Kan Chin Ramkulh Tualchung Thawngpang Fonh!!
================
Matupi Khuami Pa Pakhat Dum A Thianh lio Ah Bomb Nih A Puah Hnawh Caah A Nunnak Liam, Chin ramkulh, Matupi Khuboi sang ummi U LaL Ding Lian (kum 38) cu October 10, zinglei suimilam 11:00 hrawng ah Laymyo(လည်မြို) tiva hleidonh pawng Tawlreba dum thianhnak a tuahlio ah bomb nih a puah hnawh caah a nunnak a liam tiah theih a si.
Dum ah cun U Lal Ding Lian a nu le pa zong an um ve, a pa nih a fapa kong Matupi khuachung ah va thanh dingin a kal karah, a fapa cu a thi chuah a tamtuk caah a nunnak a rak liam tiah theih a si. U Lal Ding Lian nih cun a nupi le fa 3 a taantak hna.
Chinland Defense Force-Thantlang Battalion-4 (Zahnak) Ralkap 4 Bomb In Ai Hliam Mi Lakah Minung 2 An Nunnak A Liam, Chinland Defence Force Thantlang Battalion-4(Zahnak)ralkap hna cu, nihin October 10 zinglei ah, Lungler SAC sakhaan thing ah an laak mi bomb a puak sual caah minung pali an i hliam. Hliamhma a pu mi hna cu sizung ah an kalpi ko hna nain sizung an phanh hlan ah, Zaangtlang khuami Biak Tha le Lungler khuami Tum Bawi Tling an nunnak a liam tiah theih a si.
Ngaphe Peng Ah Chin Nu Pahnih An Ruak In Hmuh An Si, Magway ramṭhen, Ngaphe(ငဖဲ) peng Bungbaw(ဘုံဘော) khua ummi Mai Nawn Par Hla(kum 14) le Mai Shwe Zin Yi(kum 21) cu October 6, zaan suimilam 8:00 hrawng ah Goatgyi(ဂုတ်ကြီး) khua in Bungbaw(ဘုံဘော) khua an kir lei lampi ah an rak tlau. October 9, ah Maylat khua thlanglei meng 8 tluk a hlatnak hmun ah cu nu pahnih hna cu an hngawng le an ṭang nam hliamhnak hma he an ruak in hmuh an si.
Chungkhar nih an chimning ah nunnak liammi nu pahnih lakah Mai Nawn Par Hla(kum 14) cu tang 7 a cawnglio mi a si i, a ngandamnak a ṭhatlo caah sii ai thlopmi a si. Cun Mai Shwe Zin Yi(kum 21) cu khuachung ngakchia ca chimtu tualleng sayamah pakhat a si tiah theih a si. An pahnih in khuami nih dawtmi le hawikom tha ngeimi an si caah, mi he i remlo in ral a ngeimi an si lo tiah chungkhar lei nih an chim. Nu pahnih thah an tonnak kong ah mizei kut in dah an nunnak a liam theih a si rihlo.
Chinland Defense Force-Thantlang Battalion-4 (Zahnak) Ralkap 4 Bomb In An I Hliam, Chinland Defence Force Thantlang Battalion-4(Zahnak)ralkap hna cu, nihin October 10 zinglei ah, Lungler SAC sakhaan thing ah an laak mi bomb a puak i minung pali an i hliam tiah theih a si.
Lungler SAC sakhaan thing ah bomb an thianhhlimh i bomb cu an lak, cu hnu ah nitlang ah an pho i cu lio ah cun bomb cu a puak i minung pali an i hliam. Pakhat cu a hliamhma a faak ngai, an pali in sizung ah an kalpi hna lai tiah battalion 4 ralkap pakhat nih The Chin Post ah a chim.
Malaysia, Kuala Lampur Restaurant Pakhat Ah, Myanmar Mi Pahnih Bia I Elnak Ruangah Nam Sawhnak A Chuak!! Malaysia, Kuala Lumpur restaurant pakhat ah rian a tuanti mi Myanmar mi pahnih cu, bia an i el pinah nam sawhnak tiang a chuak tiah theih a si.
October 8, zinglei sml 5 hrawngah Kuala Lumpur restaurant pakhat ah rian a tuan ti mi Myanmar mi pahnih cu bia an i el. Cu hnu nihnih a luan hnu ah, aa hngilh lio mi a hawipa pakhat cu, nam in a hngawng ah a sawh i a sawhtu pa cu a zaam tiah Malaysia thihlutnak phu nih an thanh.
Buanlung Khuami Pa Pakhat Cu Rang Nih A Perh Caah A Nunnak A Liam, Hakha peng Buanlung khuami kum 40 tluk a simi Pu Lian Kulh(Tumte) cu a luancia September zarhhnihnak ah rang nih a perh caah hakha sizung an phak pi, asinain a dam khawh hlei lo caah nihin October 10 zinglei sml 4:00 hrawng ah Hakha sii-inn ah a nunnak a liam, tiah theih a si.
