SAC Ralhrang Nih A Rian In An Dihter Mi Pu Ngun San Aung Le An Thim Tharmi Dr. Vung Suan Thang A Dotdot In An Thawngpang
==========================
SAC nih Chin State CM ah an chiahmi Pu Ngun San Aung cu an dinhter i amah airolh ah Ralkap Sibawi Lt. Col. Vung Suan Thang an khanh tisi. Cu nih a langhtermi cu-An lu a rii i an i muai cawk ti lo. Uite ekchuak phun in an um cang tinak asi. Civil mi CM tuanter loin Ralkap mi an luhter hi militarize an si deuhdeuh lai tikhawh asi. Phundang cun thihlai kecheih.
Pu Ngun Sang Aung CM rian a chawngtu ding hi Lt.Colonel Dr Vung Suang Thang a si i, anih hi kawl ralkap in pension mi a si i, Yangon ah um in a hnuah cun All Chin Society hna ahkhan a rak active ngai bal tiah theih si. Pu Ngun Sang Aung hi amah nih i dinhnak a hal mi siloin ralhrang lungkua Naypyidaw lei nih an dinhter mi si tiah theih a si.
Pu Ngun San Aung cu Ralhrang Vuancichoh in aa din i, Dr. Vung Suan Thang nih a rian a chawn lai. Nizan khan Pu NSA cu Halkha an inn heh tiah an remh len caah a inn hlun ah um aa tim si ko lai tiah zumh si.February 1, 2021 in SAC ralkap nih uknak an laak hnu in SAC cozah nih Chin ramkulh Chief Minister rian an khinh mi Pu Ngun San Aung cu kum khat le cheu Chin ramkulh Chief Minister rian a ṭuan hnu ah SAC nih a rian in an dinhter.
Pu Ngun Sang Aung rian chaangtu ding ah hin Psychiatrist (Lungthin lei zohkhenhtu sibawi) pakhat si mi le USDP palai hlun Lt. Col. Dr. Vung Suan Thang cu nihin Aug 19 ah SAC nih Chin ramkulh chief minister rian an khinh, tiah theih a si.
Dr. Vung Suan Thang cu Psychiatrist( lungthin lei zohkhenhtu) sibawi a si bantuk in mizaw thlopbulnak ah a zia ṭha ngai mi sibawi pakhat a si, tiah mizaw a zohkhenh cang mi hna nih an chim.
A rian in aa dinh ko zong ah zeitik hmanh ah philh lo ding cu; “Pu Ngun San Aung hi, Chin mi 250 thah le nawn kan tonnak, 1000 renglo tlaih le thongthlak kan sinak ah le Innlo 1800 renglo khangh le hrawh piak kan sinak ah siseh, Chin mi 120,000 renglo ralzam kan sinak ah tuanvo ngeitu asi” A mah nawlpeknak le lairelnak taang ah hi zatzat kan thi, tlaih le thongthlak kan tong i kan khua inn lo a kaang timi kha philh awk a tha lo. Nihin ah aa din cang an ti hmanh ah a tuahsernak, Lainawng a sinak cu philh a si hlei lai lo.
Comments-Kei ka ruahdan ah a min khi an putter sawhsawh hna le si ka ti. Zei an ruahnak zong an lak hna lai ka zum loh, cun anmah zong nih Chin mi an kan leirawi lai zong ka zum fawn loh. Mipi zoh tha ah rian an khinh sawhsawh hna le si lai ti hi ka zumh. An lungre thei tuk ve ko lai dah.Ngun Sang Aung cu a inpa zawng nih TANBO in tuk khawh a si cang lai.
An duh ti lo i hnawm hlonh in an hlonh cang mu. A chungle nih thlathlohpiak ko ne hna seh ca hehehe.NSA cu ai dinh asi Zong ah Chinmi kan Cung I a thin lung le Arian tuan mi Kong ah kan Dawtnak Thinlung cu Vawlei Dongh tiang philh Hna hlah usih.Chin State chungah tlaihhrem riantuannak a țhawng chinchin lai dah!
