Breaking News; SAC ralkhrang MAL nih Mipi sinah thawng thanhnak a tuah!!!

Protesters take part in a demonstration against the military coup in Yangon on February 6, 2021. (Photo by YE AUNG THU / AFP)

Electric Le Sehrawl Oil Semrel Zawrh Deuh In Hmang Hram Uh, Tiah Min Aung Hlaing Nih Biachanak Bia A Chim!
============================
Electric le sehrawn oil hi zawrh deuh (semrel) tein hmang uh, tiah SAC ralhrang lutlai Min Aung Hlaing nih a chim. Min Aung Hlaing nih, ” Rampi cozah nih electric tlam a tlin khawh nakhnga i zuam in a herh ning in tuanvo kan laak bantuk in Mipi lei nih Electric nan hman mi pawl hi zawrh deuh (semrel ) tein hmang hram uh law, Sehrawn oil nan hman mi zong semrel tein hman a herh” tiah a chim.

Myanmar ram pumpi ah nifatin kan hman mi sehrawn oil hi minung pakhat nih theih hngalhnak thinlung he zawrh deuh (semrel ) tein a hman a si ahcun Ramdang phaisa hman nak pawl zong zawrh deuh khawh a si lai ii rampi phaisa hman nak zong a zawr (tum) deuh khawh lai ti zongin a chim.

Cu pinah Ti hi cinthlaknak nak ah a biapi tuk mi a si caah ti nan hman mi zong semrel thathmennak ngeih tein hmang hram uh, tiah Nay Pyi Daw ah tuab mi Finance Commission tonbiaruahnak ah a chim.

Thla 19 Chung NUG Dirhmun Zohnak, National Unity Government (NUG) cu April 16, 2021 ah dirh a si i Nov 16, 2022 ah khan thla 19 a tling cang. PDF zong hi May, 2021 ah dirh thok a si caah thla 18 renglo, thla 19 chung an lut ve cang. Hi thla 19 chung NUG dirhmun kha a tawinak in kan zoh lai.

People Defense Force (PDF), Atu tiangah NUG he pehtlaihnak a tuahmi, NUG tangah a ummi PDF 221 an um cang i Karanni ramkulh i KNDF le Chin ramkulh i CDF hna relchih ahcun mipi vengtu hriamtlaibu 300 renglo an si. PDF 63 hi NUG Ministry of Defense theihpinak an hngak lio tiah theih a si.

PDF hi an dihlak in 65,000 hrawng an si i cu chungah zatuak 20 hi hriamnam tling an i tlaih kho i zatuak 40 hrawng hi kutser meithal lawng an i tlaih kho rih. October, 2022 cazin ningah PDF 300 renglo an um i PDF pakhat ah minung 200 in 500 tiang an um.

Local Defense Force (LDF), LDF hi tualchung vengtu ralkap an si i April, 2022 tiangah khan 401 an um cang tiah NUG nih an thanh. LDF hi mahle hmunhma ah mah thazang tein a cawlcangmi an si. NUG le tlangcung hriamtlaibu (EAOs) hna tangah an um lo nain pehtlaihnak a tuahmi LDF 354 an si.

LDF 100 hrawng cu PDF ah an i thleng, an lut i cheukhat cu Public Defense Team-PDT (ပြည်သူ့ကာကွယ်ရေးအဖွဲ့–ပကဖ) ah an lut. LDF dihlak ah chungtel 30,000 hrawng an um i cu chungah zatuak 25 cu PDF ah an lut cang tiah theih a si.
Public Defense Team (PDT)

PDT hi khuapi chungah kahdohnak tuah ding, a herh ningin PDF hna bawmtu ding, mipi lemsoinak tuahtu ding, hriamnam le thildang phawrh-thiarnak bawmtu le PDF ah a lut tharmi hna raldoh cawnpiaktu dingah NUG nih an sermi bu a si.

NUG nih an thanh ningah peng 330 ah PDT 250 an dirh khawh cang. Hmasa ah cun khuate hrambunh in ser a si i a hnuah khuapi deuh zongah serchap a si. A bik in PDT hi Sagaing le Magwe ramṭhen ah an tam. An i tlaihmi hriamnam cu mah serchom meithal deuh an si.

NUG nih PDF fawi deuh in tlangtlak nak dingah tiin Military Division Commands-MDC hmun 3 an ser. Kachin, Sagaing, Magwe, Mandalay le Chin ramkulh hna cu MDC-1 an si i hi chungah PDF 200 hrawng an um.

