SAC Cozah Nih Youtube Aiah An Sermi Mtube Ah Thurhnawm Video An Taar+Falam pengah a hosi theihlo mi hriamtlai minung 2 nih khualtlawng mi pakhat thil an chuh!
==========================
SAC cozah nih Youtube aiah an ser i an hman mi Mtube ah zohdawh lo thurhnawm video an taar tiah theih a si. SAC cozah in thawngphuangtu ah an hman mi Zaw Min Htun nih Youtube aiah Mtube kan ser lai i kan hman lai tiah tuan deuh ah a rak chim bal mi cu a tak in an hun tuah i MRTV thawngpang chimnak an taar langh hnu ah thurhnawm video hi a rak lang tiah theih a si.
Ahmutu cheukhat nih “hiti an tuah hi a zohtu ding tam deuh hna seh tiah an taar hramhram mi a si ko lai tiah an zumh. “Hiti an taar langhmi hi an tar sual mi a si ah siseh, an taar taktak mi a si ah siseh an mualpho cikcek ko cang, azeiti hleiin vai i phetcheem awk a um lo, SAC ralkap cozah nih tuah mi paohpaoh hi thil tha a um lo, a um sual hmanh ah a tluang hrimhrim lo” tiah mipi pakhat nih a chim. Crd-The Chin Post
Falam pengah a hosi theihlo mi hriamtlai minung 2 nih khualtlawng mi pakhat thil an chuh, India, Mizoram ramkulh ramri pawng Falam pengah a ho si theihlo mi hriamtlai minung 2 nih Khawthlir khuami Pu Ram Muan Thang cu nihin September 16 chunhnu ah a thil an chuh tiah theih a si. “September 16 ni ah Mizoram ramkulh Bulfekzawl khua Tio tiva ka tan hnu Khuathlir hmunram tiva pakhat ka phan i ka kee ṭawl lio (chun suimilam 11:30) ah a ho si theihlo mi minung 2 nih meithal kah timh in ka ruksai an ka chuh” tiah Pu Ram Muan Thang nih a chim.
Pakhat nih a langhlat in meithal kah dingin a ka tinh i pakhat nih ka ruksai thil a thlok i a lak. Ka phone cu ti nih a cinh suallai ti ka phan caah ka tai ah ka chiah i ka phone cu an ka chut lo. Ka hnulei zong i mer ngam loin khua lei hoih in ka kir, lungtur zawtnak ka ngeih caah an mah hmanh zoh ngam loin ka kir colhnak a si” tiah a chimchap.
Misual pahnih nih an chuhmi ruksai ah angki le India phaisa rupee 14,700 ai tel tiah theih a si. Pu Ram Muan Thang cu a luancia zarh ah khan Mizoram ramkulh Bulfekzawl khua ah a damlo mi an chungkhat a va zoh i a zohmi mizaw a damdeuh caah a kirlei ah a tu bantuk thil a ton hi a si tiah theih a si. Crd-The Chin Post
Relchap, (Crd-The Chin Post), NLD party chungtel pakhat le NLD party ṭanhtu pakhat ralhmun ah an nunnak a liam, Naypyidaw, Ottarathiri(ဥတ္တရသီရိ) peng NLD party secretary U Zaw Myo Win le Yangon ramṭhen Twantay(တွံတေး) peng NLD party dirpitu Daw Khin Myo Nway(kum 44) cu SAC ralkap nih an tlaih hna hnu caan rau lo teah ralhmun ah an nunnak a liam tiah chungkhar he neihniam mi hna nih nihin September 16 ah RFA ah an chim tiah theih a si.
Ottarathiri(ဥတ္တရသီရိ) peng, NLD party secretary U Zaw Myo Win cu Pyin Oo Lwin peng ah aa dor lio September 13 ah SAC ralkap nih an tlaih hnu ah a nunnak a liam tiah a mah he neihniam in ummi party chungtel pakhat nih a chim. ” SAC ralkap hna nih an chimning ahcun cycle he a zaam caah kan kah tiah an chim. September 13 ah a si i, 14 ah chungkhar sin ah thawng an thanh hna, an ruak zong an hmu hna lo” tiah a chim.
Cun Yangon ramṭhen, Twantay(တွံတေး) peng Ziphyogone(ဇီးဖြူကုန်) khuami NLD party dirpitu pakhat si mi Daw Khin Myo Nway (kum 44) cu a luancia August 27 ah tlaihkhih a ton ni hnih a rauh hnu ralhmun ah a nunnak a liam tiah Twantay(တွံတေး) khuami pakhat nih RFA ah a chim. ” A nih cu NLD party chungtel a si lo, chekhlatnnak an tuah lio ah an kut a luan i sizung an phanhpi hnu ah a nunnak a liam” tiah a chim.