Pu Ngun Sang Aung cu na duh ve thi cang ko an ti diam mu. Vung Suan Thang zong zoh sawh ding asi lo, an 2 in.Ngun San aung cu a keng ruang cat cang kaw tawng tham kawh si cang lai ti bak si ko hih a lung tawr cu Zei dik lah lai mu.Ral hnih nei cang ko ne cuh khuachia pa NSA cu. Zei ti hmanh in,a luat lo rengreng, tuhmi cu zuun hau.
Dalaan caah an dinhter asi sual hnga maw? tihnung chinchin asi sual lai ti phan um ko.Zumh ding an si lo hakha lei a cian pah i chungthahri ther phun in ai la si ko cuh tu ph chan ah zumh ding um bak loh.An thah lo i a van tha . ZRA he dohter an kan timh cang rua ee.
Relchap, Myawaddy-Wawlay Lampi Kahdohnak Ah SAC Ralkap 6 An Thi, A Nung in 2 An Tlaih Hna, Karen ramkulh, Myawaddy peng Myawaddy-Wawlay motor lampi kahdohnak ah SAC ralkap 6 an thi i, 2 cu an nung in kan tlaih hna, hriamthil zeimawzat zong kan lak khawh, tiah Cobra hriamtlai phu nih an thanh.
SAC ralkap ṭat-mah 44 kuttang um khah-mah-yiah 102 hna nih Myawaddy-Wawlay motor lampi ah nihin August 19, zinglei suimilam 3:35 ah hmunhma rilonh in rallam an sial caah kaphnih kar kahdohnak a chuak. Cu kahdohnak ah cun SAC ralkap 6 an thi, minung 21 fak ngai in hliamhma an tuar, tiah theih a si.
Kaphnih kar kahdohnak ah SAC ralkap 2 cu an nung in tlaih an tong. MA1 meithal pakhat, MA 2 meithal pakhat, kuan kham lukhuh 2, RPG bomb lung hnih, kuan kham angki 2, 5.56 kuan 1,000, kuanbawm 7, 40mm bomb lung 6, 60 mm bomb lung 4 le zeidang hriamthil hna zong tualchung hriamtlai phu nih an laak.
A nung in tlaih a tongmi ralkap 2 hna cu duh-ṭaṭ-kyat Htin Kyaw le ralkap Min Thu an si. Tualchung hriamtlai phu nih upadi ning in ṭha tein an zohkhenh hna, tiah theih a si. Tu zaanlei suimilam 7:00 tiang ah kahdohnak an ngolh rih lo. SAC ralkap hna nih raltuknak vanlawng, 122 mm, 60mm, 81mm leng ah hriamngan Multi Luanched Rocket System(MLRS) hmang in an kah hna, tiah theih a si.
Nawlngeihnak Laak Hnu Ni 565 Chung Ah Minung 2227 Nunnak A Liam Cang! AAPP nih August ni 19, tiang cathanh a chuah ning ah Myanmar ramchung huapin SAC ralkap nih nawlngeihnak a laak ni 565 chung ah sualnak ngei lo minung 2,227 thah an si cang, tiah theih a si. Tlaihkhih a tongmi dihlak hi minung 12,064 an si i, an thlah than mi hna 3075 an si.
Tlaih ding in nawlchuah mi 15,161 an si. SAC ralkap nih mi nunnak a laak mi hna chung ah Yangon ramṭhen cu nunnak a liam mi tambiknak a si.
Mi Sawhsawh Bantuk In motor A Cuangmi SAC Ralkap PDF Nih Bomb An Puah Hna I, Ralkap 2 An Thi: Sagaing ramṭhen, Monywa peng Tasi khua i an sak cuahmah mi thonginn chung in, mi sawhsawh bantuk in a chuakmi SAC ralkap 6 cu nihin August 19, zinglei ah bomb puahhnawh in kan doh hna, tiah Monywa tualchung hriamtlai phu nih cathanh an chuah.
