Nizaan zaan lei suimilam 4:30 hrawngah Sagaing ramthen, Monywa pengkulh, Tawpo khua ah a um mi U Zaw Zaw Aung le a nau a si mi U Htun Naing dalaan unau hna cu pangpar zuar dingah an kal i, Monywa khuapi in Tawpo-Kyapaan-Monywa lam lei i thawh ttan dingah an chuah lio ah Kyaapaan lam then an phak bak ah Mipi kan ralkap PDF hna nih meithal in an kah hna i, U Zaw Zaw Aung cu a hmun bak a thi colh tiah theih a si i, a nau U HTun Naing cu a zaam kho nain PDF kan nau le hna nih an dawi i, Minywa pawngah an thah thiamthiam tiah theih a si.
Nizaan zing lei suimilam 4:30 hrawng ah Magwe ramthen, Gangaw pengkulh, nitlak lei Gangaw khua chung um U Mg Mg Soe le U Kyaw Htu Ya dalaan pahninh hna cu an inn ah an um lio ah Mipi kan ralkap PDF hna nih an inn cia ah an tlaih hna tiah theih a si. Nizaan tihni lio zongah PDF kan nau le hna nih Dalaan minung pa 9 an thah cang hna i, Nizaan an thah mi hen cun minung 11 an thah cang hna tiah theih a si.
Relchap, Sagaing ramṭhen, Taze peng chung ah kahdohnak voi 2 a chuak i SAC ralkap 13 an thi, 20 leng hliamhma an tuar tiah Taze-PDF nih May 22 ah cathanh an chuah. May 22 zing sml 8:00 hrawng ah Taze khua thlanglei kam meng 4 hlatnak Khapawng Kyaing(ခပေါင်းကြိုင် ) khua in a chuakmi SAC ralkap 100 hrawng cu, Seinsa khua kam ah bomb in an puahhnawh hna i 3 an thi, tiah theih a si.
Cu hnu zanlei sml 3:00 hrawng ah SAC ralkap pawl cu, Taze peng Chaungyu khua le Ye U peng Hletun(လှည်းသွင်း) khua karah PDF nih kan kah ṭhan hna i, SAC ralkap 10 nak tlawm lo an thi, 20 leng hliamhma an pu, tiah Taze-PDF nih an langhter. “A voikhatnak cu bomb in kan puahhnawh hna. A voihnihnak ah hriamngan he hriamhme he kan ṭhuat ṭhan hna. Minutes 40 chung hrawng kan i kap,” tiah Taze-PDF pakhat nih a chim.
Cu kahdohnak ah Taze-PDF, Shwebo pengkomh Battalion 6 le 7, Hphinit Taze(ဖီးနစ်တန့်ဆည်), Dragon Warrior ၊TY Local hna le a dang phu hna i bawm in an kah hna. PDF lei in a thimi le aa hliammi an um lo, tiah theih a si. Rallam a sialmi SAC ralkap pawl nih Taze peng thlanglei um khuami inn cu, mei in an khangh caah an kah hna. Kahdohnak a daih in SAC ralkap pawl cu Ye U peng Panaka khua lei ah an lan, tiah theih a si.
KIA le SAC ralkap karlak ah nihin zinglei Sml 7:00 hrawngah Phakanh , MaMoe Sanpiah khua ah kahdohnak a chuak i SAC ralkap 7 an thi tiah theih a si. Rallam a siam mi SAC ralkap hna cu bomb puahhnawh an si i kaphnih kahdohnak a chuak i mizapi 2 hriamngan kuan nih a khen hna i hliam an tuar tiah tualchung mi pakhat nih The 74 Media ah a chim. ” Biakinnn zong an kah len i civil mi pakhat a khen Kahdohnak a fah tuk caah kan va chanh kho rih lo. SAC ralkap pawl nih inn leng nan chuah ah cun kan in kah hna lai tiah an kan hro ” tiah a chim chih. Hriamngan kuan in hliam a tuarmi 2 an si i pakhat cu a hliam a fah ngai caah a nunnak caah thinphang ngai a si tiah khuami pakhat nih a chim.
” Biakinn chungah a hliammi pakhat cu a hliamhma tlawmpal te lawng a si thinphan ding um lo. Lamcung ah an hliamh mi pakhat cu faktuk in an hliamh i a hohmanh nih kan chanh kho lo leng chuak hlah uh an kan ti i Hriamngan thawng cu tu le tu a thang ko ” tiah a chim. Bomb puahhnawh an ton caah SAC ralkap 7 an thi i kaphnih kahdohnak ruangah mipi inn cheukhat an rawk tiah khuami hna sin in theih a si. Mipi inn a rawkmi hi inn zeizah a si ti cu kan fiang rih lo. Kaphnih kahdohnak a chuah hnu in SAC ralkap hna cu khuachungah an um rih i khuami hna cu inn leng nan chuah ah cun kan in kah hna lai tiah an kan hrocer caah thinphang in kan um hna tiah khuami hna sin in theih a si.
Leave a Reply