Breaking News; SAC Ralhrang Nih Kawlram Mipi Vailte Caah Thawngpang Chia Kho Taktak Thanhnak An Vun Tuah Taktak Cang E!!

Myanmar Caah Russia Sinin Cawkmi Jet-Fighters Pawl Timhcia An Si Cang-SAC Ralhrang
===========================================
Myanmar caah Russia sinin kan cawk mi Jet-Fighters pawl cu timhcia an si dih cang hna i, hman khawh a si cang tiah, SAC ralhrang chimphuan ngeitu Zaw Nin Htun nih a chim. Myanmar SAC ralhrang ralkap nih Russia sinin a cawk mi SU-30 raltuknak vanlawng pakhat cu ramchung a rak phan cang, tiah thawngpang a len hnu ah SAC ralhrang chimphuan ngeitu Zaw Min Htun nih a tubantuk in ralring peeknak bia a chim hi a si.

“Myanmar ram caah Russia sinin a rak lut hnga ding vanlawng pawl cu timh cia an si cang ii, kan mah lei zong nih kan hman khawh cang.” tiah Zaw Min Htun nih thawngzamh zungah a chim. A tuabantuk in Russia sinin raltuknak vanlawng pawl an cawk mi hi Russia nih Myanmar ralkap SAC ralhrang pawl cu thawnter deuh dingah tuanvo a lak piak a si ii, Russia sinin cawk mi raltuknak vanlawng pawl cu timhcia a si dih cang hna ii hman khawh a si cang, tiah a chim.

October ni 17 ah Russia nih sermi SU-30 pakhat cu Kawlram chungah kan hmuh, tiah Myanmar Witness phu nih thawngthanhnak a tuah hnu ah a tubantuk in SAC ralhrang lei nih an chim nak hi a si.

Aizawl Pawng Ah Petrol Phortu Motor Aa Leh Ruang I Meikaang A Chuak Mi Ruangah Minung 9 Nunnak A Liam Cang! India, Mizoram ramkulh Aizawl khuapi pawng, Tuirial ah a luancia October 29, chunhnu suimilam 2:30 hrawng ahkhan petrol phortu motor cu a rak i let i, zanlei muika hrawngah mei kanghnak a rak chuak. Cu meikaang hliamhnak ruang ah cun nihin November 8 tiang nunnak liammi minung 9 tiang an phan cang, tiah theih a si.

Petrol phortu motor a leh caah a tle-bua mi petrol hna cu a pawngkam um mi hna nih an i donh cio i, cu lio zaan suimilam 6:00 hrawng ah ruah lo piin mei a rak chuak, tiah theih a si. Mei a chuah ruang ah a hmun ah pa 3 le nu 1; minung 4 cu an nunnak a rak liam i minung 15 hrawng cu mei hma in siizung an rak phan. Cun meikanghnak pawng ah ummi taxi pakhat le cycle 3 zong an rak kaang chih.

Cun, November 2 ah meihma tuar ruang i siizung phanmi pa 2 le November 3, 6 le 8 ah minung pakhat cio tiin an nunnak a liam ṭhan caah nunnak a liammi dihlak hi minung 9 an phan cang. Meihma ruang ah siizung a phanmi hna chung in a hmaa fak ngai mi zong an um rih, tiah theih a si. Petrol phortu motor nih cun Rupees sing 20 man; petrol litre 22,000 a phorh, tiah theih a si.

SAC ralkap hna nih an hman i atu le tu a rawk lengmang cang mi A-5C raltuknak vanlawng hlun cu raltuknak ah hmang in bomb thlaknak a tuah, tiah vanlei ralkap thawngthanhnak a tuahtu hna sin in theih a si. China ser Nanchang A-5C Fantan cu atu le tu a rak tla i a rawk tawn, oil a ei tuk leng ah remh ding ah a thilri a har tuk caah hman lo in an rak um tawn nain, nai chung hrawng ah cu raltuknak vanlawng cu an hman ṭhan i ramchung ah bomb thlaknak an tuah, tiah theih a si.

“A-5 vanlawng hi hman lonak caan a sau cang, a tlak le a rawh zong a tam leng ah oil a ei tuk caah hman lo in an chiah i a hlun tuk cang nain, atu cu vanlei ralkap thazaang an chap caah cu vanlawng cu an hman ṭhan” tiah vanlei ralkap thawngthanhnak lei nih an chim. China serchuahmi A-5C raltuknak vanlawng cu Myanmar ramchung ah 30 leng a um rih tiah theih a si.