Cu bomb puahnak ruangah cun motor chung ummi SAC ralkap 2 an thi i, midang 3 fak ngai in hliamhma an tuar, tiah an langhter. SAC ralkap pawl cu Monywa peng hriamtlai phufonh nih bomb an puahhnawh hna, tiah theih a si.
Mindat Peng Ah A Zawtfah Rai A Karh! A Khua Ning Ti Awk In An Zaw Hna! Mindat pengchung khuate lei ah August zarhkhatnak in zawtnak rai a tam caah mi tampi an zaw hna, tiah Mindat zatlang uktu phu in ṭuanvo ngeitu hna nih Delta News Agency ah an chim.
“An kaa nih rawl thawtnam a thei lo, an tha a dih i, an lu a fak, an lungmit, an takpum ah a bomi tete an chuak, zarh hnih tluk ihnak ah tho lo in an um hna i, khuate hmun tamdeuh ah cu zawtnak cu a zual,” tiah cu zawtnak rai in a dam cangmi Suntaung (စွန်တောင်) khuami, Ko Law Ha Htun nih a chim. Cu bantuk zawtnak rai cu pengkulh chung dihlak ngawt ah a karh caah, a tuanlei in sii-ai bawmhchanh an herh ngai, tiah theih a si.
Pengkulh zatlang uktu phu in ngandamnak lei zohkhenhtu hna nih an thlopbul ko hna nain, cu zawtnak cu zei bantuk zawtnak a si theih khawhnak seh thilri le zawtnak a tlau tiang thlopnak ding ah sii-ai kan chambau, tiah ṭuanvo ngeitu pakhat nih a chim. “Tu thla chung lawng ah cu zawtnak in a zaw mi cu an tam ngai, an zawt ning a fak ngai hna i tuan ah an dam kho colh lo. Zei bantuk zawtnak a si theih khawhnak thilri(seh) kan ngeih lo caah fiang tein chim a har,” tiah ngandamnak lei ṭuanvo ngeitu pakhat nih a chim.
Sagaing Ramṭhen, Kata Peng Ah Kyaukhtungkyi Khuami 50 Leng SAC Ralkap Nih An Tlaih Hna, Sagaing ramṭhen, Kata peng, Kyaukhtungkyi (ကျောက်ထုံးကြီး) khua cu nihin August 19 zinglei ah SAC ralkap nih luhhnawh in an khangh leng ah, khuami 50 leng an tlaih hna i check hlatnak an tuah, tiah cu ka khua in a zaam mi hna nih an chim.
Kyaukhtungkyi (ကျောက်ထုံးကြီး) khua cu August 15 zong ah Mabing(မဘိမ်း) peng, Ngao(ငါးအိုး) khua hrambunh SAC khah-lah-yiah 121, Shweku peng hrambunh khah-lah-yiah 56 le khah-mah-yiah 602 in ralkap 300 hrawng nih an rak luhhnawh cang i, cu lio zong ah tlaih a tongmi khuami an um, tiah tualchung mi pakhat nih a chim.
“SAC ralkap nih khuachung cu an khangh i, ID card check in minung 50 hrawng an tlaih hna, cu hlan ah tlaihkhih a rak tongmi cu an thlah ṭhan cang hna. I kahdohnak zong a um lo nain, SAC ralkap hna nih cun meithal puah in innlo an khangh,” tiah a chim.
Kyaukhtungkyi (ကျောက်ထုံးကြီး) khua cu inn 1500 hrawng umnak khua a si i, khuami 3000 renglo cu hmundang ah an zaam hna, tiah theih a si. August 18 zong ah raltuknak vanlawng pahnih hmang in SAC ralkap nih van lei in ralvennak an tuah. Kata in Ayeyarwady tiva lei a kalmi tilawng 6 cu Kata PDF nih tiva nitlaklei Mutalay(မိုးတားလေး) khua pawng in kan kahdoh hna, tiah Kata hriamtlai phu nih an thanh.
