BREAKING NEWS, Speak Out Tuahpiak Hram Cio Dingin Nawl A Si E!

Ramlak i ral a zaamnak hmun ah a nunnak a liam

Matupi peng Ai Daak ramzaam camp ah a zaam mi pakhat cu ruah lo piin a nunnak a liam tiah theih a si. Ramtang ahcun si-ai a um lo tikah kan si khawh chung in kan thlop ko nain a nunnak a liam hi a si. Hi hmun ah ral a zaam mi hna hi Tar, nu le hngakchia rumro an si caah bawmchanh an herh ngaingai. Si-ai he pehtlaiin siseh, ei le din in siseh bawmh kan herh hringhran ko.

Mizoram ah a zaam mi zong bawmh cu an herh tuk ko nain ram chungah a zaam mi hi bawmh kan herh deuh ko. Ramtang ah zaam a si tikah thil a tlamtling lo mi a tam ko. Media zong nih speak out kan tuah piak hram u law ka duh ko tiah Ai Daak ah a zaam mi pakhat nih a chim.

Dawei le Launglung peng ah 2022 April thla chung ah CDM a tuah mi palek pakhat tel in mizapi 25 cu SAC ralkap nih am tlaih hna tiah tualchung mi hna sin in theih a si. Ralzaam le PDF phaisa nan bawmh hna i NUG cozah he pehtlaihnak nan ngei tiin SAC nih sual an puh hna i an tlaih hna tiah tlaih a tong mi hna i an chungkhar hna sin in theih a si.

CDM palek Ko Tat Paing Soe(ကိုသက်ပိုင်စိုး) cu April 4 ah Dawei pengtthen Matta( မေတ္တာမြို့) khuapi Kyaukme(ကျောက်မဲ) khua datsi dawr a phak lio ah tlaih a tong. A pate le an u datsi dawr ngeitu hna tlaih chih an si tiah Dawei thawngzamh nih a ttial.Cu pin ah Dawei khua chung ah khualtlung cazin kan chek tiin SAC ralkap nih mizapi inn ah an duh paoh in an lut i mizapi an tlaih hna tiah tualchung mi nih an chim.

SAC ralkap nih kum tling lo tanghra cawng lio siangngakchia nu cu April 28 ah khan an ral tlaih. April 29 zong ah khuachung ah cycle aa phirh mi minung 2 meithal in an kah thah hna tiah mithmu tu pakhat nih a chim. Tlaih a tong mi minung 25 lak ah tukvelh nak ah in a thi mi pakhat a um tiah tualchung thawngzamh hna nih an langhter, Tlaih a tong mi hna cu an chungkhar hna he pehtlaihnak an ngeih khawh rih lo caah an nung dam maw?Dam lo dah! ti hi an chungkhar hna nih an hlat cuahmah lio pi a si.

Myanmar ralzaam hna nih an zulh mi hlei cu Thailand ralkap hna nih an hrawk piak cang hna. Myanmar le Thailand ramri a si mi Taungyin Tiva -Walay tiva  cu Thailand ralkap hna nih an hrawk piak hna tiah theih a si. Cu chin chap ah a poi bik mi cu Fortify Rights mibomchantu  hna zong Myanmar ralzaam pawl cu ralring an peek hna tiah theih a si.

Fortify Rights mi bochantu phu hna nih an mah sin in Thai cozah nawl ngei tu hna lei ah Me-Soh ah phung ning loin tlaih khih a tong mi, Myanmar ralzaam sin in Extortion hmattan pawl an ngeih nak kong zong ralring an peek hna tiah theih a si.