Buanlung khuami pakhat nih, “An rang va lak ding in Zaṭhal khua ah a kal i, rang nih cun a paw ah a perh caah a rilpi a kek. Hakha sii-inn ah thlakhat tluk a um hnuah a nunnak a liam,” tiah a chim. Nihin October 10 zinglei sml 4:00 hrawng ah Pu Lian Kulh(Tumte) cu Hakha sii-inn ah a nunnak a liam i, Buanlung khua ah zing sml 8:00 ah an tlunpi cang. Pu Lian Kulh cu fapa pakhat le fanu pakhat a ngei i, a fale pahnih le a nupi he Buanlung ah khuasami an si.
Cawbuk Check Gate Ummi SAC Ralkap Nih Khualtlawng Mi 8 An Tlaih Hna, Chin ramkulh, Hakha Cawbuk sang, check gate ummi SAC ralkap nih khualtlawng mi 8 an tlaih hna, tiah theih a si. Tualchung mi pakhat nih, “October 8 zing ah cawbuk sang check gate ummi SAC ralkap cu kah an ton caah khualtlawngmi 8 an tlaih hna. SAC ralkap a thimi le aa hliammi an um le um lo cu hngalh a si lo,” tiah a chim.
Tlaih a tongmi hna cu SAC ralkap umhmun an khuarnak rungtlang ah an kaipi hna i, cun palik sakhan ah an ṭhial ṭhan cang hna. Biaceihtu cu Covid-19 in a zawt caah tlaih a tongmi 8 cu nihin October 10 zinglei tiang ah an thlah rih hna lo, tiah theih a si. A luancia October 4 zong ah sii-inn ah zawtnak aa checkmi, mizaw cawngtu le Covid-19 zawtkham sii aa chunmi 19 hna cu SAC ralkap nih Hakha sii-inn ah an rak tlaih cang hna.
ZZLMS Nih Cathanh An Chuahmi Kong Ah MATC Nih An Lung Tlin Lonak An Langhter Ve!, Nai ah Zotung, Zophei, Lautu, Mara le Senthang CDF hna nih MATC nih CDF Mara nan kah hna ahcun kan in kah ve hna lai tiah cathanh an rak chuahmi cungah Mara Administrative Territorial Council (MATC) nih an lungtlinlonak cathanh an chuah ve! Cu an cathanh cu a tanglei bantukin a si!
1.ZZMLS nih 2022 October 7 ah cathanh nan chuahmi, MATC/MDF le CDF-Mara kan karlak buainak kong ah, thildik hlat hmasa loin, CDF-Mara le MATC/MDF kongah i thlak ve dingin cathanh nan chuah. 2. Kaphnih kar lung i hmuh thiam lo nak kong ah, CDF-Mara le MATC/MDF nih hmaitonh tein tonnak ngeih i, hi kong hi dai tein cabuai cung ceihhmai biaruah tinak tuah kan i zuam cuahmah lio a si ko nain, ZZLMS nan rak i thlak ve caah, dai tein cabuai cung i ceihti dingin khua kan khanmi cu a rawk.
3. ZZMLS kan rak dirh hramthok ah khan, ZZMLS cu, unau bantukin i bomh i ram caah san a tlai dingmi ruahnak i pek ti ding le bomh a herhmi thil poh i bawm cio ding in kan rak dirhmi phu a si. A tu bantukin buainak a chuahter kho tu thil kong ah, dankuci(ဒိုင်လူကြီး) tuanin buainak chuahnak ding caah kan sermi phu a si lo.
4. Kaphnih kar buainak kong ah, buainak aa thoknak kaphnih kar hnatlaknak lak i, thil sining tha tein theih fian hnu lawng ah i thlak ve ding a si. Cu si loin, ZZMLS nih kaphnih kar buainak kong ah nan i thlak ve caah, nizaan October 9 ah Ngaphaipi khua ah MATC/MDF kar kahdohnak a chuak i, khuami tampi zong nih khua an zaam taak. 5. Cu caah, hi kong ah hin, ZZLMS zong nan rian a dih rih lo. Cun hi kaphnih kar buainak kong ah, chunglei thil sining taktak thei setsai tung loin hi kong ah mi zeihmanh i thlak ti lo dingin MATC/MDF nih cathanh an chuah.
Hakha Palik Pakhat Nih CDF-Senthang Sin Ah A Hriantling He CDM A Tuah, Chin ramkulh, Hakha palik sakhan ah rianṭuanmi palik Maung Ni Mang cu 2022, October 8 ah mipi lei ah ṭang dingin a hriamthil (BA 63 G3) meithal pahnih le kuan he CDF-Senthang sin ah CDM cawlcanghnak a tuah tiah theih a si.
Ral hriamthil meithal pahnih he mipi ralkap sin ah CDM cawlcanghnak a tuahtu cung ah upatnak kan pek tiah CDF-Senthang nih an langhter. Hrianthil he CDM a tuahtu Maung Ni Mang cu phaisa sing 100mmk laksawng pek a si pinah a himnak hmun ah kalter a si cang tiah CDF-Senthang nih cathanh an chuah mi ah an langhter.
