Tamu-Moreh Ramri Gate Cu Manipur Ramkulh Cozah Nih Thla 3 Chung A Khar Lai!
==================
India-Myanmar ramri Tamu-Moreh khuapi luhchuahnak gate ah phungning loin a lutmi Myanmar mi an tam tuk caah November 15 in thlathum chung kan khar lai, tiah Manipur ramkulh cozah nih November 1 ah thawngthanhnak ca a chuah.
Cu an thanhmi ca chung ah cun atu lio Myanmar ramchung ah thinphan ding thil tampi a cang i, ramri ah zalong tein umkalnak nawl lungtlinnak (FMR) ruang ah hmailei ah India ramchung ah phungning loin a lut dingmi Myanmar rammi an karh kho.
Cucaah India-Myanmar ramri ah zalong tein umkalnak nawl cu November 15, 2022 in thlathum chung asiloah India-Myanmar ramri gate cu phungning tein on ṭhan hlan tiang kan khar, tiah an langhter.
Atu bantuk ramri gate an phihnak kong he pehtlai in tualchung mi pakhat nih cun, “Ramri thil i kuatnak a pit lai i, supsap eidin a cat lai, Moreh lei ah thilman a kai lai,” tiah a chim.
Kanbalu khua a khang mi SAC ralkap bomrap an puah hnawh hna, 40 hrawng an thi kho, Sagaing ramṭhen, Kanbalu peng ah a um mi Inma khua le Pintha khua a khang mi SAC ralkap pawl bomrap an puah hnawh hna i 40 hrawng an thi kho tiah PDF sin in thawng kan theih.
November 12 zinglei ah SAC ralkap phu 2 cu Inma khua le Pintha khua an luh lioah bomrap an puah hnawh hna hi a si i SAC ralkap 40 hrawng an thi tiah theih a si. SAC ralkap pawl cu bomrap puah hnawh an ton ruangah Inma khua an khangh dih i Pintha khua a khang mi SAC ralkap pawl zong bomrap an puah hnawh chap hna i SAC ralkap 2 an thi tiah theih a si.
“Inma khua ah nizaan ah a cang. Zinglei sml 9:00am hrawng ah bomrap an puah hnawh hna i 60 hrawng an thi tiah kan theih. Pintha khua le Inma khua SAC ralkap pawl an i fonh i Inma pungki sianginn ah hmunhma an khuar” tiah khuami pakhat nih Khit Thit ah a chim.
Pauk peng ah cawnnak a ngei mi pyusawhtee pawl Drone in bom an thlak hnawh hna, Magway ramthen, Pauk peng, Yapin khua ah ralbawi pawl nih pyusawhtee pawl cawnnak an pek hna lio ah Drone in bomrap an thlak hnawh hna i Pyusawhtee pawl an tlizaam chih tiah Anonumous Special Task Force sin in thawng theih a si. November 12 ah Pauk peng Anonymous Special Task Force nih pyusawhtee pawl Drone in bom an thlak hnawh hna hi a si.
Loikaw ah eidin a phor mi SAC ralkap an kah hna i Captain telh in 3 an thi, Loikaw peng ah eidin a phor mi SAC ralkap pawl an kah hna i Captain telh in 3 an thi i MA 1 zuun 1, kan ngah tiah KNDF nih an thanh. Lawpiṭa bilu tiva pawng ah a um mi SAC ralkap sakhaan ah eidin phorh ding in mipi thuam he a rak chuak mi SAC ralkap 5 cu November 13 zaan sml 3:00 ah an kah hna i mins 10 chung hrawng kahdohnak ah Captain pakhat telh in pa 3 an thah hna tiah an langhter. SAC ralkap pakhat nih aa tlaih mi MA-1 zuun 1, kuanbawm 4, kuan le phone 1 KNDF nih an lak tiah theih a si. Kahdohnak chung ah KNDF hriamtlai pawl him tein an kir kho tiah i SAC ralkap 2 an luat manh tiah theih a si.
Kyaikmaraw Chaunghnakhua sakhaan cu KNLA le Red Dragon phu nih an kah, palek 4 le hriam an lak khawh, Mon ram, Kyaikmaraw peng, Chaunghnakhua palek sakhaan cu KNLA le Red Dragon phufonh nih an kah hna i palek 4 a nung in an tlaih hna, hriam zuun 7 le adang thilri pawl an lak khawh tiah Red Dragon phu nih a thanh.
