Kalaymyo ah tlaihkhih a tongmi thongtla hna cu SAC ralkap nih zaan gate an hngahter hna
==================================
Sagaing ramṭhen, Kalaymyo ah SAC ralkap kut in tlaihkhih a tongmi tualchung mi hna cu zaan caan ah pengkulh palik sakhan hmai gate ah hriamthil tello in an kee hren he, gate an hngahter hna tiah cu thonginn in luatnak a hmutu he naihniam in a ummi hna nih an chim tiah theih a si.
Tlaihkhih a tongmi hna cu SAC ralkap nih rallam an sialnak hmun ah a tlawmbik ni 15 hrawng an i kalpi hna hnu ah, pengkulh palik sakhan ah an kuat hna i cheukhat cu thonginn ah kuatlo in pengkulh palik sakhan thonginn ah a um mi hi a tlawmbik minung 200 leng an si tiah theih a si.
Luatnak a hmucang mi hna nih ” tlaihkhih a tong i palik sakhan ah hrenmi hna cu gate an hngahter hna. Kalaymyo pengkulh palik sakhan hmai ah gate an hngahter hna, thongtla kip cu an si lo. Civil thuam he an hngahter hna, meithal an pe hna lo, an kee hren he an hngahter hna, a tu bantuk in gate an hngahter hna nak hi thlali hrawng a si cang” tiah luatnak a hmu cangmi pakhat nih a chim. Tlaihkhih a tongmi hna hi tualchung mi sawhsawh an um nain PDF le CDM cawlcanghnak a tuahmi hna zong an i tel ve tiah theih a si.
Hpakan Peng Madeyan Hmawpone (မဒဲယန်မှော်ပုံ) Khua SAC Ralkap Nih An Khangh, Khuami Zong An Hrem Hna, Kachin ramkulh Hpakan peng, Longkhin pengkomh Madeyan Hmawpone khua cu nihin september ni 14 zingah SAC ralkap an lut i mipi inn an khangh tiah tualchungmi hna sin in kan theih. SAC ralkap pawl cu private mawtaw 6 in thazaang 30 hrawng cu an rak lut i Ko Htee Oo dawr ah an lut, cu hnu ah dawr hmai um mi U Myint Shwe cu an tlaih i an kalpi, cun dawr zong an khangh ta tiah tualchungmi hna nih cun an chim.
SAC ralkap pawl zingka in an rak lut i khuachungah duh paoh in meithal le hriamngan an puah hleiah inn zong an khangh caah tualchungmi hna cu Sankha khua le Longkhin khua ah an zaam dih tiah theih a si. A luancia August thladih zongah Madeyan Hmawpone khua ah SAC ralkap an rak lut i lamzawhmi hruaitu pakhat an tlaih pinah inn le mawtaw an rak khangh bal cang tiah tualchungmi hna nih an chim
Thaketa Peng Kamarkyi Hlei Cung In Mipa Pakhat A Zuang, Yangon ramṭhen, Thaketa(သာကေတ) peng Kamarkyi(ကမာကြည်) hlei cung in mipa pakhat cu nihin September 14 zing sml 10:00 hrawng ah a zuang, tiah mi bawmchantu phu nih an chim. Bawmchantu phu cu mipa a zuannak hlei lei an va kal tikah cycle(စက်ဘီး), phanah, luchin le a dangdang thilri a chiah takmi an hmuh. Mipa hi aho a si ticu an hngal kho rih lo, tiah theih a si.
Mipa ruak cu palik nih an kawl cuahmah ko nain September 14 chun tiang ah an hmu kho rih lo, tiah Thaketa peng mi bawmchantu phu siin theih a si. A luancia August thla zarh dongh lei ah Yangon telh in kadang hmun dang ah mah tein aa thatmi hi zarhkhat chungah 7 an um, tiah theih a si.
Thinlung khuaruah umtuning kong a cawngmi Phyo Pan Nu Khin nih cun, “Mi pakhatkhat nih a lung donghnak kong bia a’n ruah i, a nunnak lak ding tiang in aa timh na hmuh ahcun nangmah lawng nih na tonmi a si lo, tiin thazaang peknak biachim a biapi,” tiah BBC he biaruahnak an ngeihnak ah mizapi theih ding in a chim.
Mizoram Planning Board Vice Chairman Pu H. Rammawi Nih Ralzam Kongkau Ah India Central Cozah Hruaitu A Ton Hna, Mizoram Planning Board Vice Chairman Pu H. Rammawi Nih Ralzam Kongkau Ah India Central Cozah Hruaitu A Ton Hna: India ram i aa dormi Myanmar ralzam; a bikin Chin ralzam hna cu Myanmar ram ah kuat ṭhan an si lai, ti bantuk biachawkvai a um lio ah, ralzam kong he pehtlai in Mizoram Cozah ah ṭuanvo ngeitu sang Planning Board Vice Chairman Pu. H. Rammawi nih Delhi khuapi Central cozah hruaitu hna a va ton hna.
