Breaking News, SAC Ralhrang Nih Mipi Kan Ralkap Minung Pathum An Kan Tlaih Piak Hna E!!

Tuni zaanlei suimilam 3:30 hrawngah Sagaing ramthen, Kalay Myo, Ngiang-Pyin-Taya in a rak phan mi Tamu-PDF tatyin 2 in PDF phu chungtel Khant Kyaw Lynn le Kalay Myo, Myo Ta sangah a rak phan mi Kalay-PDF tatyin 3 in Zay Zar Aung hna cu SAC ralhrang nih an tlaih hna tiah theih  asi.

Nizaan suimilam zaanlei 5:30 hrawng zong ah Sagaing ramthen, Kalay Myo, Myiang Shiang lamah Kalay-PDF phu chung tel a si mi Van Neih Bik (Aye Maung) cu SAC ralhrang nih an tlaih tiah theih a si.

Relchap, “The Famous Halkha Rebellion”, Minthang Lairal Kum 100 Tlin Ni Philhlonak (1917-2017), A liamcia kum 1914 ahhin vawleicung ralpi pakhatnak a rak tho. Vawleicung ram t’hawngbik a rak simi Mirang ram(England) pi cu German ral ruangah khuaci a rak mui ko. Cu German ralpi tei khawhnak dingah cun England Cozah nih ramkip ah ralkap a rak khawmh hna. Chinram le Chin miphun zong cu Mirang ukmi Ram kan rak si bangin Chin miphun chungah German ral do dingin Mirang nih Chinram ah ralkap khawmh hram cu an rak thawk. Tedim in minung 1000 le Falam in minung 600 France ram ah German ral do dingin an rak kal(Zo History t’ialtu Pu Vumson Suantak nihcun minung 4000 an si tiah a ti). Tedim peng hna cu cuti Mirang nawl an ngaih caah Tedim peng cu kumkhat chung ngunkhuai kholh an rak luat.
Falam peng le Tedim peng cu mirang sin in mithmai t’ha an rak hmu. Sihmanhsehlaw, Halkha peng(Atu Thantlang peng le Zotung tlang telh) kan Pupa hna nih cuti hramhram in German raldoh fial an rak si cu an duh hrimhrim lo. Mirang nihhin Uk cu an kan uk phung a si ko. Nain kan nunnak tiang pei laak an kan timh hi timi an vun theih tikah cun, France ram kal i German ral doh zongah thih t’hiam kan um zongah zei hlei lo. Cucaah kal nakcha cun kanmah te zong in kan i nawng ko lai an rak ti. Kan Lairam chuah taak hrimhrim kha an rak duh lo.
Mirang hi kan Ram in kan t’hawl hna lai tiah biathli in kan Lai pupa hna nih khua an khang. Pu Lian Mo(Halkha Chief) nih nitlak lei Congthia le Zophei tlang cu Lairal tho dingin a sawm hna. Pi T’ial Nawn nih thlanglei Zotung tlang, Miram tlang(Mara),Lautu tlang, Thangaw khua Ram UK Bawi vialte hna cu Sia thah biakam ser in Lairal tho dingin a va sawm ve hna. Cutincun Lairal tho dingin khua 13 hna cu Sakta khua ah an rak i tong. Lairal tho dingin hrihhawhtu bik khua hna cu Zokhua, Hniarlawn, Halkha, Thangaw le Sakta an rak si. Kan Pupa hna cu Sakta khua Pu Ral Dun Inn ah 1917 October 30 ah an rak i tong hna i, Roca t’ialtu ah Zokhua in Pu Khar Mang a rak si. An hnatlakmi pathum cu:
1. Mirang Ram ah kan kal lai lo. 2. German si loin mirang tu kan doh hna lai. 3. Ral thawh ni cu a ralai mi December ni 1 ah siseh.
A cunglei biatlang pathum hna hi an hnatlak t’i hnu ah Mirang tuk awk ah Lai ralkap cu 1917 November 30 ah an rak tho colh. Kan Lai Pupa hna hi biathli a thup khomi zong an rak si. Cuticun a hmasabik ah Cawbuk ralkap camp cu Lai ralkap hna nih an rak laak. Halkhapi cu an rak kulh dih. Halkha Mirang vuanthok Bawi nih Lairal minung thonghra 10000 hrawng ral an tho tiah a rak thanh(Carson nihcun thong 5 hrawng tiah a t’ial). Mirang ralkap pawl cu Lai ralkap thawngpang nih a tlerh in a rak tlerh hna. Mirang nih “The Famous Haka Rebellion” tiah min an rak pek phah hna. Cuticun Lai ralkap minung zeimawzah le mirang ralkap thongthum 3000 hna cu fakpi in an rak i tu.
Hniarlawn khua le Nabual khua cu mirang ralkap nih mei in an rak duah. Zophei, Lautu, Senthang tlang hna zong khua mei duahpiak an rak tong. Dongva le Leitak khua karlak ah Lai ralkap nih lambawh in mirang ralkap cu an rak kah hna. Hmaisuang pakhat a thi i, ralbawi Capt. Burne cu a kut bul lak in an rak hliamh. Hniarlawn lei an i kahnak ah Mirang pakhat a thi i pathum an i rak hliam i, Lai ralkap lei in minung pakhat a thi ve. Kan Pupa hna nih an rak hmanmi cu fei le naam, Cantiang le Lai meithal hna an rak si. Mirang cu miakpi he meithal t’ha he an si. Cuticun kumpi kumthum chung kan Pupa hna nih Ram dawtnak zumhtlaknak lungput he Vapual hmul tonh in uktu Mirang cu an rak doh hna.