Yinpaungtaing Vanlei Kahdohnak Lehrulhnak Ah Hriamtlai Phufonh Nih SAC Ralkap 30 Hrawng An Thah Hna, A luancia August 10 lio ah hriamthil a latu PRA le CNA hna cu Yinpaungtaing khua ah SAC ralkap nih vanlawng 4 in an rak kah hna i, Tualchung hriamtlai phu chungtel 2 an nunnak a rak liam i, fak ngai in tualchung ralkap 3 hliamhma an rak tuar. Cu thilcangmi lehrulhchamnak ah tiin PRA, CNA le hriamtlai phu dang ṭangrual in, August 11 in August 14 tiang Yinpaungtaing(ရင်ပေါင်တိုင်) khua ah umhmun khuarmi SAC ralkap hna cu an kah hna, tiah Myaelatt Athan nih a ṭial.
“Hriamngan le hriamhme hmang in kan kahdoh hna i, kahdohnak ah SAC ralkap 30 hrawng an thi, hliamhma tuar zong an tam, kanmah lei in minung 3 hrawng nih hliamhma an tuar,” tiah PRA hruaitu Bu Japan nih a chim. August 10 lio Yinpaungtaing kahdohnak ah PRA le CNA in ralkap 137 nih hriamthil cu an thiar khawh nain, ralkap 2 nunnak a liam i, hriamthil tam ngai an sung, tiah theih a si.
Gangaw Thlanglei Ah Rallam Sialtu SAC Ralkap Hna cu PDF Nih An Kah Hna I, Ralkap 6 An Thi, Gangaw thlanglei, Minyua(မင်းရွာ) lei ah rallam a sialtu SAC ralkap hna cu tualchung hriamtlai phufonh nih an kahdoh hna caah SAC ralkap 6 an thi i, pakhat a nun bu in kan tlaih, tiah Yaw-PDF nih an thanh. SAC ralkap hna cu Gangaw khah-lah-yiah 50 in an si i, Gangaw peng Eintit(အိမ်သစ်) khua pawng an phak lio August 18 chunhnu ah tualchung hriamtlai phufonh nih an kah hna, tiah theih a si.
PDF nih an thah mi SAC ralkap 6 hna cu hmaisuang ah rallam a sialmi an si i, a zaam mi palik pakhat cu a hriamthil he kan tlaih, tiah Y-PDF nih an thanh. SAC ralkap, palik le pyusawhti ti in minung thazaang 70 hrawng he rallam sialtu hna cu Y-PDF, YDF, KKG, Naga Ngyi Naung(နဂါးညီ နောင်) 1 le Gangaw PDF phufonh hna nih an kahdoh hna. Kaphnih kar kahdohnak suimilam pahnih tluk hrawng an rau, tiah theih a si.
SAC ralkap kan thah mi hna hriamthil cu lak khawh kan i zuam ko nain, hnu lei in an rak kai mi SAC ralkap hna nih hriamngan in an kan kah tuk caah kanmah lei in minung pakhat hliamhma a tuar i, hnu kan tolh ṭhan, tiah an chim. Kahdohnak a chuahlio i SAC ralkap hriamngan kahmi hliamhnak ruangah caw khaltu tualchung mi pakhat a nunnak a liam, khuami cheukhat zong SAC ralkap nih an tlaih hna, tiah tualchung mi nih an chim. Gangaw pengchung ah SAC ralkap nih rallam an sial peng caah mipi cu i ralring cio ding in tualchung hriamtlai phu nih an theihter hna.
