BREAKING NEWS: SAC Ralhrang Nih Yangon Le Mandalay Khualipi Ah Mino Pawl A Bubu In An Tlaih Cuahmah Hna!

Mandalay Ah Hriamtlai Phu Chungtel 10 Hrawng Cu SAC Ralkap Nih An Tlaih Hna +SAC Ralkap Nih Ramleng Chuah Aa Timmi Chin Mino 20 Hrawng Cu North Dagon Ah An Tlaih Hna!

===============================
Mandalay khuachung Myanmar Return Ranger Force phu hruaitu Bu Aung May telh in ralkap 10 hrawng cu Aungmaytasan (ေအာင်မြေသာစံ) peng an umnak inn ah SAC ralkap nih an luhhnawh hna i, August 1 ahkhan an tlaih hna, tiah dohthlennak tuahtu phu pakhat simi Mandalay People Rescue(MPR) nih an thanh. SAC ralkap 50 hrawng nih zinglei ah an tlaih hna, tiah MPR phu chungtel Ko Htat Aung nih RFA ah a chim.

“Sangchung ah ruahlopi in zinglei ah SAC ralkap pawl cu an lut i, an tlaihmi hna cu 10 leng an si lai, an min cu tlamtling in theih a si rih lo, inn pakhat chung i an um caah an dihlak in an tlaih hna. A luancia zarh chung ahkhan anmah phu hruaitu pakhat nih a rianṭuannak ah a phone a philhtak i, cu ruangah atu bantuk in tlaihkhih an tonnak hi a si kho tiah kan zumh” ti in a chim.

Tlaih a tongmi hna cu Mandalay Palace ah an kalpi hna i, atu tiang cu pehtlaih khawh an si rih lo, tiah a chimchap. A luancia July 17 ah MPR phu chungtel umnak inn 2 cu SAC ralkap nih an rak luhhnawh caah hriamthil zeimawzat an rak lakpiak hna, tiah MPR phu chungtel hna nih an chim.

SAC Ralkap Nih Ramleng Chuah Aa Timmi Chin Mino 20 Hrawng Cu North Dagon Ah An Tlaih Hna!: Yangon, North Dagon peng no.39 sang ah aa dormi Chin mino 20 hrawng cu a luancia July 31, zaanlei suimilam 5:00 luan hrawng ah SAC ralkap nih an tlaih hna, tiah sangchung ummi nih an chim. Tlaih a tongmi hna cu ramleng ah rianṭuan ding in chuah aa timmi an si i, Chin ramkulh, Mindat, Matupi, Hakha le Falam khuami an si hna i ramleng chuak ding in Yangon khuachung a phan mi an si, tiah min langhter lo mi Chinmi pakhat nih RFA ah a chim.

“Tlah a tongmi hna hi a zat fiang tein chim khawh a si rih lo. Ramleng chuak ding in passport aa tuahmi an si. Ramleng chuak ding pawl a tawlreltu agent hna zong pehtlaih an si nain thawng fiang theih a si rih lo. Atu ah cun palik sakhan ah an chiah rih hna tiah kan theih” ti in Chinmi pakhat nih cun a chim. Tlaih a tongmi hna hi kum 20 in kum 30 kar hrawng an si i, SAC ralkap motor 3 in ralkap 40 hrawng nih an tlaih hna, tiah theih a si.

July Thla Dongh Lei Zarhkhat Chung Ah SAC Ralkap Le Karenni Phufonh Kar Kahdohnak Voi 48 A Chuak I, SAC Ralkap 88 An Thi: July thla dongh lei zarhkhat chung ah Shan ramkulh Pekhon peng(ဖယ်ခုံ) le Karenni peng(ကရင်နီ) chung ah SAC ralkap le Karenni ralkap phufonh kar kahdohnak voi 48 a chuak i SAC lei in ralkap 88 an thi. KNDF lei nih methal zun 21 an lak i, kan ralkap pakhat a nunnak a liam ve, tiah cathanh an chuah.