Mizoram Planning Board Vice Chairman Pu H. Rammawi nih cun, “Atu i Mizoram ah a ummi Myanmar ralzam hna cu a kir ṭhan hnu ah an humhimnak ṭha te an ngeih lo i, an khuasaknak ah remdaihnak a um lo ding a si ahcun Mizoram cozah nih kan kirter hna lai lo,” tiah Ministry of External Affairs ṭuanvo ngeitu hna he tonnak an ngeih lio, September 14 ah khan a chimh hna. Pu H. Rammawi hi Sangau khua chuak a si i, Lawngtlai East Constuency in Mizoram Legislature Assembly (MLA) ah rak thim cang mi a si. Mizoram cozah ah Cabinet minister(Agriculture) a rak ṭuan bal mi a si i, Atutan MNF cozah ahhin Planning board vice chairman rian a tlaih.
SAC Ralkap Nih Monywa Peng Nagardwin(နဂါးတွင်း) Khua An Khangh, Khuami 12 An Tlaih Hna, Sagaing ramṭhen Monywa peng Nagardwin khua cu SAC ralkap nih nihin september ni 14 zingah hriamngan in an kah hnu ah khua chungah an lut i mipi inn zeimawzar an khangh hna tiah tualchungmi pakhat nih a chim tiah theih a si. SAC ralkap pawl nih Nagardwin khua cu nihin zing suimilam 6 le cheu hrawng ah hriamngan in an kah, cun suimilam 9 le cheu ah khuachung an lut i suimilam 11 le minute 41 ah inn pawl cu an khangh duahmah hna.
SAC hriamngan kahnak in khuami inn pakhat cu a rawk, leikuang hna an kang chih, cun phungki sianginn ah um mi cycle pawl zong an khangh dih tiah theih a si. Khuachung luh awk a ṭhat rih lo caah inn zeizat a kangh le tualchungmi a thi le aa hliam mi cu kan thei rih lo nain minung 12 tu cu an tlaih hna, inn kang hi cu a tam hrimhrim ko lai tiah tualchungmi pakhat nih a chim.
Dawei Pengah SAC Ralkap Nih An Tlaihmi Hna Tualchungmi 130 Hrawng Cu Zarhkhat Hnu Ah An Thlah Hna, Tanintharyi ramṭhen Dawei peng Bawapin (ဘဝပင်)khua mi 130 hrawng cu a luancia september ni 6 ah SAC ralkap nih an rak tlaih hna, cu an tlaihmi hna cu zarhkhat chung an hrem cikcek hna hnu nizan zaanlei ah an thlah ṭhan hna tiah theih a si.
SAC ralkap thazaang 100 hrawng cu Bawapin khua ah an lut i khuami tar le ngakchia he minung 130 hrawng Phungki sianginn ah an rak tlaih hna tiah tualchung hriamtlaiphu chungtel pakhat nih a chim. Khuami hna cu phungki sianginn ah an zaam, cu an zaam nak ah cun SAC ralkap nih an kal hnawh hna i an tlaih hna, an hrocel hna, hri in an ṭem hna, meithal kuang in an tuk hna, an hrem hna pin ah khuachung thilri pawl cu an duh paoh in an lak tiah tualchung hriamtlaiphu pakhat sinin theih a si.
SAC ralkap pawl cu Bawapin khua ah zarkhat umhmun an khuar hnu nizan september ni 13 ah Dawei khua lei ah an kal i an kal pah ah hriamngan le hriamhme he an puahpah thluamah tiah theih a si. Bawapin khuami an tlaih hna ni, september ni 6 thok in an khuapawng ah KNLA , tualchung hriamtlaiphu le SAC kar kahdohnak pehtlai in a chuak i SAC lei a thimi zong an um tiah Dawei pah-kah-phah in ṭuanvo ngeitu pakhat nih a chim.
Minung thazaang 200 hrawng si mi SAC ralkap phu hna cu Bo Naga chungtel 13 nih an kahdoh hna, 5 an thi, SAC ralkap minung thazaang 200 hrawng cu Bo Naga hruaimi Myanmar Ṭawwin Naga ralkap MRDA Special commando chungtel minung 13 nih an kahdoh hna i SAC ralkap lei a thimi an um tiah cathanh an chuah. Nihin September 14, zinglei suimilam 7:30 hrawng ah Pale peng Pan khua le Muaitone(မွေ့တုံ) khuapawng ah minung thazaang 200 hrawng simi SAC ralkap phu hna cu Myanmar Ṭawwin Naga MRDA i Special commando chungtel minung 13 nih a naihnak hmun in an kah hna hi a si.
Kaphnih kar i kahdohnak minutes 15 hrawng a rauh hnu ah SAC ralkap lei 5 hrawng an thi tiah an cathanh chuahmi ah cun an langhter. SAC ralkap lei cu minung thazaang le hriam thazaang tamtuk an si nain, Bo Naga Special commando hna nih hmunhma ṭhatuk in an huapkhawh ruangah le hmuhtonmi tlamtling an ngeihve ruangah hliamhma tuarnak umlo in kaphnih kar i kahdohnak ah hlawhtlinnak he hnu an tolhkho tiah an thanhmi ah cun an langhter chih. Crd-The Chin Post
Leave a Reply