BREAKING NEWS; SAC Ralhrang An Thawngpang Theih Cu Thinlung A Hmui Kho Tuk Hringhran!!

SAC Ralhrang Pawl An Thawngpang Theih Nuam Fonh!!
====================
Shan ramkulh chaklei Muse khualai ah pengkulh biaceih bawi pakhat cu nihin October 6 zaanlei ah kahthah a tong tiah theih a si. Muse khuachung khualai lampi ah motor a khalh cuahmah mi pengkulh biaceih bawi pakhat cu hriamtlai phu cheukhat nih naih tein an kah caah a thi tiah tualchung mi nih an chim. “Zaanlei suimilam 5:30 hrawngah pistol in an kah, kah a tonnak hmun ah hmakhat te ah a thi colh” tiah tualchung mi pakhat nih a chim.

Kahthah a tongtu pa hi Muse peng biaceih bawi a si tiah tualchung mi nih cun an chim nain a min le a reng kong ah fiang tein fehtermi a um rih lo. Cheukhat biaceih bawi hna nih an rianṭuan hawi kahthah a tonnak kong ah anmah le social media ah an ngaihchiatnak kong an langhter tiah theih a si.

KNU brigade 3 hmunhma ah a luancia September thlakhat chungah kahdohnak voi 70 leng a cang i cu kahdohnak ah cun SAC ralkap 83 an thi, 86 nih hliamhma an tuar tiah theih a si. KNLA battalion 7,8,9, KNDO battalion 3 le SAC ralkap kar a cangmi kahdohnak a si.

SAC ralkap lei nih kahdohnak a chuah lio ah tualchung mipi hna umnak khuachung ah tinhchih in hriamngan an kah lawng si lo in, van lei kahdohnak zobg voi 3 tiang an tuah tiah theih a si. Myanmar ramchunh hmunkip ah a cangmi kahdohnak ruang ah SAC ralkap lei a thimi le hliamhma tuarmi hna kong ah SAC ralkap lei nih thawng thanhnak an tuahmi a um lo.

Rakhine ramkulh, Kyauktaw peng Kansaung(ကန်စောင့်) tlang ah umhmun khuarmi Khah Mah Yah 539 Battalion chungin SAC ralkap 12 cu, nizaan October 5 zaanlei ah anmah Battalion chung ralkap lila nih an tlaih hna, tiah theih a si. Nihin October 6 ah SAC ralkap 3 cu Sittwe(စစ်တွေ) khua MABE Battalion ah an kuat hna i, a tangmi ralkap 9 cu a dang Battalion ah an hren hna, tiah tlaih a tongmi ralkap he aa naihniammi sinin theih a si.

“Ralkap 12 an tlaih hna pinah an nupi le zong an tlaih chih hna, an fale lawng an luat. Zeiruangah dah an tlaih hna ti cu kan hngal lo. Kan lungre a thei tuk ve,” tiah a chim chap. Cu pinah nizan October 5 ah Ann khua palik sakhan in palik 10 cu SAC ralkap nih an tlaih hna, tiah palik he naihniam in a ummi hna nih an chim.

Sagaing ramṭhen, Walet peng Shwe Bo-Mandalay lam cung um Sai Naing Gyi(စိုင်နိုင်ကြီး) khua ah SAC ralkap cu, umhmun khuar ding in an i timhtuah lioah hriamngan in kan kah hna i, SAC ralkap 5, officer 1 le pyusawhti 1 an thi, tiah Burma Rangers (ShweBo) nih an thanh. October 4 ah Walet peng Sai Naing Gyi khua ah SAC ralkap cu umhmun khuar ding in an i timhtuah lioah Burma Rangers (ShweBo) le ṭangṭi phu Nattaung(နတ်တောင်) Naga phu hna i bawm in 60mm hriamngan in an kah hna caah SAC ralkap officer 1 telh in ralkap 6 le pyusawhti 1 an thi, tiah theih a si.

Cu kahdohnak ah SAC ralkap hliamhma a pumi an tam i, SAC ralkap pawl cu Shwe Bo lei ah an kir. Sai Naing Gyi khua pawng Sai Naing kuaih ah SAC ralkap pawl cu atu le atu bomb puahhnawh an tong, tiah tualchung mi hna nih an chim.Mon ramkulh, Ye khua Thiri Zeyar(သီရိဇေယျာ) sang ah SAC kuttang rianṭuantu khuabawipa Min Thein cu, nizaan October 5 zing sml 10:00 hrawngah kahthah a tong, tiah tualchung mi hna nih an chim.

Khuabawi Min Thein cu a inn hmai lakphak dawr a ṭhut lioah MSRO phu nih meithal in an kahthah hi a si. MSRO ṭuanvo ngeitu Ar Kah nih, “Khuabawi Min Thein cu SAC ralkap he i bawm in tualchung mi cu an tlerh lengmang hna caah kan kahthah,” tiah a chim. Min Thein cu a luancia kum 2010 lio in khuabawi a rak ṭuanmi a si i, SAC nih nawlngeihnak an lak hnu in ralkap he i bawm in rian a ṭuanmi a si. Anih hi SAC ralkap thawng petu dalan minthang a si, tiah theih a si.

Relchap, Chin ramkulh, Mindat ah Public Administration, Township Education Board Hruainak In World Teacher’s Day An Tuah!
Chin ramkulh, Mindat ah, Public Administration, Township Education Board hruainak in, sianglairuun sianginn pakhat ah, nizaan October 5 ah World Teacher’s Day an tuah tiah theih a si.