Cu pinah hriamnam serchuahnak hmun 70 an tuah khawh cang tiah theih a si. NUG Ministry of Defense nih War Office zong an sak lio a si. PDF hna nih an herh bikmi cu meithal le zenkuan a si. PDF zatuak 60 hrawng lawng nih meithal an i tlaih kho rih. Caan tawite chungah NUG hi PDF tampi a funtom khawhmi le meithal zeimawzat an pek khawhmi hi an hlawhtlinnak pakhat a si.

NUG cu mipi nih dirkamhmi cozah a si ko nain zei ram hmanh nih phungning tein an cohlang rih lo i hriamnam le tangka zongin an bawm fawn lo. Cu bu cun rian tampi an ṭuan khawh. NUG nih tangka an hmuhmi a tam deuh cu hriamnam cawknak/sernak ah an hman. AA nih a ralkap 30,000 hrawng meithal tlaihter dih dingah kum 13 an rau. MNDAA zong 2009 in hrimhṭhan an i thok i kum 13 a rauh hnu lawngah atu dirhmun khi an phan kho. TNLA nih a ralkap 8,000 hna meithal tlaihter dih dingah kum 12 an rau ve.

Cucaah kum hnih tling lo, thla 19 chungah NUG nih atu bantukin rian an ṭuan khawhmi le hriamnam an chuahpi khawhmi cu an ṭhawng tuk ti a lai. Cun NUG hi tangka kawlnak lei ah an hlawhtling ngaingai. Spring Lottary (နွေဦးထီ), NUG Bond (ငွေတိုက်စာ ချုပ်များ), inn hmun zuarnak le NUG-Pay in tangka tampi an hmuh. Tukum October tiangah NUG nih tangka an kawl khawhmi dihlak US Dollar nuai 55 a tling.

Hriamnam cawk/sernak lei lawng si loin anmah ukmi hmunhma ah uknak, biaceihnak, fimcawnnak, ngandamnak le a dangdang tampi an ṭuan khawh cang. Thla 19 chungah hitluk in NUG nih rian an ṭuan khawh hi ramchung ramleng in mitampi an khuaruah a har cio. Putin nih Ukraine fawitein kan lak lai tiah a ti i atu tiang an lak khawh lo bantukin SAC nih NUG le PDF pawl cu caan tawite chungah kan hloh viar hna lai an timi cu bialo ah a cang.

Cucaah ramdang zong nih NUG hi naihniam deuh in an chawnhbiak lengmang cang hna. UN le ASEAN nih chawnhbiak an duh bal hna lo nain atu cu Myanmar ram buainak tuahremh dingah cun NUG he biaruah a hau tiah an chim cang. Cucaah thla 19 chung NUG dirhmun cu ṭhancho lei a panh ti khawh a si. Crd-The Chin Post

Tamu Ah Pyusawhti Phu Nih Gorkha Mino Pakhat An Thah Hleiah Rupee Sing Thum An Chuh, Sagaing ramṭhen, Tamu peng ah Gorkha mino pakhat cu pyusawhti phu hna nih an tlaih hnu ah an thah leng ah rupee sing 3 an chuh tiah tualchung mi hna nih an chim.

November 24, zaanlei suimilam 5:00 hrawng ah Tamu, Gankyiwa hleidonh pawng ah Gorkha pa pakhat Raju cu SAC ralkap kuttang um pyusawhti phu hna nih a ruang umlo in an tlaih hnu ah a lu ah meithal in an kah caah a thih hi a si.

Pyusawhti phu hna nih an thah mi Gorkha mi Raju cu Nanphalung ah a ummi a si i, Gankyiwwa hleidonh pawng phungki sianginn um pyusawhti phu hna nih an tlaih, phungki sianginn hnulei ah an kalpi i India phaisa rupee sing 3 an chuh hnu ah an thah tiah theih a si.

Launglone Pah Kah Phah In Ralkap 6 Hriamnam He An Zam, Tanintharyi ramṭhen, Launglone peng ah hram a bunhmi Launglone Pah Kah Phah in ralkap 6 cu hriamnam cheukhat he an zam, tiah theih a si. A zammi Pah Kah Phah ralkap 6 cu Baih Kalay, Khun Daung, Chi Faing, Tauk Kyi, Di Laung Ki le Tarzan(တာဇံ) an si, tiah Launglone peng Pah Kah Phah nih nizan November 24 ah cathanh an chuah.

