyrylo Dudanov nih a chim.
“Ukraine ram ningpi taitai in cun a la kho lai lo. Ukraine hi cheu i, cu a cheumi hmunhma cu a tangmi le a luatmi Ukraine ramcheu dohtu/ralchanhtu ah vun ser i tim sehlaw a dawh bik ko,” tiah Budanov nih a chim. Tutiang ko rih ahcun, Putin le a ralbawi pawl nih hin an i tinhmi kong fiangtein an langhter rih lo. Asinain, Feb. 24 lio i chak, thlang le nichuahlei in an ralkap pawl Ukriane lei kuat hna lio ah khan cun khulrangtein teinak a hmu colh dingin an i ruat ngaingai.
Ukraine khualipi Kyiv, a pahnihnak khualipi Kharkiv le northeast ah a ummi a dang khuapi nganngan pawl cu Russia nih khualrangtein lak ai tim. Asinain, thatein a rak i timlam ve mi Ukraine ralkap nih cun an rak dironh hna i, lungthin thawnnak le thap hi chuahnak he Russia thazaang cu an rak doh ve khawh hna. A lang le tlang in hehchat tiah Kyiv kihriang hrawng cu miakpi in an vun den. Tanglei zong in hehchet tiah hmunhma an khuar. Kharkiv, Chernihiv le Sumy an doh lio i Tactics zong an vun i hman than hna.
Kyiv nitlak lei highway a ormi Makariv khuapi, hei ti bantuk ah cun Ukraine ralkap nih Russia ralkap pawl an nawr len lehlam hna. Cu ka i an i kah hnu ni tlawmpal lawng a rauh ah khin, AP thawnglatu pawl an va kal i, Russia rocket launcher pakhat, Russia truck pakhat, Russia ralkap ruak pakhat, cun Ukraine tank pakhat, tiin rawk nelnual in an um kha an va hmuh. Yasnohorodka belte ah cun Ukraine pawl nih an hmunhma an chuahtak mi an va hmuh. Russia muisam bel a leng lo.
A tu ko rih ah cun, Kyiv le a dang Ukraine khuapi nganngan pawl luhhnawh cutmat colh cu Russia nih a mak chung rih, tiah Kyiv ah hmunhma a khuarmi Razumkov Center think tank nih an chim. Ukraine an thazaang der hngak in caan an lak, ti a si. “Russia nih a Tactics a thlen hna …a ralkap thazaang thawnter than i, nawlnolh in ral vun tuk than a duh caah a si,” tiah think tank nih an chim.
Mariupol i rilikap khua cu Russia nih a kulh i, zarh tamlak chung rockest le miakpi in heh tiah a kah i mipi a thong in a thah hna. Mariupol hi Russia kut a phak a si ah cun, Russia hi zalongtein an cawlcang kho deuh lai i, nichuahlei ah hmunhma a khuarmi Ukraine ralkap pawl kulh duh ah Kharkiv ah hmunhma a khuarmi Russia ralkap pawl he fawitein an vun i fon khawh te ding khi a si hnga.
“Nichuahlei i Separatists pawl he direct in ai tongmi Ukraine ralkap pawl vun kulh hi Russia nih ai tinhbik mi a si. Cu in cun, thlanglei kap a ummi Kharkiv siseh, chaklei ah a ummi Maiupol in vun luhhnawh ai tim,” tiah British Ministry of Defense nih Sunday ah khan a chim.
“Nai cem i Russia nih an hmaithlakmi cu Donbas hi a si. Ukraine ralkap cheukhat pawl nih Kyiv an runven lio pi ah nichuahlei hmunhma hi za ah za in uk kho ning, ti Putin nih a duh. Cu hnu cun Donbas kongah President Zelensky a sungh vun khan sehlaw, 2014 lio i Russia nih a lakmi Crimea hi Russia ta a si, tiin vun cohlang seh, ti a duh fawn,” tiah US defense senior official nih a chim.
“Cu ti bantuk i Russia nih Donbas a ningpi in a vun lak khawhnak dingah cun Mariupol hi zeitluk tuan ah dah a vun lak khawh lai, timi ah le, cu ti kahdohnak a tuah ruangah zeitluk in dah Ukraine ralkap a hrawh khawh hna, timi ah ai hngat ding a si. Kyiv luhnawh colh lo dignin Russia nih hnung a tolhmi zoh tikah, duhthimnak thadeuh ai ngeih ruangah si lo in, a thazaang nih a tlinh ve hrat lo le a si ko lai,” tiah Washington ah a ummi Institution for Study of War nih Saturday ah khan ca an chuah.
Nichuahlei i a ummi Ukraine ralkap pawl an hrawh khawh hi Russia nih ai hmaithlak rualrual in, Ukraine ralkap zinaan an chiahnak, an miakpi chiahnak le hriamnaam sernak inn le lo pawl cu rili in siseh, van in siseh hehchet tiah hrawh khawh ai zuam i a kah hna.
“Saturday i Poland ramri ah a ummi Lviv cruise missile a khahnak a ruang cu nichuahlei ah a ummi Ukraine ralkap pawl sinah hriamnaam, ti le rawl chan kho ti hna hlahseh, ti a duh caah a si. Nitlaklei in nichuahlei i cu bang i ti le rawl, hriamnaam, zinaan kuatnak thazang cu pehzultein hrawh khawh ai tim peng ko lai. Nitlaknak in nichuahlei an i hlathlainak lam a tamdeuh cu Lviv velchum hrawng hi a si,” tiah hilips P. Obrien, a professor of strategic studies at the University of St. Andrews, nih a chim.