Mandalay Tili Kam I Sifak-harsa Mi Mino Hna Cu Ralkap Ah Lut Ding In SAC Ralkap Nih An Lem Hna! Mandalay tili kam hrawng le khua helnak lam ah deusak in a ummi; tithawl chia a khawm mi mino hna cu SAC ralkap nih ralkap lut ding in an lemsoi hna, tiah theih a si. Ralkap lut ding in a lemtu hna hi SAC ralkap kuttang khuabawi, inn zaa-uk le inn hra-uk hna an si. Atu tiang ralkap luh a duhmi cu an um rih lo, tiah tili kam ah a ummi pakhat nih a chim.
“Ralkap lut ding in ka nu cu an rak chimh. Ralkap a luh ahcun umnak inn kan in pek lai. Tangka zong kan in pek lai an ti. Luhter ding cun ka duh lo tiin ka nu nih a al hna,” tiah cuka ummi ngakchia kum 17 pa nih a chim. Tidil kam hrawng a ummi cu Mandalay khuami an si lo. Mandalay khuate in a rak i ṭhialmi hna an si. Ralkap luh ding kong chimpi ding cun anmah ralkap pumpak an ra lo nain khuabawi le an kuttang hna nih an rak lem hna, tiah theih a si.
“Kan theih tawk le kan hngalh tawk ah SAC ralkap pawl cu a thimi le aa hliammi an tam tuk cang. Cucaah tili kam hrawng a ummi mi harsa hna hi ralkap lut ding in an lem hna a si ko lai,” tiah Mandalay ummi pakhat nih a chim.
Yangon, Shwepyita Peng Inn Za Uktu Cu Rawl A Eilio Ah Kahthah A Tong, Yangon, Shwepyita(ရွှေပြည်သာ) peng Q/16 sang inn za uktu cu mon-hngin-kha a eilio ah aho hngalh lomi nih meithal in an kah i a thi, tiah sangchung ummi nih an chim. “Inn za uktu Win Zaw cu nihin August 19, zinglei suimilam 7:00 hrawng ah Shwepyita(ရွှေပြည်သာ) peng, dawr pakhat ah a nupi he mon-hngin-kha an eilio ah kahthah a tong. SAC ralkap nih pa can ah an i zohmi a si, uknak lak hnu in sangchung ah lor ngai in khua a sa,” tiah sangchung mi pakhat nih a chim.
Inn za uktu Win Zaw takpum cung ah cun kuan hliamhnak hmun 9 ah hmuh a si. SAC ralkap kuttang um inn za uktu fimhlawm a tonnak kong ah mizei phu nih an tuahmi a si, theih a si rih lo. A luancia August 8 ah khan Shwepyita(ရွှေပြည်သာ) peng no.8 sang inn za uktu cu Wolves phu nih an rak thah.
Monywa Peng Hriamtlai Phu Pakhat Nih Shot Gun le Kuan An Serchuah: Monywa peng tualchung hriamtlai phu nih an sermi Shot Gun le kuan hna cu mipi theih ding in nihin august ni 19 ah mipi hmuh khawh in an langhter.
“Kan serchuahmi meithal pawl ah hin 12 Gauge kuan hman khawh a si, hriamnam hi kan dohthlennak ah a biapi ngaimi a si,” tiah an langhter chih. Monywa peng Pah-kah-phah cu hriamthil tampi kan serchuah khawh nakhnga mipi bawmhnak kan herh ko, tiah nawlnak le bawmh halnak zong an tuah chih.
A Caan A Rem In UN Palai Cu Suh Kyi He Tonnak Nawl Kan Pek Lai: SAC Hruaitu, Myanmar ram kongah UN palai (United Nations Special Envoy on Myanmar) a simi Noeleen Heyzer le rampi ruahnak petu Daw Aungsan Suh Kyi cu caanrem a um in tonnak kan pek hna lai tiah SAC hruaitu Min Aung Hlaing nih a chim tiah AP News nih a ṭial. Cu lawng si loin Suh Kyi cu a ngandamnak le siarem tein a um khawh nakhnga ṭha tein kan zohkhenh lai tiah SAC hruaitu Min Aung Hlaing nih UN palai Noeleen Heyzer he an i ton lioah a chim fawn.