Sihmanhsehlaw hriamnam le zenkuan aa dan tuk hringhran caah kumthum khitkhet i tuk hnu ah Lai Pupa hna cu an rak sung. Lairal ruangah Mirang nih an tlaih hna i thong an rak thlakmi hna hi minung 82 hrawng an rak si. Mirang ralkap hna nih an tlaihmi Lai ralkap hna cu atu Halkha Ralkap Tili khi atung pe 300, avaang pe 120, a thuk pe 12 in an rak cawhter hna. Kan Pupa Lai ralkap hna nih an thlanhripuak in an rak cawhmi tili a si caah tuchun tiang “Ralkap Tili” tiah min sak a si. Kan ram le miphun kilven ruangah kan Pupa hna cu thong khumh an rak i huah. Kan Miphun zawnruah ah cucu kan Pupa hna nih an rak i duh deuh ko. Hriam le nam dan tuk ruangah sung hmanh hna sehlaw an lungput in a sungh an rak pe hrimhrim lo. Kan Lairam caah Lai pasal hna Thong chung ah a thi mi le Mirang uk duh lo ruangah aa awkthat(hri-awk) mi tiangin an rak um. Aw… Aw zeitluk in dah Ram le miphun dawt hi a fah. Kan Pupa hna ram dawtnak lungput hi biatak in ruat cio hna usih.
Nihin cu kan Pupa hna nih kan miphun an dawtnak lungput nun kan cuanh t’han ni a si. 1917 November 30 in Lairal an rak tho i, tukum 2017 November ni 30 tiang ahkhan kum zakhat a tling cang. Nihin ah kan Pupa hna thlarau nih bia an kan cah t’han, Laimi thinlung ah phun t’anhnak an run phuan t’han cang e, kan in roh taakmi hna Chin vawlei hi kilveng ulaw na Lai miphun humzual law an kan ti. Pupa hna thisen cu zatlang ah a au zungzal ko. Nihin cu Pathian thluachuah in Chin miphun nih kan thang kan i chuah ni a si. Tuchan t’hangthar mino hna nih Lairal tho mi hna kan Pupa lungput hi nunter t’han hna usih. Hlan lio khua khat le khua khat i chim/doh chan ahcun Halkha, Zokhua le Sakta cu khuakhat le khua khat a rak i do zungzalmi an rak si.
Nain kan ral a rak simi Mirang doh dingah cun hmunkhat te ah t’ang t’i in kan ram le miphun dawtnak he Sakta khua ah tonpumhnak an rak ngei i, kan Lai Ral Mirang cu an rak doh t’i. Lai ral lio ahhin khua 30-40 lengkai an rak i tel. Cu vialte Lai ralkap Pupa hna lungput cu aa dawh tuk a sunglawi tuk. Dawtnak le thlachiat ruahnak le i zawnruahnak in a rak khat. Tukum in hin kum zakhat a tlinnak le thla tlawmpal a tinak lawng a si. Lai Miphun hi mi ralt’ha kan sinak le kan ral hna sin zongah kan ram a zaam taak bal lomi kan sinak kha nunter t’han a herh. Cucaah tuchan Chinmi hna zong kan Pupa hna bangin ral kan doh rih a hau. Nationalism lungput he phun kan t’anh t’han a herh. Dothlennak kan tuahmi hi a dih rih lo. Kan Pupa hna keneh zul in Chin miphun le Ram caah hmaisuangtu CNF/CNA dirpi chin hna usih. Chin Party he hmunkhat ah kaarhlang t’i hna usih. Kan hnulei tuanbia hi fimchimtu le thazaang ah hmangin hmainawr chin lengmang hna usih.
Chin miphun kan Pa Dr Lian Hmung Sakhong nih “A chuah hlan sining aa thei lomi minung cu, hnu ah a zungzal in an taang. Cucaah minung pakhat nih a chuah hlan a nizan tuanbia kha aa theih a hau” a ti. Nihin Chin miphun vialte nih kan tuanbia le kan nizan kong hi hngalh i zuam in, kan miphun hmailei Dothlennak hi pehzulh chin hna usih. Zalong tein kan holh kan ca kan chim kan cawn khawh i, kan nunphung kan kil le kan Pathian zalong tein kan biak khawh nakhnga caah Lairal a simi a thli in a kan eitu rungrul Miphun dang Virus pennak hi doh zungzal ko rih hna usih. Teinak cu Bawipa ta a si. Amen. Kaa lawm.
Salai Thomas Lian Thihlum. Yangon, Myanmar. Zohchih mi le cinken in kaa t’ialmi hna:
– Lairal Kum 100 Tlin Philhlonak.(2 December 2017, LBC Yangon)
– Saya Thein Za Lian Cathluan chuahpi mi.
– Dr. Lian Hmung Sakhong nih a chimmi ka note mi hna chungin(LKZTP, 2 December 2017, LBC Yangon)
– CACC nih Cauk chuahmi(2009) Pi Tial Nawn le Lairaal Kong.
Photo: Kha hlan lio Halkha Ram-Uk Bawi nih a hruaimi Lai ralkap hna.
(Note: 2017 ah ka t’ial cangmi kha, a rel rih lomi caah ka vun thar chuah t’hanmi a si.) By Salai Thomas Lian Thihlum.

Be the first to comment

Leave a Reply

Your email address will not be published.


*