Paletwa ah SAC ralkap nih man fawi tein eidin thilri zuar an timh
====================
AA le SAC ralkap kar kahdohnak pehtlaiin a umnak le eidin a cahnak Chin ramkulh Paletwa ah SAC ralkap nih man fawi tein eidin thilri zuar an timh tiah Paletwa khuami nih an chim. Arti hi a leng ah pumkhat 1000ks in kan cawk tawn nain, SAC ralkap nih pum khat ah 100ks in kan zuar lai tiah an chim.
Cu thil zuarnak cu nihin September 16 in kan thawk lai tiah an chim nain tilawng a phak rih lo caah nihin cu an tuah kholo tiah theih a si. SAC ralkap nih a tu bantuk in thil man fawi tein zuar an timhnak cu SAC ralkap nih mipi zohkhenhtu kan si tiah chim in langhter an duh caah a si tiah tualchung mi hna nih cun an chim.
Tu bantuk in man fawi tein thil zuarnak cu sipin nih ṭuanvo lak in an tuah lai i, chungkhar cazin ning in chungkhar pakhat ah minung pakhat nih cawk a ngah lai tiah an chim. Paletwa lawngah siloin Chin ramkulh chung khuapi kip ah tuah an i zuam i a cheukhat hmunhma ahcun an tuah dih cang tiah theih a si. Crd-The Chin Post
Relchap, (Crd-The Chin Post), NLD party chungtel pakhat le NLD party ṭanhtu pakhat ralhmun ah an nunnak a liam, Naypyidaw, Ottarathiri(ဥတ္တရသီရိ) peng NLD party secretary U Zaw Myo Win le Yangon ramṭhen Twantay(တွံတေး) peng NLD party dirpitu Daw Khin Myo Nway(kum 44) cu SAC ralkap nih an tlaih hna hnu caan rau lo teah ralhmun ah an nunnak a liam tiah chungkhar he neihniam mi hna nih nihin September 16 ah RFA ah an chim tiah theih a si.
Ottarathiri(ဥတ္တရသီရိ) peng, NLD party secretary U Zaw Myo Win cu Pyin Oo Lwin peng ah aa dor lio September 13 ah SAC ralkap nih an tlaih hnu ah a nunnak a liam tiah a mah he neihniam in ummi party chungtel pakhat nih a chim. ” SAC ralkap hna nih an chimning ahcun cycle he a zaam caah kan kah tiah an chim. September 13 ah a si i, 14 ah chungkhar sin ah thawng an thanh hna, an ruak zong an hmu hna lo” tiah a chim.
Cun Yangon ramṭhen, Twantay(တွံတေး) peng Ziphyogone(ဇီးဖြူကုန်) khuami NLD party dirpitu pakhat si mi Daw Khin Myo Nway (kum 44) cu a luancia August 27 ah tlaihkhih a ton ni hnih a rauh hnu ralhmun ah a nunnak a liam tiah Twantay(တွံတေး) khuami pakhat nih RFA ah a chim. ” A nih cu NLD party chungtel a si lo, chekhlatnnak an tuah lio ah an kut a luan i sizung an phanhpi hnu ah a nunnak a liam” tiah a chim.
Ayeyarwaddy ramṭhen Pathein pengah Zuu din sualnak in minung 7 an thi, Ayeyarwaddy ramṭhen Pathein peng sapahta( စပါးထား) khua ah mino 7 cu hmunkhat ah zuu an din nakin an thi tiah tualchungmi hna sin in kan theih. Tualchungmi hna chimnak ahcun, hmunkhat ah zuu an ding hna i an dinnak hrai hi rungrulthahnak sii an rak chiahnak sii an chiahnak a si i thiang tein an ṭawl lo caah an thih hi a si tiah an chim. A thimi hna ruak cu mibawm chantu phu hna nih Pathein Sii-inn ah an kal pi hna tiah theih a si. A thimi mino hna hi ramkhel kongkau he pehtlaiin atubantukin an ton siloin anmah ordiriamh nak in an thih hi a si tiah theih a si.
Hpakan khuachung suidawr pakhat sing 500MMK leng chuh an tong, Kachin ramkulh, Mohnyin(မိုးညှင်) pengkomh Hpakan Lungkhin lampi ah ummi Wai Phyu Aung suidawr cu nizaan September 15, zaanlei ah mifir nih an luhhnawh hna tiah Hpakan khuami nih an chim. zaan zaanlei suimilam 4:00 hrawng ah ruahpi a fak ngai, culio ah cun private motor pakhat he hriam aa tlaihmi minung 5 nih Wai Phyu Aung sui dawr cu an luhhnawh i sing 500mmk leng an i kalpi” tiah Hpakan khuachung um sui dawr ngeitu pakhat nih a chim.
Wai Phyu Aung suidawr luhhnawh in an phaisa firpiak an tonnak kongah Hpakan peng palik phu nih hlathlainak an tuah tiah theih a si. A luancia September 14 Hpakan khuachung Lungkhin sang ah lungvar/lunghring kawlmi hna thuam aa hrukmi pakhat nih, meithal i put in motor chuhnak a rak cang bal tiah theih a si.
Russia Ralkap Nih An Kir Takmi Hmun Ah Minung 400 Renglo Phumnak An Hmuh! Russia ralkap nih an zam takmi Ukraine ram chaklei Izyum khua ah minung 400 renglo phumnak khur hmuh a si, tiah palik bawi Volodymyr Tymoshko nih a chim. Russia nih an lak i thlanga chung an rak umnak khuapi ah september 16 ah tu bantuk in minung a phu in phumnak kan hmuh hi a si, hmun dang zongah mithi phumnak an um len tiah, a chim chap.
A thimi hna hi zeiruang ah dah an thih ti cu fiang in theih khawh a si rih lo nain Bomb khuavai ruang le ngandamnak lei tha te zohkhenhnak a um lo ruangah a si lai tiah, zumh a si. Russia ralkap hna an umnak hmun paoh ah thih lohnak a tam tiah, President Zelenskyy nih cun a chim. Ukraine nitlak lei hmun zong ah Russia ralkap nih sualnak ngei lo mipi hna cu an thah hna tiah, Ukraine nih an chim nain Russia nih cun a dik lomi tiah ai pheh ve.
US Nih 600 Million Man Hriamnam Ukraine A Bawmh Lai! Russia ralkap pawl rianrang tein tuk khawhnak dingah Ukraine ram cu 600 million man tluk hriamnam bawmhnak ka pek lai tiah, White House nih september 15 a thanh. Ukraine ralkap nih rianrang tein Russia ralkap an tuk khawh thannak dingah a hawikom ram hna le US nih hriamnam bawmhnak kan peknak a si tiah, Anthony Blinken nih a chim.
US nih Ukraine a bawmh dingmi hriamnam hna hi Russia ralkap hriamnam le eidin an i kuat tawnnak le an chiahnak sakhaan tiang a kap khotu, Heimat missile le hriamngan tampi a tel, cun miles 40 tiang a kap kho tu missile 67 million man zong bawmhnak kan pek lai tiah, a luancia zarh ah The Pentagon nih a rak thanh ve. February 24 ah Russia nih Ukraine ram a tuk hnu in US nih Ukraine ram cu dollars 1.1 billion man hriamnam bawmhnak a pek cang.
Leave a Reply