SAC hruaitu le UN palai tonnak ah thihdan pekmi ngol ding, Suh Kyi he tonnak nawl pek ding, Suh Kyi cu amah a inn te ah umter ding, ngakchia tlaihmi hna thlah ṭhan ding le Australia rammi Sean Turnell thlah ding kong an i ceih tiah theih a si. UN palai le SAC hruaitu tonnak cu dohthlennak tuahtu lei nih biatak tein an soisel. Ramkhel thiamsang cheukhat zong nih hi tonnak hi SAC Cozah cohlan bantuk a si tiah an chim ve.
Asinain Noeleen Heyzer le Min Aung Hlaing an i ton lecangka in SAC chimnak nawlngeitu ralbawi Zaw Min Tun nih UN palai nih an kan tonmi cu an kan cohlan caah a si tiah thawng fianternak ah a chim. Asinain UN nih cun SAC kan tonmi hna cu anmah kan cohlan hna si loin minung hawi zawnruahnak in a si tiah an thanh. Burma Campaign for UK nih cun UN palai Noeleen Heyzer cu a rian in dinhter awktlak a si tiah August 18 ah cathanh an chuah ve.
Tutan UN palai khualtlawnnak nih elhniarnak lawng a chuahter i zeihmanh ṭhathnemnak a um kho lai lo tiah Burma Campaign for UK nih an cathanh ah an langhter. UN palai Noeleen Heyzer cu August 16 ah Myanmar a phan i SAC hruaitu Min Aung Hlaing le ramleng vuanci Wunna Maung Lwin he tonnak an ngei i August 18 ah a kir ṭhan. SAC hruaitu nih bia a kamh bantukin Suh Kyi he tonnak nawl an pek tikah Noeleen Heyzer cu Myanmar ah a rak tlawng ṭhan te lai AP News nih cun a ṭial.
SAC Ralkap Nih Bomb Lamhmi Phun Lung 78 An Hmanhmi Cu PDF Nih An Laak Khawh! + Kahdohnak Thawngpang Dang, Sagaing ramṭhen, Salinkyi peng Letpataung tlang Copper kawlnak hmun pawng kam cu SAC ralkap nih lamhmi bomb an hmanh dih i, bomb lung 78 cu Myo Yamar PDF, Myanmar Che Guevara phu in ralkap hna nih an laak khawh, tiah theih a si. “SAC ralkap nih an hmanhmi bomb hi Lamhmi bomb, hri dawhmi bomb le kahmi bomb hna an si. Bomb ah LOT 217. 12014 tiin ca aa ṭial,” tiah PDF ralkap pakhat nih a chim. Bomb an laakmi lung 78 cu Myanmar Che Guevara phu nih SAC ralkap he kahdohnak a chuah tikah kan hman te lai, tiah an langhter.
Thanpyo Zayet Sakhan Kahdohnak Ah Palik Pahnih An Thi, PDF Pakhat A Nunnak A Liam! Mon ramkulh, Thanpyo Zayet sakhan cu August 17 zan sml 7:00 hrawng ah PDF ralkap 4 nih an kah caah palik 2 an thi, tiah tualchung mi hna sinin theih a si. Augsut 17 zan sml 7:00 hrawng ah Thanpyo Zayet sakhan cu cycle in PDF nih an rak kah caah sakhan chung a ummi palik 2 an thi, kaphnih kar kahdohnak a chuah caah PDF ralkap 1 a nunnak a liam, tiah theih a si.
Tualchungmi pakhat nih cun, “Kaphnih kar kahdohnak a chuak i, Meithal thawng cu a thang tuk hringhran, leng zong ah kan chuak ngam lo. Nihin zinglei ah palik 2 an thi i, PDF ralkap 1 a nunnak a liam ve. A ruak zong a thihnak hmun ah a um ko,” tiah a chim.