“A-5 raltuknak vanlawng hi tampi a um; rampi huap in 30 leng a um. Tada Oo ah cu vanlawng cu 4 lawng a um cang. Nanchang A-5C Fantan cu a ṭhing ngai cangmi a si nain, raltuknak ah an hmanter hna” tiah an chim. Dohthlennak kumkhat fai a kal hnu ah SAC ralkap lei nih raltuk ningcang an thlen i, vanlei thazaang an ṭhawnter. Dohthlennak tuahtu mipi ralkap hna cu vanlawng in bomb an thlak hna i kahdohnak a tuah, cunglei in ramchung a ummi vanlawng dihlak cu hmannak nawl an pek hna, tiah theih a si.

Tukum February 16 ah Sagaing ramṭhen, Yemyaitkyi ah China serchuah Nanchang A-5C Fantan raltuknak vanlawng cu a rak tla i vanlawng khaltu zong a nunnak a rak liam. Nanchang A-5C Fantan raltuknak vanlawng cu 1970 kum hrawng ah rak sermi a si. United Kingdom Minister of State for Trade Policy, Greg Hands cu chawlehnak kong he pehtlai in tuzarh chung ah Taiwan a tlawng lai i President Tsai Ing-wen he an i tong lai, tiah theih a si.

Greg Hands cu Taiwan President Tsai Ing-wen he tonnak an ngeih dih hnu in UK- Taiwan chawleh chawhrawlnak ceihhmainak an ngaiṭi lai. UK nih Taiwan he chawlehnak tam deuh tuahṭi ding in bia a rak kamhmi cu a tak in kan ṭuanchuah lai ti langhter duhnak ah a si, tiah Greg Hands nih cun a chim.

Taiwan cu UK he palai pehtlaihnak an ngei lo nain chawleh chawhrawlnak ah ramhnih kar i theihthiamnak he rian a ṭuanṭi mi an si. China nih Taiwan ah nitlak lei ram hruaitu hna cu tlawng lo ding in a kham len nain nitlak lei ram hruaitu hna cu atu le tu Taiwan an rak tlawng hna.

Sagaing ramṭhen, Wetlet peng Shinmaka khua cu hramhram uknak latu SAC ralkap nih 2022, November 7 zaan ah hriamngan in an kah caah minung 6 khuasa chhungkhar pakhat inn ah cu hriamngan kuan cu a tla i nau pawi lio nu pakhat a nunnak a liam i, minung 4 hliamhma a pu. Hriamngan tlaknak innchungkhar ahhin kum 7 ngakchia pakhat lawng a him, tiah theih a si. Hliamhma tuarmi hna chung ah kum 60 tluk upa pakhat le kumkhat fai lawng a simi ngakchia hna cu an hliamhma a fah deuh caah an nunhimnak ca ah thinphang a si ko, tiah theih a si.

Sagaing ramṭhen, Tanhse peng ah rallam a sialmi SAC ralkap Khah-Lah-Yah 368 cu nizan November 7 zinglei sml 8 hrawngah Tanhse-PDF nih hriamngan in an kah hna i 5 an thi. Tanhse peng Inye-Oo khua in Inpa-ai khua lei ah rallam a sialtu SAC ralkap hna cu Shwebo pengkomh PDF brigade 6, battalion 7 ralkap hna nih 60 MM hriamngan lung 6 in an kah hna, tiah theih a si.

Vawleicung minung thong tampi nih an hmanmi Facebook ngeitu Meta Company nih a rianṭuantu minung tam ngai cu an rian in dinhter a timh hna, tiah US thawngzamh cheukhat nih cun an ṭial. The Wall Street Journal nih a tar ning ah cun Meta nih a rianṭuantu minung a thong renglo an rian in dinhter a timh hna. Kum 18 chung ah Meta company nih a tam bikmi rian dinhternak a si, tiah a tar.

A ra lai mi cawn nithum ni thawk in rian dinhter an si lai, tiah ruah a si i Meta company lei nih cun chimfiannak a tuahmi a um rih lo. A luancia caan zeimawzat chung ah Technology company a simi Twitter, Microsoft, Lyft le Strip hna zong nih an rianṭuantu zeimawzat cu an rian in an rak dinhter cio hna. Social Media Platform Company hna cu a hnu ah a rak chuakmi Tik Tok le Snapchat Company in zuamcawhnak fakpi an tong. Atu lio vawleicung mirum bik Elon Musk zong nih Twitter Company a cawk hnu tlawmpal ah rianṭuantu zatceo cu an rian in a rak dinhter hna. Crd-TCP

Be the first to comment

Leave a Reply

Your email address will not be published.


*