Matupi Le Paletwa Ah Phone Line A Pit, Chin ramkulh, Matupi ah October 9, zinglei in phone line dihlak a pit i, Matupi ah zeibantuk phone line hmanh a tutiang ah pehtlaihnak tuahkhawh an si rih lo tiah theih a si. Cun Paletwa zong ah nizaan October 9, zaanlei in phone line an pit tiah theih a si.
Matupi ah cun SAC ralkap nih phone line atu le tu in an thahpiak hna caah, tualchung um mipi hna cu pehtlaihnak tuah an har tiah theih a si. Matupi khuachung ummi hna nih an chim ning ah Matupi hrambunh khah-lah-yiah 304 in ralkap 5 an zaam tiah bia chawkvai a len hnu caah a tubantuk in phone line a thih hi a si tiah an chim na in, SAC ralkap an zaam le zaamlo kong ah fehternak tuahmi a um rih lo.
Matupi Ah Meithal Puah Thawng A Thang, Chin ramkulh, Matupi khuachung Laungvan sang Laymyo(လည်မြို) tiva lei ah ummi SAC ralkap sakhan pawng ah nihin October 10, zaanlei suimilam 7:50 hrawng ah meithal puah thawng minutes 10 tluk hrawng a thang tiah theih a si.
CDF-Matupi le SAC ralkap kar kahdohnak a chuah le chuahlo kong ah fehternak tuahmi a um rih lo. Matupi khuachung ah SAC ralkap nih phone line an thah caah pehtlaihnak tuahkhawh an si lo.
Relchih, Venezuela Ram Ah Mincimhnak A Chuak I A Thimi Le A Tlaumi 70 Leng An Phan, Venezuela ram ah fak tuk in mincimhnak a chuah caah minung 20 leng an nunnak a liam i 50 leng an tlau, tiah theih a si. Nizaan October 9 ah Venezuela ram chaklei Aragua hmunram ah fak tuk in ruah a sur caah Los Tijeres tiva pi a lian i mincimhnak a chuak, tiah Vice President Delsey Rodriguez nih a chim.
Mincimh ruangah har tongmi cu a si khawh chungin bawmhchanh dingah Ministry of Interior and Internal Security cu Vice President Delsey Rodriguez nih nawl a pek hna. Palik, mi bawmchantu phu le pawngkam zohkhenhnak zung in ṭuanvo ngeitu 1000 nih mincim nih a hrenmi hna le a tlaumi cu an kawl cuahmah hna, tiah theih a si.
Nigeria Ah Tilawng Pakhat A Pil Caah Minung 76 An Nunnak A Liam, Nigeria nichuah thlanglei Anambra ramkulh ah tilawng pakhat ti ah a pil caah tilawng chung cuangmi minung 76 nak tlawmlo an nunnak a liam tiah theih a si.
Minung 80 nak tlawmlo a phurtu tilawng cu Anambra ramkulh Obaru hmunram tili chung ah a pil i, nunnak a liammi chungah mi tamdeuh cu nu le ngakchia an si tiah ṭuanvo ngeitu hna nih an chim. An umnak hmun ah ti a lianh caah a himnak hmun i ṭhial dingin tilawng ai cit mi an si, tilawng hi ti chung a pil hlan ah a engine seh ai rawk, cucaah hlei pakhat a pah i ti chungah a pil hi a si tiah ṭuanvo ngeitu cheukhat nih an chim.
Tilawng a pil ruangah a nunnak liammi hna kongah president Muhammadu Buhari nih a ngaihchiatnak kong a chim. Nigeria ah tilawng in thil phurhnak kong siseh humhimnak ding ca ah siseh nawl zulhnak thazaang a der caah tilawng hi atu le tu ti tluk in ai let lengmang tiah theih a si.
Ramdang Kal Aa Timmi CDM 2 Cu Yangon Vanlawng Tual Ah SAC Ralkap Nih An Tlaih Hna, October ni 9, Yangon vanlawng tual ah ramdang kal ding in aa timmi CDM tuahmi 2 cu vanlawng an hngah lio ah SAC ralkap nih an tlaih hna tiah theih a si. Tlaih a tongmi CDM tuahmi hna hi Mahlaing peng siangniam ruun cachimtu U Aye Kaung le Yangon medical university lecturer Daw May Htu Kyaw hna an si.
CDM an tuah ruang ah an tlaih hna hi a si. Aluancia September thla zong ah sianginn cachimtu pakhat cu vanlawng tual ah an rak tlaih bal cang nain a phone le computer ah ramkhel kong zeihmanh a tarlanghmi um lo caah phaisa an hal i an rak thlah ṭhan tiah CMD lei tawlreltu pakhat nih a chim.
SAC ralkap nih CDM tuahmi min cazin pawl cu vanlawng tual le ramri checkgate kip ah an pek hna i an rak tlaih lengmang hna. An tlaihmi hna cu an hrem hna hnu ah rianṭuan ṭhan ding in min an thut ter hna i rian ah an luhter ṭhan hna. A cheu phaisa ngeimi nih cun kyat sing 50-100 kar an pek hna i an thlah ṭhan tawn hna tiah theih a si. Crd-The Chin Post
Leave a Reply