Chaung-U Ah SAC Ralkap Bomb Puahhnawh An Ton Caah Ralkap 11 An Thi: Sagaing ramṭhen, Chaung-U peng ah SAC ralkap nih sentari an cawnghnak le ralkap phortu motor ngan (ke 12 ngei) pakhat cu bomb puahhnawh an ton caah ralkap 11 an thi, tiah Guerrilla PDF in ṭuanvo ngeitu pakhat nih a chim. Nizan August 18 zan sml 8:32 ah Yepusa le Natyekan khua kar ah SAC ralkap sentari cawnghnak cu Guerrilla PDF nih bomb in an puahhnawh hna caah ralkap 4 an thi, tam ngai hliamhma an pu, tiah theih a si.
A luancia August 13 zing sml 11:38 zong ah Myinmu in a rami SAC ralkap motor pakhat cu, Guerrilla PDF le ṭangrual phu hna nih bomb in an rak puahhnawh hna caah ralkap 7 an thi i, tam ngai hliamhma an rak pu. Monywa Ah SAC Ralkap Le Palik Nih Citmi Motor Pakhat Cu Bomb Puahhnawh Ruangah Pathum An Thi: Sagiang ramṭhen, Monywa khua luhnak Ma U gate pawng ah SAC ralkap le palik phortu motor pakhat cu, nizan August 18 zinglei ah PDF nih bomb an puahhnawh hna, tiah theih a si.
Ralveng in aa chawkmi SAC ralkap le palik 8 nih an i citmi motor cu zing sml 7:15 ah M18 bomb lung 3 in kan puahhnawh hna, tiah Brave Heart Army – BHA phu in Bo Sa Ney Maung Maung nih a chim. “Motor cu Jumper motor a si. A hmailei ah pahnih an ṭhu i, a hnulei ah 6 an ṭhu. M18 bomb lung 3 in kan puahhnawh hna i pathum an thi,” tiah a chim.
Motor chung ah cun ralkap le palik 8 an i cit i, cu chung ah 3 cu an thi. Ralkap maw an si, palik ti cu kan hngal kho lo. Bomb kan puah dih in kan hnulei le kan thlanglei in an kan kah, tiah a chim chap. Brave Heart Army – BHA phu nih hin a luancia August 10 lio ah Monywa- Mandalay lampi ah a kalmi SAC ralkap motor pakhat zong bomb lung 3 in an rak puahhnawh bal cang.
Kalaymyo Ah Fir Le Mi Thilri Chuhnak A Tam Chin Lengmang! Sagaing ramṭhen, Kalaymyo ah fir le mi thilri chuh piak a tam chin lengmang. Inn hmai le inn chung ah chiahmi cycle zong an fir. Mi hmai ah phone i chawnh ngam ding zong a si ti lo, tiah tualchung mi hna nih an chim. August 17 ah Tedim peng khuate pakhat in thil cawk ding ah a rami pa cycle Kenbo 125 cu inn hmai ah a chiah i, mino pa pahnih nih an fir piak, tiah theih a si.
“Ka cycle an fir hlan ah kaa ṭhumhnak inn ah sii an rak cawk. Ka cycle cu a lu tawh zong ka hrenh dih ko. Tlawmpal ah ka cycle cu an laak i, an zampi ko. Ka mithmuh ah an i cit i, an kal,” tiah cycle fir piak a tongmi pa nih a chim. Atu lio hi Kalay ah fir le mi thilri chuh a tam khun. Minung pahnih pathum ti bantuk, a bubu ti bantuk in an faak i, thilri an fir an chuh hna. Kutser meithal hna in an tlerh hna. Cheukhat cu ti kan ding ta lai an ti hna i, an duhmi an hmuh cun inn ngeitu hmai ah an fir ko, tiah an chim.