Kahdohnak a chuahnak hmun hna cu Pekhon peng, Loikaw peng (လွှိုင်ကော်), Demoso peng (ဒီမော့ဆို) le Hpruso peng(ဖရူဆို) hna ah an si i SAC ralkap nih vanlei kahdohnak voi 21 a tuah, tiah theih a si. SAC ralkap nih sualnak ngei lo mi minung pahnih an thah hna pin ah Inn pakhat, motor pahnih le cycle pathum an khangh i phaisa Kyat sing 60 an fir, tiah theih a si. Cu kahdohnak ah cun Karenni National Defense Force (KNDF), Karenni Army (KA), Demoso PDF, Loikaw PDF, Hpruso PDF, Pekhon PDF le SSRY hna an i bawm, tiah theih a si.

Yangon Ah Mi Pakhat Nih Motor A Zaampi I, Minung 3 A Pah Hna!: Yangon, Shwepitagway(ရွှေပြည်သာကွေ့) CNG dawr ah gas rawn ding in a dirmi YBS-94 motor pakhat cu nihin August 2, zinglei suimilam 3:30 hrawng ah mi pakhat nih an fir i, YBS motor a zaampitu pa nih lampi ah midang motor a pah hna i, kum 12 ngakchia pakhat le midang pahnih nunnak a liam, tiah theih a si. YBS – 94 motor number 2P-7221 cu Shwepitagway (ရွှေပြည်သာကွေ့) CNG dawr ah gas rawn ding in a phanh hnu ah, driver nih motor cu dirter in an hmai dirmi motor pawng i a va kal kar ah aho si theih lo mi pakhat nih a motor cu a zaampi, tiah theih a si.

Motor cu an kawl hnu ah lamkam ah meitung i pah in a rak dir cu an hmuh, cu motor nih cun Danginkung(ဒညင်းကုန်း) lam tonnak ah motor dang zong a rak pah hna, tiah motor khaltu phu nih cathanh an chuah. “Danginkung(ဒညင်းကုန်း) lam tonnak ah motor i pahnak a chuak i, kum 12 tluk ngakchia pa pakhat telh in minung 3 an nunnak a liam,” tiah motor pah a tong mi hna bawmchantu pakhat nih a chim. YBS Motor a zaampitu cu zuu ri mi a lo, tiah cu thil a cannak pawngkam ummi hna nih an chim.

Motor pah a tongmi hna cu Insein siizung ah an kalpi hna i, an chungkhar zong an phan cang ko nain, hliamhma tuarmi le nunnak liammi hna an min le an umnak tak cu fiang in theih a si rih lo. Motor firtu pa cu an tlaih cang, tiah theih a si. Muse Peng Nihnih Chung Kahdohnak Ruang Ah Tualchungmi Pakhat A Thi I, Midang 9 Hliam An Tuar!: Muse peng nihnih chung kahdohnak ruang ah tualchung mi pakhat a thi i, midang 9 hliamhma an tuar, tiah tualchung mi nih an chim.

Nihin August 2, zinglei suimilam 11:00 hrawng ah Muse peng no.1 dawr pawng ah SAC ralkap kuttang um pyi-tuh-sit 2 cu motor in chikhat an dir karlak ah cycle a cit mi hriamtlaitu nih an kah hna caah hliam an tuar, tiah tualchung mi pakhat nih a chim.

Nizaan August 1, zaan suimilam 9:00 ahkhan Muse khuachung palik sakhan le Homon(ဟိုမွန်) sang, Suamsaw(စွမ်စော်) sang ah kahdohnak a chuak i, palik 3 hliamhna an tuar, tiah khuabawi he naihniam in a ummi pakhat nih a chim. Cu bantuk in August 1 zinglei ahkhan muse no.1 sipin dawr pawng traffic palik umnak pawng ah puahkehnak a chuak i tualchung mi pakhat nunnak a liam, tiah theih a si. Muse khuachung SAC ralkap le palik nih lampi aa chokmi mipi hna cu an chek hna tiah theih a si.

Be the first to comment

Leave a Reply

Your email address will not be published.


*