Kyaikmaraw peng, Chuanghnakhua palek sakhaan cu KNLA phufonh le Red Dragon phu nih an kah hna i palek 3 an thi, 2 an zaam i 4 a nung in an tlaih hna leng ah hriam zong an lak khawh. Kahdohnak chung ah AK 47 zuun 1, M 16 zuun 4, G3 zuun 1, 60mm zuun 1, bomrap 2, AK 47 kuan 200, M16 kuan 500, G3 kuan 300 le 60mm kuan 10 hna an lak khawh tiah theih a si. Crd-The Chinland Post
CDF-Hualngoram Nih LIANDO Hospital Honnak An Tuah, Chin ramkulh, Hualngoram ah Hualngoram Peoples Organization CDF-Hualngoram nih tuah mi LIANDO Hospital honnak cu November 12 ah tluang te in an tuah khawh, tiah theih a si. LIANDO Hospital onnak ah hin HPO/CDF-Hualngoram hruaitu hna le Mizoram Lianpui khua in VC, YMA, MHIP, NGOs hruaitu hna nih an telpi hna i hruaitu hna nih biatawi chimnak an ngeih hna pin ah lawmhpinak ah Rs.5000 an pek hna. LIANDO Hospital honnak a dih hnu in CDF-Hualngoram hriamnam thar a phan mi le mawṭaw thar an ngeih mi Pathian sin pek chanhnak zong an ngeih chih, tiah theih a si.
LIANDO Hospital hi CDF-Hualngoram vennak in Ṭio kam ah hon a si i Mizaw ihkhun 8 le Operations khankhat a um, Mizaw zoh man laak a si lai lo. Mizaw a rak i zohtermi hna tu nih mahle sian tawk cio bawm chung ah chiah khawh a si. LIANDO Hospital hi Hualngoram mipi ca lawng siloin Mizoram lei mipi hna ca zong ah santlai ngai mi a si, tiah CDF-Hualngoram hruaitu pakhat nih cun a chim.
Yangon Ah Chin Pa Pakhat Cu Taxi Khaltu Nih A Velh Hnu Ah A Phaisa le Thilri A Firpiak! Yangon, Aungmingalar highway gate in Chin pa pakhat nih taxi a hlan i cu taxi khaltu pa nih Chin pa cu a velh hnu ah a phaisa le thilri a firpiak tiah theih a si. Cu phaisa chuh a tongmi Chin pa cu Mindat in ramdang kal ding ah Yangon a phanmi a si.
Taxi khaltu nih a velh i, a phaisa le thilri a chuh hnu ah lamka ah a chiahtak i, Chin pa cu lamkam ah zarhkhat chung a it. Bawmchantu phu nih an hmuh tikah Yangon Chin bawmchantu phu sinah bawmhnak an halpiak i khua ah an kirter ṭhan, tiah theih a si.
Shwe Gin Le Kyaukkyi Karah SAC Ralkap Sakhan 3 Cu Kah An Ton Caah 11 An Thi, Hriamnam Tam Tuk An Lak, Pago ramṭhen, Shwe Gin le Kyaukkyi karah SAC ralkap sakhan 3 cu KNLA nih kan kah caah SAC ralkap 11 an thi, hriamnam le meithal kuan tam tuk kan lak, tiah KNU nih cathanh an chuah.
KNU, Kawthulay hmunram Nyaunglaypin pengkomh Brigade 3 hmunram KNLA Battalion 7 le 9 hna i bawm in SAC ralkap Battalion 7 Thanseih sakhan, Battalion 9 Bawkahtar(ဘောကထာ) le Tonetakar(တုံးတံတာ) sakhan cu KNLA nih an lak, tiah theih a si. Cu kahdohnak ah MA meithal zun 8, kuan 3070, 9mm meithal zun 2, 81mm zun 1, 81mm kuan 64, 60mm a saumi sun 1, 60mm a tawmi zun 4, 60mm kuan 113, RPG-7 zun 1, RPG-7 kuan 77, kutcheh bomb lung 28, Short Gun zun 1, Short Gun kuan 88, M14 lamhmi bomb lung 10, hridawh bomb 10, kuanbawm 27 le bomb kawlnak seh 1 cu KNLA nih an lak, tiah theih a si.
SAC ralkap sakhan pathum cu kan lak caah vanlawng in voi 20 hrawng an kan kah caah sakhan chung a ummi hriamnam a dihlak in kan la dih manh lo, tiah KNU nih an langhter. SAC ralkap sakhan pathum cu KNLA nih an lak caah vanlawng hmang in tualchung mi cu voi 10 hrawng timh ciammam in an kah hna caah tualchung mi a thimi le aa hliammi an um le um lo fiang in hngalh a si rih lo.
November 12 le 13 ah SAC ralkap nih khuate pathum komh khua 18 cu timh ciammam tein kahdohnak an tuah caah tualchung mi 20,000 leng a himnak hmun ah an zam hna, tiah theih a si.Crd-The Chin Post
Leave a Reply