Cu programme ah cun, Mindat peng Public Administration in Secretary, Township Education Board in tuanvo ngeitu le CDF-MINDAT commander hna an i tel i cu hna nih cun biachimnak an ngeih hnu ah World Teacher’s Day philh lo nak caah Essay tial zuamnak le Sports zuamnak zong an tuah tiah kan theih.

MATC/MDF Nih CDF-Mara An Kah Mi Hna Kongah CDF Mara Nih Cathanh An Chuah, 2022 October 3 ah, CDF-Mara headquarter in Bataillon 2, number 3 ah hriamnam ken loin a um kalmi CDF-Mara ralkap hna cu MATC/MDF nih nan kah hna. CDF-Mara ralkap hna cu hriamnam an i ken lo caah, MATC/MDF cu lehrulhnak tuah loin hnu an tolh.

2021 March 25 lio zong ah, hriamnam ai ken lomi CDF-Mara Tat-Khuai-Hmu (Palik CDM) cu, MATC/MDF nih nan rak thah pinah General Staff le ralkap dang pahnih hna zong nan rak hliamh hna. Tutan zong CDF-Mara ralkap hna cu, timh ciammam tein nan kan kah caah CDF-Mara nih a herh ning bantukin kan in lehrulh ve hna lai tiah CDF-Mara nih cathanh an chuah.

Tedim Khua Hrambunh 269 Battalion Ralkap Nih Bomb An Phummi A Puah Ruangah Pa Pakhat A Nunnak A Liam, Nu Pakhat Hliamhma A Pu, Chin ramkulh, Tedim khua um 269 Battalion ralkap nih bomb an phummi a puah caah pa pakhat cu, October 3 zaan sml 9:00 hrawng ah a nunnak a liam, nu pakhat zong hliamhma a pu, tiah theih a si.

“Zaan sml 9:45 tluk ah bomb a puak i pa pakhat cu a hmun ah a thi colh. Nu pakhat tu cu hliamhma a pu i Kalaymyo ralkap sii-inn ihkhun 100 umnak ah an kalpi. Pa pakhat a thimi ruak tu cu an vui cang,” tiah tualchung mi pakhat nih a chim. A thimi pa cu Tedim khua Sakaw lam sang ummi San Chu rawl dawr ngeitu a vapa a si i, hliamhma pumi nu zong hi dawr ngeitu nu i a nau a si ve.

Puahkehnak kong he pehtlaiin tualchung mi hna nih cun 269 Battalion ralkap nih an hmanhmi bomb a si lai, tiah an zumh. Tualchung mi cheukhat nih a thimi pa hi SAC ralkap pension Captain pakhat a si, tiah an chim ko nain fiang tein hngalh a si lo.

Min Aung Hlaing Nih Nawlngeihnak A Lak Ruangah Puma Energy Companny Cu Myanmar Ram In An Chuak Cang, SAC hruaitu Min Aung Hlaing nih, nawlngeihnak a lak ruangah Puma Energy Companny nih datsi le vanlawng diesel cawk zuarnak rian vialte a tuahmi cu kaltak in Myanmar ram kan chuah tak cang, tiah cathanh an chuah.

Singapore hrambunh Trafigura Energy Companny kuttang Puma Energy cu, Myanmar ram ah chawleh chawhrawlnak a tuahmi vialte zuar dih ding in minsen a thut cang. Puma Energy Asia Sun le National Energy Puma Aviation Services (NEPAS) hna telh in Puma Energy nih a ngeihmi share vialte zong a zuar dih i, Myanmar ram a chuah tak cang lai, tiah theih a si.

Puma cu Myanmar ram chungah datsi le vanlawng diesel tam bik a phak tertu a si. Puma Energy Companny cu SAC nih nawlngeihnak an lak hnu 2021 in an rian vialte an ngol i, kum 2022 ah Myanmar ram an chuah tak hi a si.

CDF-Matupi He Kahdohnak A Chuah Hnu Matupi Khuachung Ah SAC Ralkap An Chuak Ngamlo , A luancia September 19, Matupi khuapawng ah SAC ralkap le CDF-Matupi kar kahdohnak a chuah hnu in kaphnih kar kahdohnak cu atu le tu a cang i SAC ralkap lei a thimi 10 hrawng an si lai tiah CDF-Matupi nih an thanh.

Kaphnih kar i kahdohnak a chuah hlan Matupi khuachung ah SAC ralkap atu le tu leng an chuak na in, kahdohnak a chuah hnu in nihin October 6 tiang ah SAC ralkap hna cu leng ah chuak ngam lo in an umnak sakhan chung ah timhcia tein an um i, cu hlan bantuk in leng zong ah an chuak tilo tiah Matupi khuami nih an chim.

SAC ralkap hna cu leng an chuah hmanh ah a phu le a bubu in an chuak tiah theih a si. SAC ralkap hna cu an sakhan chung lawng ah um in leng an chuah lonak kong he pehtlai in khuami pakhat nih cun ” hriam aa tlaih lo mi mipi cu an kan kah thah ngam, an mah vial cu thih an ṭih taktak” tiah a chim. Crd-The Chin Post

Be the first to comment

Leave a Reply

Your email address will not be published.


*