Ayeyarwaddy ramṭhen Pathein pengah Zuu din sualnak in minung 7 an thi, Ayeyarwaddy ramṭhen Pathein peng sapahta( စပါးထား) khua ah mino 7 cu hmunkhat ah zuu an din nakin an thi tiah tualchungmi hna sin in kan theih. Tualchungmi hna chimnak ahcun, hmunkhat ah zuu an ding hna i an dinnak hrai hi rungrulthahnak sii an rak chiahnak sii an chiahnak a si i thiang tein an ṭawl lo caah an thih hi a si tiah an chim. A thimi hna ruak cu mibawm chantu phu hna nih Pathein Sii-inn ah an kal pi hna tiah theih a si. A thimi mino hna hi ramkhel kongkau he pehtlaiin atubantukin an ton siloin anmah ordiriamh nak in an thih hi a si tiah theih a si.
Hpakan khuachung suidawr pakhat sing 500MMK leng chuh an tong, Kachin ramkulh, Mohnyin(မိုးညှင်) pengkomh Hpakan Lungkhin lampi ah ummi Wai Phyu Aung suidawr cu nizaan September 15, zaanlei ah mifir nih an luhhnawh hna tiah Hpakan khuami nih an chim. zaan zaanlei suimilam 4:00 hrawng ah ruahpi a fak ngai, culio ah cun private motor pakhat he hriam aa tlaihmi minung 5 nih Wai Phyu Aung sui dawr cu an luhhnawh i sing 500mmk leng an i kalpi” tiah Hpakan khuachung um sui dawr ngeitu pakhat nih a chim.
Wai Phyu Aung suidawr luhhnawh in an phaisa firpiak an tonnak kongah Hpakan peng palik phu nih hlathlainak an tuah tiah theih a si. A luancia September 14 Hpakan khuachung Lungkhin sang ah lungvar/lunghring kawlmi hna thuam aa hrukmi pakhat nih, meithal i put in motor chuhnak a rak cang bal tiah theih a si.
Russia Ralkap Nih An Kir Takmi Hmun Ah Minung 400 Renglo Phumnak An Hmuh! Russia ralkap nih an zam takmi Ukraine ram chaklei Izyum khua ah minung 400 renglo phumnak khur hmuh a si, tiah palik bawi Volodymyr Tymoshko nih a chim. Russia nih an lak i thlanga chung an rak umnak khuapi ah september 16 ah tu bantuk in minung a phu in phumnak kan hmuh hi a si, hmun dang zongah mithi phumnak an um len tiah, a chim chap.
A thimi hna hi zeiruang ah dah an thih ti cu fiang in theih khawh a si rih lo nain Bomb khuavai ruang le ngandamnak lei tha te zohkhenhnak a um lo ruangah a si lai tiah, zumh a si. Russia ralkap hna an umnak hmun paoh ah thih lohnak a tam tiah, President Zelenskyy nih cun a chim. Ukraine nitlak lei hmun zong ah Russia ralkap nih sualnak ngei lo mipi hna cu an thah hna tiah, Ukraine nih an chim nain Russia nih cun a dik lomi tiah ai pheh ve.
US Nih 600 Million Man Hriamnam Ukraine A Bawmh Lai! Russia ralkap pawl rianrang tein tuk khawhnak dingah Ukraine ram cu 600 million man tluk hriamnam bawmhnak ka pek lai tiah, White House nih september 15 a thanh. Ukraine ralkap nih rianrang tein Russia ralkap an tuk khawh thannak dingah a hawikom ram hna le US nih hriamnam bawmhnak kan peknak a si tiah, Anthony Blinken nih a chim.
US nih Ukraine a bawmh dingmi hriamnam hna hi Russia ralkap hriamnam le eidin an i kuat tawnnak le an chiahnak sakhaan tiang a kap khotu, Heimat missile le hriamngan tampi a tel, cun miles 40 tiang a kap kho tu missile 67 million man zong bawmhnak kan pek lai tiah, a luancia zarh ah The Pentagon nih a rak thanh ve. February 24 ah Russia nih Ukraine ram a tuk hnu in US nih Ukraine ram cu dollars 1.1 billion man hriamnam bawmhnak a pek cang.
Leave a Reply