Naite zong ah Kalaymyo Taungphilar sang ummi pakhat cu mifir nih an tlerh i, a tangka le a suiṭhi hna cu an fir piak. A luancia zarh ah khan Tahan sang um inn pakhat ah nu pahnih an lut i, kan ti a hal tuk. Tudur in ti kan i rawn ta lai an ti. Inn chungah phone pahnih an tun lio mi cu an rak fir i, an zaam. A luancia May le June thla lio zong ah Tahan sang ah zanṭim mi an i hngilh dih hnu ah mifir nih hau innka cu an baoh i a chung ah an chiahmi cycle tam ngai an rak fir cang.
Atu bantuk in mi thil fir a tam khunnak hi SAC nih uknak a laak hnu in a si. Rianṭuan awk a um ti lo. Thil man a kai tuk, tangka luhnak lam a um ti lo caah thil a fir a tam khun, tiah tualchung mi hna nih an chim. Cu pin ah Min Aung Hlaing nih a luancia 2021 Febuary le April thla lio ah thong tlami 40,000 leng a rak chuah hna. Tam deuh cu rithaisii le firnak in thong tlami an rak si. Cucaah mifir an tam khunnak hi a si, tiah tualchung mi hna nih an chim.
May-June-July, Thla 3 Chung Tlangcung Miphun Hna Hmunhma Dirhmun, A tang i kan langhtermi hi The Federal Journal nih May-June le July, thla 3 chung i tlangcung miphun hna hmunhma dirhmun an khawmhsuatmi a si. Federal Journal nih cun dohthlennak ah tlangcung mi hna cawlcanghnak le kahdohnak kong hi thla 3 voikhat in an khawmhsuat tawn.
1. Kahdohnak Kong: May, June le July thla chungah tlangcung miphun hna hmunhma ah SAC ralkap le dohthlennak miphun ralkap hna kahdohnak voi 1,516 a chuak. Kachin ah voi 61, Kaya ah voi 149, Chin ah voi 105, Karen ah voi 1,072, Mon ah voi 57 le Shan ah voi 72 an si. 2. SAC Ralkap A Thimi: May, June le July thla chungah tlangcung miphun hna hmunhma ah SAC ralkap a thimi dihlak hi 2,329 an si. Kachin ah 155, Kaya ah 299, Chin ah 471, Karen ah 1,099, Mon ah 150, Shan ah 155! Hliam a tuarmi dihlak 1,210 an si.
3. Miphun Ralkap A Thimi: May, June le July thla chungah tlangcung miphun hna hmunhma ah SAC ralkap he kahdohnak ah miphun ralkap a thimi hi 147 an si. Kachin ah 8, Kaya ah 27, Chin ah 55, Karen ah 36, Mon ah 3 le Shan ah 18 an si. 4. Ralhrial In A Zammi Hna: May, June le July thla chungah tlangcung miphun hna hmunhma ah ah ralhrial in a zammi dihlak hi 427,683 an si. A tam bik cu Kaya a si i ralhrial in a zammi 193,600 an si. A pahnihnak cu Karen a si i 105,650 an si. A pathumnak cu Chin kan si i ralhrial in a zammi 68,933 kan tling cang.
5. Mizapi Thihnak: May, June le July thla chungah tlangcung miphun hna hmunhma ah SAC ralkap nih ningcang loin kahnak, vawlei tang phummi bomh lamhnak, kahdohnak ah thahnawnnak in a mipi a thimi dihlak hi 173 renglo an si. Kachin ah 27, Kaya ah 15, Chin ah 55, Karen ah 25, mon ah 24 le Shan ah 27 an si.
6. Inn-lo A Rawkmi: May, June le July thla chungah SAC ralkap hna nih tlangcung miphun hna hmunhma ah an hrawh, an khanghmi inn dihlak 1,292 renglo a si. Kachin ah inn 91, Kaya ah inn 985, Karen ah 195 le Mon ah inn 57 an si. Note: Tlangcung miphun hmunhma a simi Rakhine ramkulh cu hi thla 3 chungah kahdohnak le ralhrial in a zammi, inn-lo khanghmi chim tlak a um lo caah The Federal Journal nih an telh lonak a si.
Leave a Reply