A zammi ralkap 6 hi zulhphung kan chiahmi an zulh khawh lo caah an zammi a si lai, tiah Launglone peng chimphuannak nawlngeitu pakhat nih a chim. “Zulh phung kan sermi an zulh khawh lo ruangah an zammi a si kho.

Annih hi dohthlennak ai thawkka tein atu tiang ramlak ah a ummi an si ko. Khoika dah an zam ti zong kan hngal kho hna lo. An zam hmanh ah SAC ralkap lei ah cun an ṭang lai lo, anmah tein bu dang maw dirh an duh ti cu kan hngal lo,” tiah a chim chap.

A zammi ralkap 6 cu a luancia November 22 zinglei ah an rak zam i, cu an zam lioah sakhan ah a tangmi an hawile zong harnak an pe hna lo nain, meithal voikhat an puah, tiah theih a si. An zam lioah Luanglone Pah Kah Phah meithal cheukhat zong an i kalpi caah dohthlennak phu pakhat khat sinah an rak zampi a si ahcun thawng nan kan thanhnak lai kan in nawl hna, tiah an langhter.

SAC Ralkap Nih Htilin Peng Wawyin Chaing(ဝါးရင်းချိုင်) Khua An Khangh Caah Inn 30 Leng A Ciam, Magway ramṭhen, Htilin peng Wawyin Chaing khua cu, SAC ralkap nih nizan November 24 zing sml 9:00 hrawngah an khangh i inn 34 a ciam, tiah theih a si.

SAC ralkap nih an khanghmi Wawyin Chaing khua cu YRA Htilin le PDF nih an va phalh khawh, tiah Gangaw Youth Voice nih an langhter.
SAC ralkap pawl cu Htilin peng ah thlahnih leng rallam an sial cang i thlahnih chungah khuate 11 um mipi inn 168 an khangh cang, tiah YRA Htilin nih cathanh an chuah tiah theih a si.

Khaikam Ah Min Hngalh Lomi Phu Nih Tualchung Mi Pa Pakhat Meithal In An Kah I A Thi , Chin ramkulh, Tedim peng Khaikam khua No.3 sang ah a luancia November 22 zing sml 11:00 hrawngah pa pakhat cu, min hngalh lomi hriamtlai phu nih meithal in an kah i a thi, tiah theih a si.

Tualchung mi hna nih, November 22 zing sml 9:00 hrawngah meithal puah thawng kan theih i cu hnu caan tlawmpal a rauh ah mipa pakhat ruak kan hmuh, tiah an chim. Meithal kah a tongmi pa cu Kalaymyo, Hlaing Tharyar(လှိုင်သာယာ) sang ah a ummi Nyi Nyi Lwin(kum 43) a si i, lo ah a kal i a tlun lei ah min hngalh lomi hriamtlai phu nih an kah hi a si, tiah theih a si.

Falam Ah Vok Zawtnak Tlangrai A Tlung, A Thimi An Tam Ngai Cang, Chin ramkulh, Falam khuachung ah Vok zawtnak tlangrai a tlung i zawtkham sii a um lo pinah sii chuntu an um lo caah a thimi an tam cang, tiah theih a si. Tualchung mi pakhat nih, “Atu lio hi Falam ah Vok zawtnak tlangrai fak tuk in a tlun caah a thimi an tam ngaingai cang.

Voksa zong kan ei ngam ti hna lo. Zawtkham sii zong a um lo pinah sii chuntu siibawi te zong an um lo,” tiah The Chin Post ah a chim. Vok an zawtnak hi zarh thum hrawng a si cang. A dang inn zuat saṭil tu cu an zaw hna lo. Falam khua chung mitam deuh nih cun Voksa kan ei ngam ti lo. Market Vok an thahnak zong ah Voksa a cawtu kan tlawm ngaingai cang, tiah a chim chap.

Falam peng Varung khuami pakhat nih, kannih lei hi cu Vok a zawmi le a thimi cu an um hraw rih lo. A dang inn zuat saṭial hna zong an zaw hraw rih lo, an him ko, tiah The Chin Post ah a chim. A luancia September le October thla lio zong ah Hakha ah Vok zawtnak tlangrai a rak tlung i, a thimi zong an rak um. Atu cu zawtkham sii kan chunh hna i ai ning ngai cang, tiah Vok zuatu pakhat nih a chim. Crd-The Chin Post

Be the first to comment

Leave a Reply

Your email address will not be published.


*