Black Sea rilikap hrawngah Kherson khua hi khulrangtein Russia nih a lak colh i, cu in cun an thazaang a hram an thlaknak bik Mykolaiv khua kihriang lei tiang an lak khawh colh fawn. Mykolaiv, Odes le Black Sea tikap khua tampi Russia nih a kulh khawh hna ah cun, rili in Ukraine nih thilri a phurhnak a thazaangpi cu a ningpi in a hrawhpiak khawh cang lai i, cu nih cun an ram economy hi a chiatchuah te ngaingai ding khi a si. Odesa a lak khawh sual ah cun, Russia ralkap pawl tlunin a onhtu Separatists pawl an umnak Moldova peng chung Trans-Dniester tiang khi a vun pehtonh dih te khawh lai.
Ukraine le Western ram pawl nih an phanpi ngaimi a si ko nain, Mykolaiv le Odesa lak hi Russia nih ai tim hrimhrim mi asi ve. A tutiang i Russia nih rilikap khua pawl cu cuti ngaingai i a lak khawh hna lo ning zoh tikah, Mariupol lak dingin a thlahmi a ralkap pawl hi sungh lawng an rian i, cun tartahak in an um caah a si, tiah Ukraine cozah nih an chim.
“Ka ralkap 1,351 an thi, 3,825 hma an pu,” tiah Russia lei nih cun Friday ah khan an i chim. Asinain NATO nih (ni 5 luancio lio i) a tuak ve ningah cun a tlawmbik 7,000 in 15,000 cu an thi cang lai. Cucu Afghanistan i kum 10 chung Soviet Union nih ral a tuk lio i a thimi a ralkap a zat hrawng a si diam cang.
Faktuk in Putin a sungh caah le Russia thazaang a khual a nuar caah, a tu bantukin Putin nih a a duhamnak a thumh i, a awm-ang deuh tein karhlannak a tuah hi a si lai, tiah chim cio a si. “Nichuahlei tu ah i thialkam dingin Russia nih thawng a thanhmi zoh tikah thatlo in a sunghmi a hmai vun milhtlorh a duh caah le, a thokmathar in raldohnak vun tuah than duh ah timhlamhnak ngeih a duh caah a si lai,” tiah Kyiv ah a ummi Penta Center lubik Volodymyr Fesenko nih a chim.
“A ruangtampi kongah kaphnih in an vun i dinh/hrim ta a hau ko. Cu ti i hrimnak cu ralkap thazang vun tuahtamhnak caantha ah Russia nih ai hman i, Ukraine lak a duhnak a lungthin tu cu thleng ti lo in, zeitin dah ka lakkhawh ning a si lai, timi Tactices thar tu chuapi khawh ai tim,” tiah AP ah Fesenko nih a chim ve.
“Cu a Tactics thar suisammi cu a hunghung in luhhnawh ti lo in, khuapi pawl deuh vun tuk hna, an economy thazaangpi vun hrawhpiak hna, cun an inn le lo, lam le sul pawl le rilikap khua pawl vun hrawhpiak hna, cun a dangdang zong vun zalh i tim hna sehlaw a dawh. Putin nih hin kaupiin raltuk khawhnak thazaang ai ngeih” tiah Fesenko nih a chim.
“Thawngngaiin Ukraine nih Russia a doh khawhmi nih hin tutan kahdohnak hi cansau a rauhter khawh ve mi a si i, cu tikah, Western ram pawl sinah Zelensky nih a halmi raltuknak vanlawng le tanks pawl he tiah bantuk ralhriamnaam siseh, cun phaisa hi biapihla an si te ko lai,” tiah a chim. Credit: Chelsea Bawi
Russia Le Ukraine Tonnak An Ngeih Than Lai
Russia le Ukraine ton biaruah ceihhmainak cu Turkey ram ah tonnak an ngei tthan lai tiah theih a si. Russia le Ukraine tonbiaruah ceihhmianak cu Turkey ram Istanbul khuapi ah tuah dingin President Putin le Turkey president Recep Tayyip Erdoğan hna cu March thla ni 27 ah lungtlinnak an ngei cang tiah Turkey president zung nih thawng a thanh.
Ukraine cozah lei in tonbiaruahnak Palai pakhat a si mi Davyd Arakhamia zong nih Russia-Ukraine tonbiaruah tuah than ding ceihhmainak cu a ra lai mi thla chungah Turkey ram ah tuah a si lai tiin ni zaan, zing lei ah a chim
Russia Le Ukraine Tonnak An Ngeih Than Lai
Russia le Ukraine ton biaruah ceihhmainak cu Turkey ram ah tonnak an ngei tthan lai tiah theih a si. Russia le Ukraine tonbiaruah ceihhmianak cu Turkey ram Istanbul khuapi ah tuah dingin President Putin le Turkey president Recep Tayyip Erdoğan hna cu March thla ni 27 ah lungtlinnak an ngei cang tiah Turkey president zung nih thawng a thanh.
Ukraine cozah lei in tonbiaruahnak Palai pakhat a si mi Davyd Arakhamia zong nih Russia-Ukraine tonbiaruah tuah than ding ceihhmainak cu a ra lai mi thla chungah Turkey ram ah tuah a si lai tiin ni zaan, zing lei ah a chim
Leave a Reply