Yangon ramthen, Myo Okkala telin pengkulh tambik ah zaan suimilam 9:00 hrawngah VanLawng thawngtheih a si hnuah , pengkulh tam bikah meikhu lawng te in a kkhat tiah mipi nih an chim. Myo Okkala , Yan Kin , Tamua telin pengkulh tambik ah minmei zaam hmuh a si bantuk in meikhu lawngte hmuh a si tiah mipi nih Khit Thit Media ah an chim.
” Zaan suimilam 9:00 ah vanlawng zuam thawng theih a si hnu ah khua chungah meikhu lawngte hmuh a si, min mei zaam cu an si lo. Inn chung hna ah a lut meikhu pawl cu, vanlawngin an thlah mi a si men lai . zeidah a cang ticu kan thei kho lo.” tiah Myo Okkala tualchung um pakhat nih a chim.
SAC ralkap nih nawlngeihnak a laak hnu in NLD Party chairman Daw Aung San Su Gyi telh in party chungtel 917 tlaih an tong. Cu chung in party chungtel 209 hna cu an umnak inn le an ngeihchiah laakpiak an si, tiah NLD party Central Working Committee nih nihin May 10 ah a thanh.
Tlaihkhih a tong mi NLD party chungtel minung 917 chung in 216 cu luatter an si cang nain, Daw Aung San Suu Gyi, U Win Myint, Dr.Zaw Myint Maung telh in 701 cu hren an si rih. Tlaihkhih an ton chung ah, hrem an ton ruangah le an ngandamnak lei ṭhaṭhi in zohkhenh an si lo ruangah party chungtel in nunnak liam mi 18 an um, tiah an langhter chih.
NLD party headquarters telh in ramṭhen le ramkulh um NLD zung 104 an hrawh, tiah NLD party Central Working Committee nih cun an langhter. SAC ralkap kut in Myanmar ramchung huap in nunnak a liam mi hi minung 2269 an si cang, cu chung in minung 38 cu NLD party chungtel an si, tiah an langhter chih.
SAC ralkap nih remdaihnak ding tonbiaruah sawmnak ah lungtling in minthutnak a tuahtu hriamtlai phu 7 le NCA ah min thutnak a tuah rih lo mi hriamtlai phu 3 an i tel lai, tiah theih a si. Nationwide Ceasefire Agreement(NCA) minthutnak tuah ding in SAC ralkap sawmnak ah tel aa tim mi phu hna cu ALP, RCSS, KNLA-PC, DKBA, MNSP, PNLO le LDU hna an si. NCA minthutnak ah aa tel rih lo i SAC ralkap tonbiaruah sawmnak ah tel aa tim mi phu hna cu UWSP, SSPP le NDAA hna an si. Thazaang a ṭhawng ngai mi hriamtlai phu KIO, KNU, KNPP le CNF hna nih cun SAC ralkap sawmnak, tonbiaruahnak ah kan i tel lai lo, tiah fiang tein an thanh.
Kokang (ကိုးကန့်) MNDAA, TNLA le AA hna cu SAC ralkap sawmnak tel le tel lo ding ah biaruahnak kan tuah lio, tiah an chim nain SAC ralkap nih thawng thanh ṭhan ding in a hnubik rikhiahnak an tuah ni, May 9 tiang ah bialehnak an tuah rih lo. NCA minthutnak a tuahtu All of Burmese Students Democratic Front-ABSDF zong nih kan i tel lai lo, tiah an langhter. Ramkhel lei buainak kong tawlrelnak ding caah biapi ngai a si mi NUG cozah le PDF cu lanhtak in, SAC ralkap nih daihnak ding ca tonbiaruahnak tuah cu a dik mi a si lo, tiah tlangcung hriamtlai phu hruaitu hna nih an chim.
Leave a Reply